ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ ᐃᑲᔪᖅᓱᐃᕗᑦ ᔫᑳᓐᒥᐅᑦ ᓇᖕᒥᓂᖅ ᐱᓕᕆᕝᕕᓕᖁᑎᖏᓐᓂᒃ ᐱᕙᓪᓕᐊᔪᓕᕆᓂᕐᒧᑦ ᐊᒻᒪᓗ ᑮᓇᐅᔭᓕᕆᓂᕐᒧᑦ ᑲᑎᒪᕐᔪᐊᕐᓂᖓᓐᓂᒃ

CanNor-09-06

ᕙᐃᑦᕼᐅᐊᔅ, ᔫᑳᓐ (ᓯᑎᐱᕆ 22, 2009) –ᐃᑦᑐᐃᑦ ᑲᑎᒪᔨᖏᓐᓄᑦ ᐃᓚᒋᔭᐅᖃᑕᐅᔪᖅ ᑖᓂᐊᓪ ᓛᖕ, ᑭᒡᒐᖅᑐᐃᓪᓗᓂ ᓴᒃ ᔅᑐᕌᓪᒥᒃ, ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᒥᓂᔅᑕᕆᔭᐅᔪᒥᒃ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᒪᕐᕉᖕᓂᒃ ᐱᓕᕆᐊᓂᒃ ᑮᓇᐅᔭᓕᐅᕋᓱᐊᕐᓂᕐᒥᒃ ᐃᑲᔪᖅᓱᐃᔫᖕᓂᒃ ᔫᑳᓐᒥ ᑮᓇᐅᔭᖅᑖᖅᑎᑦᑎᓂᐊᕐᓂᕋᖅᖢᓂ.

“ᑖᒃᑯᐊᒃ ᒪᕐᕉᒃ ᐱᓕᕆᐊᒃ ᔫᑳᓐᒥᐅᑦ ᐱᖁᑎᒋᓕᕇᖅᑕᖏᓐᓄᑦ ᐃᑲᔪᖅᓲᑎᒃᑲᓐᓂᑐᐃᓐᓈᒃ, ᑲᔪᖏᖅᓴᐃᓪᓗᓂ ᐱᕙᓪᓕᐊᓂᕐᒥᒃ ᐊᒻᒪᓗ ᑮᓇᐅᔭᓂᒃ ᓴᒡᕙᐃᓂᕐᒥᒃ ᔫᑳᓐᒥᐅᑦ ᑮᓇᐅᔭᓕᐅᕋᓱᐊᕈᑎᖏᓐᓄᑦ, ᐊᒻᒪᓗ ᐃᖅᑲᓇᐃᔮᓂᒃ ᓄᐃᑦᑎᓪᓗᓂ,” ᑕᐃᒪᓐᓇ ᐅᖃᓚᐅᖅᑐᖅ ᐃᑦᑐᐃᑦ ᑲᑎᒪᔨᖏᓐᓄᑦ ᐃᓚᒋᔭᐅᖃᑕᐅᔪᖅ ᓛᖕ.  “ᑕᐃᒪᐃᑦᑐᓂᒃ ᑮᓇᐅᔭᖃᖅᑎᑦᑎᓂᖅ, ᐊᔪᕐᓇᕈᓐᓃᖅᑎᑕᐅᕗᖅ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ, ᓴᓐᖏᒃᑎᑦᑎᒃᑲᓐᓂᖅᐳᖅ ᐱᓕᕆᕝᕖᑦ ᐃᖅᑲᓇᐃᔭᖃᑎᒌᖕᓂᖏᓐᓂᒃ ᐊᒻᒪᓗ ᐃᓕᑉᐹᓪᓕᐅᑕᐅᒃᑲᓐᓂᕐᓂᐊᖅᖢᓂ ᔫᑳᓐᒥᐅᑦ ᐱᓕᕆᕝᕕᓕᖁᑎᖏᓐᓄᑦ.”

