ᐱᒋᐊᕐᓂᕕᓂᐊ - ᔫᑳᓐᒥᐅᑦ ᓇᖕᒥᓂᖅ ᐱᓕᕆᕝᕕᓖᑦ ᐃᑲᔪᖅᓱᖅᑕᐅᓂᖏᑦ

ᐅᑯᐊᒃ ᒪᕐᕉᒃ ᐱᒋᐊᖅᑎᑕᐅᔪᕕᓃᒃ ᑐᕌᖅᑎᑕᐅᔫᒃ ᔫᑳᓐᒥ ᓇᖕᒥᓂᖅ ᐱᓕᕆᕝᕕᓖᑦ ᑐᑭᓯᐅᒪᑦᑎᐊᕐᓂᖅᓴᐅᓕᕐᓂᐊᕐᒪᑕ ᐃᖅᑲᓇᐃᔭᖅᑎᑖᕐᓂᖅᓴᐅᓗᑎᒡᓗ, ᐊᒻᒪᓗ ᐃᓕᓐᓂᐊᖅᑎᑕᐅᔪᓐᓇᕐᓗᑎᒃ ᐊᖅᑯᑎᒋᔭᐅᓗᑎᒃ ᖃᐅᔨᒪᑦᑎᐊᖅᑐᑦ ᐅᖃᓪᓚᒃᑏᑦ.

