ᐱᒋᐊᕐᓂᕕᓂᐊ - ᔫᑳᓐᒥ ᑕᕐᕆᐅᔭᐅᓯᐅᕐᓂᕐᒧᑦ ᓂᐱᓕᐅᕆᓂᕐᒧᓪᓗ ᑲᑎᒪᔩᑦ ᑕᕐᕆᔭᐅᓯᐅᕐᓂᖏᑦ ᑲᔪᖏᖅᓴᐅᑎᒃᓴᓂᒃ

ᑕᕐᕆᔭᐅᓯᐅᕐᓂᐅᑉ ᐱᓕᕆᐊᕆᔭᐅᓂᖓ ᐊᖅᑯᑕᐅᓗᓂ ᐊᔾᔨᒌᓐᖏᓐᓂᖅᓴᐅᓕᖅᑎᑕᐅᓂᐊᖅᑐᑦ ᑮᓇᐅᔭᓕᐅᕋᓱᐊᕈᑏᑦ ᔫᑳᓐᒥ, ᑲᔪᖏᖅᓴᐅᑎᑎᒍᑦ ᑲᔾᔭᐅᓴᓕᖅᑎᑦᑎᓇᓱᒡᓗᑎᒃ ᑕᕐᕆᔭᐅᓯᐅᕐᕕᑦᑎᐊᕙᐅᓂᖓᓂᒃ ᐊᒻᒪᓗ ᐱᓕᒻᒪᒃᓴᖅᑕᐅᓗᑎᒃ ᔫᑳᓐᒥᐅᑦ ᑕᕐᕆᔭᐅᓯᐅᖅᑎᖏᑦ.  ᑕᒪᓐᓇ ᐊᖅᑯᑕᐅᓗᓂ, ᔫᑳᓐᒥᐅᑦ ᑕᕐᕆᔭᐅᓯᐅᖅᑎᖏᑦ ᐃᖅᑲᓇᐃᔭᖅᑎᑕᐅᓂᐊᖅᑐᑦ 13-ᓂᒃ ᓴᓇᔪᓐᓇᕐᓂᐊᕐᒪᑕ 1 ᒥᓂᑦ ᑕᑭᓂᓕᖕᓂᒃ ᑲᔪᖏᖅᓴᐅᑎᓂᒃ ᐱᔪᒥᒃᓲᑎᒃᓴᓂᒃ ᔫᑳᓐ ᑕᕐᕆᔭᐅᓯᐅᕐᕕᑦᑎᐊᕙᐅᓂᖓᓂᒃ ᑲᓇᑕᒥᐅᑦ ᐊᒻᒪᓗ ᓄᓇᕐᔪᐊᕐᒥᐅᑦ ᑕᕐᕆᔭᐅᓯᐅᖅᑎᖏᓐᓄᑦ.

ᔫᑳᓐᒥᐅᑦ ᑕᕐᕆᔭᐅᓯᐅᕐᓂᕐᒧᑦ ᓂᐱᓕᐅᕆᓂᕐᒧᓪᓗ ᑲᑎᒪᔩᑦ ᓯᕗᒃᑲᖅᑕᖅᑎᒋᔭᐅᓂᐊᖅᑐᑦ ᑕᒪᑐᒥᖓ, ᔫᑳᓐ ᒐᕙᒪᒃᑯᖏᑦᑕ ᐱᕙᓪᓕᐊᔪᓕᕆᔨᖏᑦᑕ ᐱᓕᕆᕝᕕᖓᑦ ᐃᖅᑲᓇᐃᔭᖃᑎᒋᔭᐅᓗᓂ.  ᐃᑲᔪᖅᓱᐃᔾᔪᑕᐅᕗᖅ ᐱᕈᖅᐸᓪᓕᐊᔪᓐᓇᕐᓂᐊᕐᒪᑕ ᐊᔾᔨᒌᓐᖏᑦᑐᓂᒡᓗ ᓴᓇᕙᓪᓕᐊᖃᑦᑕᕐᓂᐊᕐᒪᑕ ᔫᑳᓐᒥᐅᑦ ᑕᕐᕆᔭᐅᓯᐅᕐᓂᕐᒧᑦ ᓂᐱᓕᐅᕆᓂᕐᒧᓪᓗ ᐱᓕᕆᕝᕕᓖᑦ.

ᑕᒪᓐᓇ ᐱᓕᕆᐊᖅ ᑮᓇᐅᔭᖃᖅᑎᑕᐅᔪᖅ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᖅᑎᒍᑦ.  ᓯᕗᕐᖓᓂ 2008-09-ᒥ ᑮᓇᐅᔭᖃᖅᑎᑕᐅᓂᐅᓚᐅᖅᑐᑦ ᐃᓚᔭᐅᒃᑲᓐᓂᖅᐳᖅ $400,000 ᑐᖏᑦᑎᐊᖏᓐᓃᑦᑐᓂᒃ, ᐊᖅᑯᑕᐅᓪᓗᑎᒃ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ, ᑕᕐᕆᔭᐅᓯᐅᕐᓂᕐᒧᑦ ᐊᑐᖅᑐᒃᓴᐅᑕᐅᓪᓗᑎᒃ ᔫᑳᓐᒥᐅᑦ ᑕᕐᕆᔭᐅᓯᐅᖅᑎᖏᑦᑕ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᐅᑭᐅᖅᑕᖅᑐᒥ ᑕᕐᕆᔭᐅᓯᐅᕐᓂᕐᒥᒃ ᐱᓕᕆᕝᕕᓖᑦ ᑲᑐᔾᔨᖃᑎᒌᖏᓐᓄᑦ.

ᐃᓚᒋᔭᐅᖃᑕᐅᓪᓗᓂ Canada's Economic Action Plan (ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ), ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐊᕐᕌᒎᖕᓄᑦ ᒪᕐᕉᖕᓄᑦ $1 ᐱᓕᐊᓐᓂᒃ ᑲᓇᑕᓕᒫᒧᑦ ᐊᑐᐃᓐᓇᕈᐃᓯᒪᕗᑦ ᑮᓇᐅᔭᓕᐅᕋᓱᐊᕈᑎᓄᑦ ᐊᑐᖅᑐᒃᓴᓂᒃ ᐊᒻᒪᓗ ᐃᖅᑲᓇᐃᔮᓂᒃ ᓴᖅᑭᑦᑎᒋᐊᒃᑲᓐᓂᐅᑕᐅᓂᐊᖅᖢᑎᒃ ᓄᓇᓕᖕᓂ ᐊᒃᑐᖅᑕᐅᓯᒪᓗᐊᓐᖑᐊᖅᑐᓂᒃ ᓄᓇᕐᔪᐊᕐᒥ ᑮᓇᐅᔭᑦ ᑲᑕᐅᒥᓯᒪᓗᐊᓐᖑᐊᕐᓂᖏᓐᓂ.  ᑖᒃᑯᐊ ᑮᓇᐅᔭᑦ ᐊᑐᐃᓐᓇᕈᐃᓂᐊᖅᑐᑦ $32.8 ᒥᓕᐊᓐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ.

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐃᓚᒋᔭᐅᖃᑕᐅᕗᑦ ᐱᔭᒃᓴᖅᑖᕆᔭᐅᓯᒪᔪᓄᑦ Canadian Northern Economic Development Agency (CanNor) (ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ) ᓄᓇᑦᓯᐊᕐᒥ, ᔫᑳᓐᒥ ᐊᒻᒪᓗ ᓄᓇᕗᒻᒥ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᕗᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᓐᓂ Canada's integrated Northern Strategy.