ᑲᓇᑕ ᐃᑲᔪᖅᓱᐃᕗᑦ ᔫᑳᓐ ᐳᓚᕋᖅᑎᓄᑦ ᐅᐸᒍᒥᓇᕐᓂᕋᖅᑕᐅᑎᓪᓗᒍ

CanNor-09-15

ᕙᐃᑦᕼᐅᐊᔅ, ᔫᑳᓐ (ᓄᕕᐱᕆ 26, 2009) – ᑕᐃᔮᓐ ᐊᑉᓛᓐᔨ, ᒥᓂᔅᑕᕆᔭᐅᔪᖅ ᐱᓯᓂᓯᕋᓛᓄᑦ ᐳᓚᕋᖅᑐᓕᕆᓂᕐᒧᓪᓗ ᑮᒡᒐᖅᑐᐃᓪᓗᓂ ᓴᒃ ᔅᑐᕌᓪᒥᒃ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᑮᓇᐅᔭᖅᑖᖅᑎᑦᑎᓂᐊᕋᒥ ᐳᓚᕋᖅᑐᓕᕆᓂᕐᒧᑦ ᐊᑐᖅᑐᒃᓴᓂᒃ ᔫᑳᓐᒥ.  ᔫᑳᓐ ᐅᐸᒍᒥᓇᕐᓂᖓ (Destination Yukon), ᔫᑳᓐ ᒐᕙᒪᒃᑯᖏᓐᓄᑦ ᐳᓚᕋᖅᑐᓕᕆᔨᓄᑦ ᑐᕌᖓᕗᑦ ᐅᓄᒃᑲᓐᓂᖅᑐᑦ ᑲᓇᑕᒥᐅᑕᐃᑦ ᔫᑳᓐᓕᐊᖃᑦᑕᕐᓂᐊᕐᒪᑕ.  ᑕᒪᓐᓇ ᐱᓕᕆᐊᓐᖑᖅᑎᑕᐅᓯᒪᔪᖅ ᓴᖅᑭᑕᐅᔪᓐᓇᖅᓯᓚᐅᖅᐳᖅ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᑐᑦ.

“ᐳᓚᕋᖅᑐᓕᕆᓂᖅ ᐱᒻᒪᕆᐊᓘᔪᖅ ᑮᓇᐅᔭᓕᐅᕈᑎᓪᓚᕆᐅᖕᒪᑦ ᔫᑳᓐᒦᑦᑐᓕᒫᓄᑦ ᓄᓇᓕᖕᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᐊᑉᓛᓐᔨ.  “ᔫᑳᓐ ᐅᐸᒍᒥᓇᕐᓂᖓ ᐊᒃᓱᐊᓗᒃ ᖁᕕᐊᓇᖅᑐᖅ ᓴᖅᑭᔮᖅᑎᑦᑎᒃᑲᓐᓂᕈᑕᐅᖕᒪᑦ ᔫᑳᓐᒥᒃ ᐊᐅᔭᒃᑯᑦ ᐅᑭᐅᒃᑯᓪᓗ ᐅᐸᒍᒥᓇᖅᓯᑎᓪᓗᒍ ᐳᓚᕋᖅᑎᓄᑦ ᑲᓇᑕᒥᐅᑕᕐᓄᑦ, ᓴᖅᑭᑦᑎᒃᑲᓐᓂᕈᑕᐅᔪᓐᓇᕐᒪᑦ ᐃᖅᑲᓇᐃᔮᓂᒃ ᐊᒻᒪᓗ ᐃᑲᔫᑎᓂᒃ ᓄᓇᑦᑎᓐᓂ ᐱᓯᓂᓯᐅᔪᓄᑦ ᓄᓇᓕᖁᑎᑦᑎᓐᓄᓪᓗ.  