ᕙᐃᑦᕼᐅᐊᔅᒥᐅᑦ ᓇᖕᒥᓂᖅ ᐱᓕᕆᕝᕕᓖᑦ ᑲᑐᔾᔨᖃᑎᒌᖏᑦᑕ ᓇᖕᒥᓂᖃᖅᑐᓄᑦ ᐱᕚᓪᓕᐅᑎᒃᓴᓕᐊᖓ

ᑮᓇᐅᔭᖃᖅᑎᑕᐅᓪᓗᑎᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐊᑐᖅᖢᒋᑦ ᓄᓇᓖᑦ ᐃᓕᖅᑭᒋᐊᕐᓂᕐᒧᑦ ᑮᓇᐅᔭᑦ, ᕙᐃᑦᕼᐅᐊᔅᒥᐅᑦ ᓇᖕᒥᓂᖅ ᐱᓕᕆᕝᕕᓖᑦ ᑲᑐᔾᔨᖃᑎᒌᖏᑦ ᑮᓇᐅᔭᖅᑖᖅᑎᑕᐅᓂᐊᖅᑐᑦ $192,142-ᓂᒃ.  ᑖᒃᑯᐊ ᓴᖅᑭᑕᐅᔪᑦ ᑮᓇᐅᔭᖃᖅᑎᑕᐅᖃᑦᑕᓚᐅᖅᓯᒪᓂᖏᓐᓄᑦ ᑖᓐᓇ ᑲᔪᓯᓂᖃᑦᑎᐊᖅᑐᖅ, ᐊᖅᑯᑎᒋᓪᓗᒋᑦ ᑐᑭᒧᐊᕈᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᑐᖅᑐᒃᓴᑦ.
ᔫᑳᓐᒥ ᓇᖕᒥᓂᖅ ᐱᓕᕆᕝᕕᓕᖕᓄᑦ ᐃᑲᔫᑏᑦ ᐊᖅᑯᑕᐅᓪᓗᓂ ᔫᑳᓐᒥ ᑲᒻᐸᓂᐅᔪᑦ ᐃᑲᔪᖅᑕᐅᖃᑦᑕᖅᐳᑦ ᐱᓯᓂᓯᓕᕆᓂᐅᑉ ᒥᒃᓵᓄᑦ, ᓂᐅᕐᕈᑎᖃᕈᓐᓇᕐᓂᕐᒥᒃ ᐱᐅᓂᖅᐹᒥᒃ ᐊᑐᕈᓐᓇᕐᓂᐊᕐᒪᑕ.  ᑕᒪᓐᓇ ᐊᖅᑯᑕᐅᓲᖑᕗᖅ ᑲᑉᐸᓂᐅᔪᑦ ᐋᖅᑭᒃᓱᐃᔪᓐᓇᕐᓂᐊᕐᒪᑕ ᐱᓯᓂᓯᓄᑦ ᓂᐅᕐᕈᑎᖃᕋᓱᐊᕐᓂᕐᒧᓪᓗ ᐸᕐᓇᐅᑎᓂᒃ ᑲᑎᒪᔩᑦ ᐊᖅᑯᑎᒋᔭᐅᓪᓗᑎᒃ ᐊᒻᒪᓗ ᐱᓯᓂᓯᒧᑦ ᐃᓕᖅᑭᒃᑕᐅᓯᒪᓪᓗᑎᒃ.  ᑖᒃᑯᐊ ᑲᑎᒪᔩᑦ, ᐃᒃᓯᕚᖅᑎᖃᐅᖅᖢᑎᒃ ᔫᑳᓐᒥᐅᓂᒃ ᐊᒻᒪᓗ ᔫᑳᓐᒥᐅᑕᐅᓐᖏᑦᑐᓂᒃ ᖃᐅᔨᒪᔨᑕᕐᓂᒃ, ᑲᒻᐸᓂᐅᔪᓪᓗ ᑐᓴᐅᒪᑎᑕᐅᖃᑦᑕᖅᖢᑎᒃ ᑐᓴᐅᒪᔭᕆᐊᖃᖅᑕᖏᓐᓂᒃ ᐊᓂᒎᔾᔨᔪᓐᓇᖃᑦᑕᕐᓂᐊᕐᒪᑕ ᐱᓇᐃᓗᑕᓂᒃ ᐊᒻᒪᓗ ᐊᐅᓚᑕᖏᑦ ᐱᕈᖅᐸᓪᓕᐊᑦᑎᐊᕈᓐᓇᕐᓂᐊᕐᒪᑕ.  ᐊᑐᓂ ᓂᕈᐊᖅᑕᐅᔪᑦ ᑲᑉᐸᓃᑦ ᖃᐅᔨᒪᔪᓄᑦ ᐃᑲᔪᖅᑕᐅᖃᑦᑕᕐᓂᖏᑦ ᐊᒻᒪᓗ ᐱᕙᓪᓕᐊᑎᑕᐅᓂᖏᑦ ᐊᕐᕌᒍᓪᓗᐊᖅ ᐊᑯᓂᐅᑎᒋᖃᑦᑕᖅᑐᖅ.  ᑕᒪᓐᓇ ᐊᑐᖅᑎᓪᓗᒍ, ᐱᓯᓂᓯᓕᕆᓂᕐᒧᑦ ᖃᐅᔨᒪᔨᑕᕆᔭᐅᔪᖅ ᐊᒻᒪᓗ ᐱᓕᕆᐊᓄᑦ ᑲᒪᔨᐅᔪᖅ ᑕᒻᒪᖅᓯᒪᔪᖅᓯᐅᖃᑦᑕᖅᐳᑦ, ᐅᖃᐅᔾᔪᐃᔨᐅᖃᑦᑕᖅᐳᑦ ᐊᒻᒪᓗ ᑲᔪᖏᖅᓴᐃᖃᑦᑕᖅᐳᑦ ᑲᒻᐸᓂᐅᔪᒥᒃ ᐊᒻᒪᓗ ᐃᑲᔪᖃᑦᑕᖅᖢᑎᒃ ᐊᑐᓕᖅᑎᑕᐅᕙᓪᓕᐊᑎᓪᓗᒋᑦ ᐊᑐᓕᖁᔭᓕᐊᕆᔭᐅᔪᕕᓃᑦ ᐱᓯᓂᓯᓂᒃ ᖃᐅᔨᒪᔨᑕᕆᔭᐅᔪᑦ ᑲᑎᒪᔨᖏᓐᓂᓐᖔᖅᑐᑦ.
 
ᔫᑳᓐᒥ ᓇᖕᒥᓂᖅ ᐱᓕᕆᕝᕕᓖᖕᓄᑦ ᐃᑲᔫᑏᑦ ᐊᐅᓚᑕᐅᕗᑦ ᕙᐃᑦᕼᐅᐊᔅ ᓇᖕᒥᓂᖅ ᐱᓕᕆᕝᕕᓖᑦ ᑲᑐᔾᔨᖃᑎᒌᖏᓐᓄᑦ, ᑮᓇᐅᔭᖅᑎᒍᑦ ᑮᓇᐅᔭᐅᓐᖏᑦᑐᒃᑯᓪᓗ ᐃᑲᔪᖅᓲᑎᑖᖃᑦᑕᖅᖢᑎᒃ ᑲᑐᔾᔨᖃᑎᒌᓂᑦ, ᔫᑳᓐᒥ ᐱᑐᐃᓐᓇᐅᓐᖏᑦᑐᓕᕆᕝᕕᖕᒧᑦ, ᔫᑳᓐ ᒐᕙᒪᖏᓐᓄᑦ, ᑲᓇᑕᒥᐅᑦ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐊᒻᒪᓗ ᑲᓇᑕᒥ ᖃᐅᔨᓴᐃᔩᑦ ᑲᑎᒪᔨᖏᓐᓄᑦ.
ᕙᐃᑦᕼᐅᐊᔅᒥ ᓇᖕᒥᓂᖅ ᐱᓕᕆᕝᕕᓖᑦ ᑲᑐᔾᔨᖃᑎᒌᖏᑦ ᐱᒻᒪᕆᐅᕗᑦ ᓂᐱᒋᔭᐅᖕᒪᑕ ᓇᖕᒥᓂᖅ ᐱᓕᕆᕝᕕᓕᖕᓄᑦ ᕙᐃᑦᕼᐅᐊᔅ, ᔫᑳᓐᒥ.  ᑖᒃᑯᐊ ᑲᑐᔾᔨᖃᑎᒌᑦ ᐃᑲᔪᖅᓱᐃᔨᐅᕗᑦ ᓇᖕᒥᓂᖅ ᐱᓕᕆᕝᕕᖕᓂᒃ ᐊᒻᒪᓗ ᑕᐅᖅᓰᔾᔪᓯᕐᓂᒃ ᓂᐅᕐᕈᑎᖃᕋᓱᐊᕐᓂᕐᒥᒡᓗ ᐱᐅᓯᕙᓪᓕᐊᑎᑦᑎᓇᓱᒃᖢᑎᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᐃᑲᔪᒃᑲᓐᓂᕈᓐᓇᕐᓂᐊᕐᒪᑕ, ᐃᓄᖕᓄᑦ ᐃᓅᓯᖃᑦᑎᐊᕐᓂᕐᒧᓪᓗ ᕙᐃᑦᕼᐅᐊᔅᒥᐅᓄᑦ.

ᔫᑳᓐᒥ ᐃᖅᑭᓖᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᖓᑦᑕ ᑮᓇᐅᔭᓕᐅᕋᓱᐊᕐᓂᕐᒧᑦ ᑲᑎᒪᕐᔪᐊᕐᓂᖓ

ᔫᑳᓐᒥ ᐃᖅᑭᓖᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᖓᑦ ᑮᓇᐅᔭᖅᑖᖅᑎᑕᐅᓚᐅᖅᑐᑦ $46,046-ᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᑦ, ᐊᖅᑯᑕᐅᓪᓗᓂ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᒎᖅᑐᑦ, ᐊᒻᒪᓗ $96,055-ᓂᒃ ᑮᓇᐅᔭᖅᑖᖅᑎᑕᐅᓚᐅᕆᓪᓗᑎᒃ ᓄᓇᓕᖕᓂ ᐃᑲᔪᖅᓱᕈᑎᓄᑦ ᐱᔨᑦᑎᕈᑎᑎᒍᑦ ᑲᑎᒪᕐᔪᐊᖅᑎᑦᑎᔪᓐᓇᕐᓂᐊᕐᒪᑕ 2009-ᒥ.