“ᔫᑳᓐᒥᐅᑦ ᖃᐅᔨᒪᑦᑎᐊᖅᑐᑦ ᔫᑳᓐ ᑲᔾᔮᕐᓇᕐᓂᖓᓂᒃ ᐊᒻᒪᓗ ᐱᕚᓪᓕᐅᑎᒃᓴᖃᐅᕐᓂᖓᓂᒃ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐅᑭᐅᖅᑕᖅᑐᓕᕆᓂᕐᒥᒃ ᐱᔭᒃᓴᖅᑖᖅᑎᑕᐅᓯᒪᔪᖅ ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᒥᓂᔅᑕᕆᔭᐅᔪᖅ.  “ᑖᓐᓇ ᐊᖅᑯᑎᒋᓗᒍ, ᑲᓇᑕᒥᐅᑕᐃᑦ ᐅᓄᕐᓂᖅᓴᑦ ᐃᓕᑉᐹᓪᓕᕐᓂᐊᖅᑐᖅ ᑕᑯᒋᐅᕐᓂᐊᖅᑐᓪᓗ ᑕᒪᑐᒥᖓ ᑲᔾᔮᕐᓇᕐᓂᖓᓂᒃ ᐊᒻᒪᓗ ᐃᓄᐃᓪᓚᐅᓂᖓᓂᒃ ᓄᓇᒥᑕ ᐃᓗᐊᓂ.”

“ᔫᑳᓐ ᐅᐸᒍᒥᓇᕐᓂᖓ ᐊᑐᖅᑕᐅᓗᓂ ᐳᓚᕋᖅᑐᓕᕆᔨᓄᑦ ᐱᕙᓪᓕᐊᒃᑲᓐᓂᐅᑕᐅᓂᐊᖅᑐᖅ ᓯᕗᓪᓕᐅᔾᔭᐅᔪᒃᓴᓂᒃ ᓇᓗᓇᐃᔭᐃᓂᕐᒧᑦ ᑕᖅᑲᒃᑯᐊ ᓂᐅᕕᖅᐸᒃᑐᑦ ᐅᔾᔨᕈᓱᓕᒃᑲᓐᓂᕐᓂᐊᕐᒪᑕ ᔫᑳᓐ ᐅᐸᒍᒥᓇᕐᓂᖓᓂᒃ,”  ᐳᓚᕋᖅᑐᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᒥᓂᔅᑕ ᐃᓚᐃᓐ ᑕᐃᓚ ᑕᐃᒪᐃᓕᓚᐅᖅᑐᖅ.  “ᔫᑳᓐ ᒐᕙᒪᒃᑯᖏᑦ ᖁᕕᐊᑉᐳᑦ ᐃᖅᑲᓇᐃᔭᖃᑎᖃᕈᓐᓇᕋᒥᒃ ᑲᓇᑕᒥᒃ ᑕᒪᑐᒥᖓ ᓂᐅᕐᕈᑎᖃᕋᓱᐊᕐᓂᕐᒥᒃ ᐊᒻᒪᓗ ᖁᔭᓕᕗᑦ ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᓱᐃᖏᓐᓇᕐᒪᑕ ᔫᑳᓐᒥᐅᑦ ᐳᓚᕋᖅᑐᓕᕆᔨᖏᓐᓂᒃ.”

ᔫᑳᓐ ᒐᕙᒪᒃᑯᖏᑦ ᑮᓇᐅᔭᖅᑖᖅᑎᑕᐅᓚᐅᖅᑐᑦ $525,000-ᓂᑦ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᖁᑎᖏᓐᓂᓐᖔᖅᑐᓂᒃ ᑕᒪᑐᒧᖓ ᔫᑳᓐ ᐅᐸᒍᒥᓇᕐᓂᖓᓂᒃ ᐱᓕᕆᐊᕆᔭᐅᔪᒧᑦ ᐊᑐᖅᑐᒃᓴᓂᒃ.  ᔫᑳᓐ ᐅᐸᒍᒥᓇᕐᓂᖓ ᓂᐅᕐᕈᑎᖃᕋᓱᐊᕐᓂᕐᒧᑦ ᐅᔾᔨᕈᓱᓕᖅᑎᑦᑎᓂᕐᒥᒡᓗ ᐱᔾᔪᑎᖃᖅᐳᖅ, ᐅᓄᒃᑲᓐᓂᖅᑐᑦ ᑲᓇᑕᒥᐅᑕᐃᑦ ᔫᑳᓐᓕᐊᖅᑎᑕᐅᓇᓱᒃᖢᑎᒃ, ᓲᕐᓗ ᕚᓐᑰᕙᒥᑦ, ᑐᕌᓐᑐᒥᑦ, ᐊᑦᒪᓐᑕᒥᑦ ᐊᒻᒪᓗ ᑳᓪᒍᕆᒥᑦ.  ᐃᓗᓕᖃᐅᕐᓂᐊᖅᑐᖅ ᖃᕆᓴᐅᔭᒃᑯᑦ ᑲᔪᖏᖅᓴᐅᑎᓂᒃ, ᐱᕙᓪᓕᐊᔪᒃᑰᖅᑎᑦᑎᓂᖅ ᓇᓂᑐᐃᓐᓇᖅ, ᐃᖅᑲᓇᐃᔭᕐᕕᓖᑦ ᓂᐅᕐᕈᑎᖃᖅᑎᓪᓗ ᑕᑯᓐᓇᖅᑎᑦᑎᓂᖏᓐᓂ ᐃᓚᐅᓂᖅ ᐊᒻᒪᓗ ᑕᖅᑲᓃᑦᑐᓂᒃ ᐃᖅᑲᓇᐃᔭᖃᑎᖃᕐᓂᒃᑯᑦ. 