ᑮᓇᐅᔭᓕᐅᕋᓱᐊᕐᓂᕐᒧᑦ ᑲᑎᒪᕐᔪᐊᕐᓂᖅ ᑲᑎᑎᑦᑎᓂᐊᖅᑐᑦ ᐃᖅᑭᓕᖕᓂᒃ, ᒐᕙᒪᓂᒃ ᐊᒻᒪᓗ ᔫᑳᓐᒥᐅᑦ ᓇᖕᒥᓂᖅ ᐱᓕᕆᕝᕕᖁᑎᓕᖏᓐᓂᒃ, ᐊᒻᒪᓗ ᐊᕐᕌᓂ ᔫᓂ 2008-ᒥ ᑲᑎᒪᕐᔪᐊᕐᓂᕆᓚᐅᖅᑕᖓᓐᓂ ᐱᒋᐊᖅᑕᐅᓚᐅᖅᓯᒪᔪᓂᒃ ᑲᔪᓯᑎᑦᑎᒋᐊᓪᓚᒃᑲᓐᓂᕐᓂᐊᖅᖢᑎᒃ.  ᑐᕌᒐᖃᓗᐊᓐᖑᐊᕐᓂᐊᖅᑐᑦ ᖃᓄᖅ ᐃᖅᑭᓖᑦ ᓯᕗᒃᑲᖅᑕᖅᑎᓪᓚᕆᐅᖕᒪᖔᖏᑦ ᔫᑳᓐᒥ ᑮᓇᐅᔭᓕᐅᕋᓱᐊᕐᓂᖓᒍᑦ ᐊᒻᒪᓗ ᑲᔪᓯᑦᑎᐊᕐᓂᐊᕐᓂᖏᓐᓄᑦ.

ᑲᑎᒪᕐᔪᐊᓯᒋᐊᕐᓂᐊᖅᑐᑦ ᕙᐃᑦᕼᐅᐊᔅᒥ ᓯᑎᐱᕆ 29-ᖑᖅᐸᑦ ᐊᒃᑑᐸ 1-ᖑᕋᓱᖕᓂᖓᓄᑦ.  ᐱᖓᓱᓄᑦ ᐅᓪᓗᕐᓄᑦ ᑲᑎᒪᕐᔪᐊᕐᓂᖃᖅᑎᓪᓗᒋᑦ ᑲᑎᒪᔭᖅᑐᖅᓯᒪᔪᑦ ᑐᑭᓯᑎᑕᐅᒃᑲᓐᓂᕐᓂᐊᖅᑐᑦ ᑐᓴᐅᒪᓕᕐᓗᑎᒡᓗ ᑮᓇᐅᔭᓕᐅᕋᓱᐊᕐᓂᕐᒥᒃ ᐱᔾᔪᑎᓕᖕᓂᒃ, ᖃᐅᔨᒪᑦᑎᐊᖅᑐᓂᒃ ᐅᖃᓪᓚᒃᑐᖃᕐᓗᓂ ᐊᒻᒪᓗ ᑲᑎᒪᓂᖃᖃᑦᑕᕐᓗᑎᒃ ᐊᒡᒍᖅᑐᖅᓯᒪᓗᑎᒃ.  ᑕᒪᑐᒪᓂ ᐊᕐᕌᒍᒥ ᑲᑎᒪᕐᔪᐊᕐᓂᖓ ᑕᐃᔭᐅᔪᖅ ᐅᓪᓗᒥ ᐃᖅᑭᓖᑦ ᓇᖕᒥᓂᖅ ᐱᓕᕆᕝᕕᖏᓐᓂᒃ ᓴᓐᖏᒃᑎᒋᐊᖅᑎᑦᑎᒃᑲᓐᓂᕐᓂᖅ ᐊᒻᒪᓗ ᑭᖑᕚᖏᑦ ᐃᑲᔪᖅᓱᖅᑕᐅᓂᐊᖅᑐᑦ.

ᐅᓪᓘᖕᓄᑦ ᒪᕐᕉᖕᓄᑦ ᓯᕗᓪᓕᕐᓂ ᑲᑎᒪᕐᔪᐊᕐᓂᖃᕆᐊᓯᒃᐸᑕ ᐅᑯᓄᖓ ᓵᓐᖓᓗᐊᕐᓂᐊᖅᑐᑦ:

• ᓇᖕᒥᓂᖅ ᐱᓕᕆᕝᕕᖕᓂᒃ ᐱᒋᐊᖅᑎᑦᑎᓂᖅ:  ᐱᓯᓂᓯᖃᕐᓂᖅ-ᐳᓚᕋᖅᑐᓕᕆᓂᖅ ᐱᖅᑯᓯᓕᕆᓂᕐᓗ, ᒪᒃᑯᒃᑐᑦ ᐊᒻᒪᓗ ᓇᖕᒥᓂᖅ ᐱᓕᕆᕝᕕᐊᓛᑦ;
• ᓇᖕᒥᓂᖅ ᐱᓕᕆᕝᕖᑦ ᐱᕈᖅᑎᑉᐸᓪᓕᐊᓃᑦ: ᓴᓐᖏᒃᑎᑉᐹᓪᓕᐅᑕᐅᒃᑲᓐᓂᕈᓐᓇᖅᑐᑦ - ᐱᑐᐃᓐᓇᐅᓐᖏᑦᑐᑦ, ᓂᐅᕈᑎᖃᕋᓱᐊᕐᓂᖅ;
• ᑐᓐᖓᕕᖓᓐᓂᒃ ᓴᓐᖏᒃᑎᑉᐸᓪᓕᐊᑎᑦᑎᓂᖅ: ᓯᕗᒃᑲᖅᑕᖅᑎᐅᓂᖅ ᐊᒻᒪᓗ ᑐᑭᒧᐊᕈᑏᑦ;
• ᓇᖕᒥᓂᖅ ᐱᓕᕆᕝᕕᖕᓄᑦ ᑐᑭᒧᐊᕈᑏᑦ; ᐊᒻᒪᓗ
• ᓄᓇ ᐊᒃᖢᓐᖏᔾᔪᑎᒋᕙᕗᑦ.

ᐅᓪᓗᖅ ᐱᖓᔪᖓᓂ ᓵᓐᖓᓗᐊᓐᖑᐊᕐᓂᐊᖅᑐᑦ ᓴᖅᑭᔮᖅᑎᑦᑎᒃᑲᓐᓂᕐᓂᕐᒥᒃ ᐊᒻᒪᓗ ᓇᓗᓇᐃᒃᑯᑦᑎᖅᓯᓂᕐᒥᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕙᓪᓕᐊᔪᓕᕆᔨᓂᒃ ᔫᑳᓐᒥ.  ᐅᖃᐅᓯᖃᕐᓂᐊᖅᑐᑦ ᑲᑐᔾᔨᖃᑎᒌᒃᑖᕐᓂᕐᒥᒃ, ᓇᓗᓇᐃᒃᑯᑕᓂᒃ/ᒪᓕᒐᓂᒃ ᐋᖅᑭᒃᓱᐃᕙᓪᓕᐊᓂᕐᒥᒃ ᐊᒻᒪᓗ ᑲᑐᔾᔨᖃᑎᒌᖕᓂᒃᑰᕐᓗᑎᒃ ᐅᖃᐅᓯᖃᕐᓂᐊᖅᑐᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕙᓪᓕᐊᔪᓕᕆᓂᕐᒧᑦ ᓇᓗᓇᐃᒃᑯᑕᖅᑖᖅᑎᑦᑎᖃᑦᑕᕐᓂᕐᒥᒃ ᔫᑳᓐᒥ.