ᑖᒃᑯᐊ ᐃᓚᒋᔭᐅᖃᑕᐅᓪᓗᑎᒃ ᑮᓇᐅᔭᖃᖅᑎᑕᐅᓂᐊᖅᑐᑦ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ, ᐊᖅᑯᑎᒋᔭᐅᓪᓗᑎᒃ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ, ᒪᕐᕉᖕᓄᑦ ᐋᖅᑭᒃᑕᐅᓯᒪᔪᖅ, $1 ᐱᓕᐊᖑᓪᓗᑎᒃ ᑲᓇᑕᓕᒫᒧᑦ ᑐᕌᖓᔪᑦ ᑮᓇᐅᔭᓕᐅᕋᓱᐊᕈᑏᑦ ᒪᑭᒃᑲᓐᓂᕈᓐᓇᕐᓂᐊᕐᒪᑕ ᐃᖅᑲᓇᐃᔮᓂᒡᓗ ᓄᐃᑦᑎᓗᑎᒃ ᓄᓇᓖᑦ ᐊᒃᑐᖅᑕᐅᓗᐊᓐᖑᐊᖅᑐᕕᓃᑦ ᑮᓇᐅᔭᑦ ᑲᑕᐅᒥᓯᒪᓚᐅᖅᑎᓪᓗᒋᑦ.  ᐊᕗᖓᐅᔨᓯᒪᔪᑦ ᑮᓇᐅᔭᓕᐅᕋᓱᐊᕈᑏᑦ ᐊᒻᒪᓗ ᐊᕙᑎᒧᑦ ᐃᑲᔫᑏᑦ ᑮᓇᐅᔭᖃᖅᑎᑕᐅᔪᓐᓇᕐᒥᔪᑦ ᑕᒪᑐᒨᓇ.  ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᑮᓇᐅᔭᑦ ᐊᑐᐃᓐᓇᕈᖅᑕᐅᓂᐊᕐᓂᖏᑦ $32.8 ᒥᓕᐊᓐᖏᓐᓃᑦᑐᑦ.

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐃᓚᒋᔭᐅᖃᑕᐅᕗᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᓕᕆᐊᓐᖑᖅᑎᑕᐅᓯᒪᔪᓄᑦ, ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᐱᔭᒃᓴᖅᑖᕆᓯᒪᓪᓗᓂᔾᔪᒃ ᓄᓇᑦᓯᐊᕐᒥ, ᔫᑳᓐᒥ ᐊᒻᒪᓗ ᓄᓇᕗᒻᒥ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᓐᓄᑦ. 

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᒐᒃᓴᓕᐊᕕᓂᖏᓐᓂᒃ ᑕᑯᔪᒪᒍᕕᑦ, ᐅᕘᓇ ᑕᑯᔪᓐᓇᖅᑕᑎᑦ:

ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᓂᒃ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ ᑐᑭᓯᒃᑲᓐᓂᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:
ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᑭᒧᐊᕈᑏᑦ, ᐅᓇ ᑕᑯᒋᐊᕐᓗᒍ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
(819) 997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ
ᑳᑦᓖᓐ ᒪᒃᓚᐅᑦ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᑦ ᐊᖓᔪᖅᑳᖓᑦ
613-995-7766

ᔫᑳᓐ ᒐᕙᒪᒃᑯᖏᑦ
ᐄᒪᓕ ᔭᓐᑯ
ᒥᓂᔅᑕᐃᑦ ᑲᑎᒪᔨᖏᓐᓄᑦ ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
(867) 633-7961