ᐃᑲᔪᖅᓱᐃᓂᖅ ᓇᖕᒥᓂᖅ ᐱᓕᕆᕝᕕᖕᓂᒃ, ᐃᑲᔪᖅᓱᐃᓂᖅ ᑲᓇᑕᐅᑉ ᑮᓇᐅᔭᓕᐅᕋᓱᐊᖅᑎᖏᓐᓂᒃ

ᐅᑭᐅᖅᑕᖅᑐᒥ, ᓄᓇᓖᑦ ᐃᓕᖅᑭᒋᐊᕐᓂᕐᒧᑦ ᑮᓇᐅᔭᑦ, ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᒎᖅᑐᑦ ᐱᒋᐊᖅᑎᑕᕕᓃᑦ, ᐊᒻᒪᓗ ᓄᓇᓕᖕᓂ ᐃᑲᔪᖅᓲᑎᓄᑦ ᐱᔨᑦᑎᕈᑏᑦ ᐱᓕᕆᐊᓐᖑᖅᑎᑕᐅᓯᒪᔪᑦ ᐊᐅᓚᑕᐅᓪᓗᑎᒃ ᓴᖅᑭᑕᐅᓵᕐᓂᑯᓄᑦ ᐅᑯᓄᖓ Canadian Northern Economic Development Agency (ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ

ᑎᒥᖁᑖ).

ᓄᓇᓖᑦ ᐃᓕᖅᑭᒋᐊᕐᓂᕐᒧᑦ ᑮᓇᐅᔭᑦ ᐊᕐᕌᒎᖕᓄᑦ ᒪᕐᕉᖕᓄᑦ ᐋᖅᑭᒃᑕᐅᓯᒪᕗᖅ, ᓴᖅᑭᑕᐅᓚᐅᖅᓯᒪᓪᓗᓂ ᑮᓇᐅᔭᑦ ᐊᑐᕈᒫᕐᓂᐊᖅᑐᓕᕆᑎᓪᓗᒋᑦ 2009-ᒥ, ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᓐᓂᒃ ᑕᐃᔭᐅᓪᓗᑎᒃ.  ᑐᕌᒐᖃᖅᐳᑦ ᑮᓇᐅᔭᓕᐅᕋᓱᐊᕐᓂᕐᒥᒃ ᓴᖅᑭᑎᑦᑎᒃᑲᓐᓂᕈᒪᓪᓗᑎᒃ ᐃᖅᑲᓇᐃᔮᖃᕐᓂᒃᑯᑦ ᐊᒻᒪᓗ ᐱᔭᕆᐊᑦᑑᑕᐅᖃᑦᑕᖅᑐᑦ ᓄᓇᓕᖕᓂ ᐅᖃᐅᓯᕆᔭᐅᓗᑎᒃ ᐊᑐᑲᐃᓐᓇᖅᑐᒃᓴᑦ ᐊᒻᒪᓗ ᐋᖅᑭᒋᐊᒃᑲᓐᓂᕈᑏᑦ.

ᐊᑐᕐᓗᒋᑦ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ, ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᓄᑖᕈᕆᐊᖅᑎᑕᐅᓚᐅᖅᐳᑦ $90 ᒥᓕᐊᓐᖑᖅᑎᑕᐅᓪᓗᑎᒃ ᐊᕐᕌᒍᓄᑦ ᑕᓪᓕᒪᓄᑦ, ᑲᓇᑕᐅᑉ ᒐᕙᒪᒃᑯᖏᑦ $25 ᒥᓕᐊᓐ ᐅᖓᑖᓃᑦᑐᓂᒃ ᐃᓕᓯᑐᐃᓐᓇᕆᐊᖃᖅᖢᑎᒃ ᔫᑳᓐᒧᑦ ᐊᑐᖅᑐᒃᓴᓂᒃ.  ᓄᓇᓕᖕᓂ ᐃᑲᔪᖅᓲᑎᓄᑦ ᐱᔨᑦᑎᕈᑏᑦ ᑮᓇᐅᔭᖃᖅᑎᑦᑎᕗᑦ ᐊᑕᐅᓯᐊᑐᐃᓐᓇᖅᑐᓄᑦ ᐱᓕᕆᐊᖑᔪᒃᓴᐅᑕᐅᔪᓄᑦ ᐅᕝᕙᓘᓐᓃᑦ ᑲᔪᓰᓐᓇᖅᑐᒃᓴᓄᑦ ᐃᑲᔪᖅᓲᑕᐅᒃᑲᓐᓂᕈᓐᓇᕐᓂᐊᖅᑐᓄᑦ ᐃᖅᑭᓖᑦ ᐊᒻᒪᓗ ᐃᓄᐃᑦ ᓄᓇᓕᖕᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᓐᖑᖅᑎᓯᒪᔭᖏᓐᓄᑦ.
ᑖᒃᑯᐊ ᑮᓇᐅᔭᑦ ᐊᑐᐃᓐᓇᕈᐃᓯᒪᕗᑦ $1 ᐱᓕᐊᓂᒃ ᑲᓇᑕᓕᒫᒧᑦ ᐊᑐᖅᑐᒃᓴᓂᒃ, $32.8 ᒥᓕᐊᓐ ᑖᒃᑯᓇᓐᖔᖅᑐᑦ ᐊᑐᐃᓐᓇᐅᓪᓗᑎᒃ ᐅᑭᐅᖅᑕᖅᑐᒧᑦ ᐊᕐᕌᒎ ᒪᕐᕉᒃ ᐃᓗᐊᓂ.  ᐅᑭᐅᖅᑕᖅᑐᒥᐅᑦ ᒐᕙᒪᖃᕐᕖᑦ, ᐃᖅᑭᓖᑦ ᐊᒻᒪᓗ ᓄᓇᓖᑦ ᒐᕙᒪᖏᑦ, ᒐᕙᒪᐅᓐᖏᑦᑐᑦ ᑎᒥᖁᑎᖏᑦ ᐊᒻᒪᓗ ᐃᓄᐃᑦ ᑮᓇᐅᔭᓕᐅᕋᓱᐊᕐᓂᕐᒥᒃ ᑕᑯᓐᓇᖅᑐᑦ ᐅᑭᐅᖅᑕᖅᑐᒥ ᑖᒃᑯᓂᖓ ᑮᓇᐅᔭᓂᒃ ᐱᓇᓱᒍᓐᓇᖅᑐᑦ.
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᖃᕆᓴᐅᔭᒃᑰᖅᑎᑕᖏᑦ ᑕᑯᒋᐊᕐᓗᒋᑦ ᐱᔾᔪᑎᓖᑦ ᓄᓇᓖᑦ ᐃᓕᖅᑭᒋᐊᕐᓂᕐᒧᑦ ᑮᓇᐅᔭᑦ, ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ, ᐊᒻᒪᓗ ᓄᓇᓕᖕᓂ ᐃᑲᔪᖅᓲᑎᓄᑦ ᐱᔨᑦᑎᕈᑏᑦ ᐅᕘᓇ www.north.gc.ca

ᑲᑎᒪᕐᔪᐊᕐᓂᐅᑉ ᒥᒃᓵᓄᑦ ᑐᑭᓯᒋᐊᒃᑲᓐᓂᕈᒪᒍᕕᑦ ᖃᕆᓴᐅᔭᒃᑯᑦ ᐅᕘᓇ ᑕᑯᒋᐊᕈᓐᓇᖅᑕᐃᑦ www.foundationsconference.ca