“ᔫᑳᓐᒥᐅᑦ ᓄᓇᖃᖅᑳᖅᓯᒪᔪᖁᑎᖏᑦᑕ ᓇᖕᒥᓂᖅ ᐱᓕᕆᕝᕕᖏᑦ ᐊᒃᓱᐊᓗᒃ ᐃᑲᔪᕐᓂᖃᖅᐳᑦ ᑮᓇᐅᔭᓕᐅᕋᓱᐊᕈᑎᓄᑦ ᐅᑭᐅᖅᑕᖅᑐᒥ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕᕆᔭᐅᔪᖅ ᐱᔭᒃᓴᖅᑖᖅᑎᑕᐅᓯᒪᓪᓗᓂ ᐅᑭᐅᖅᑕᖅᑐᒥᒃ ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᒥᓂᔅᑕᐅᓪᓗᓂ.

ᓄᑖᓄᑦ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐃᑲᔪᖅᓱᖅᑕᐅᓂᐊᖅᑐᑦ ᕙᐃᑦᕼᐅᐊᔅᒥᐅᑦ ᓇᖕᒥᓂᖅ ᐱᓕᕆᕝᕕᓖᑦ ᑲᑐᔾᔨᖃᑎᒌᖏᑦ.  ᕙᐃᑦᕼᐅᐊᔅᒥᐅᑦ ᓇᖕᒥᓂᖅ ᐱᓕᕆᕝᕕᓖᑦ ᑲᑐᔾᔨᖃᑎᒌᖏᑦ ᑮᓇᐅᔭᖅᑖᖅᑎᑕᐅᓂᐊᖅᑐᑦ $192,142-ᓂᒃ ᑕᒪᑐᒪᓂ ᐊᕐᕌᒍᒥ ᑲᔪᓯᑦᑎᐊᕐᓂᐊᕐᒪᑦ ᔫᑳᓐᒥᐅᑦ ᐱᓕᕆᕝᕕᖏᑦᑕ ᐱᕙᓪᓕᐊᔪᖁᑖ.  ᔫᑳᓐᒥᐅᑦ ᐱᓕᕆᕝᕕᖏᑦᑕ ᐱᕙᓪᓕᐊᔪᖁᑖ ᖃᐅᔨᒪᔨᑕᕆᔭᐅᖃᑦᑕᖅᐳᑦ ᔫᑳᓐᒥᐅᑦ ᓇᖕᒥᓂᖅ ᐱᓕᕆᕝᕕᓕᖁᑎᖏᓐᓄᑦ ᐱᕈᖅᐸᓪᓕᐊᓪᓚᕆᒍᓇᖅᑐᓄᑦ.  ᐃᑲᔪᖅᓱᐃᖃᑦᑕᖅᐳᑦ ᓇᖕᒥᓂᖅ ᐱᓕᕆᕝᕕᓕᖕᓂᒃ ᖃᐅᔨᒪᔨᑕᕆᔭᐅᓂᕐᒥᒍᑦ ᐊᒻᒪᓗ ᓴᓇᕐᕈᑎᖃᖅᑎᑦᑎᓂᕐᒧᑦ ᑲᔪᓯᓂᖃᑦᑎᐊᒃᑲᓐᓂᕈᓐᓇᕐᓂᐊᕐᒪᑕ.

"ᕙᐃᑦᕼᐅᐊᔅᒥᐅᑦ ᓇᖕᒥᓂᖅ ᐱᓕᕆᕝᕕᓖᑦ ᑲᑐᔾᔨᖃᑎᒌᖏᑦ ᐊᒃᓱᐊᓗᒃ ᖁᔭᓕᕗᑦ ᐃᑲᔪᖅᓱᖅᑕᐅᖏᓐᓇᕋᒥᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᐅᕆᐅᓪ ᓴᓕᕘ, ᐃᒃᓯᕙᐅᑕᕆᔭᐅᔪᖅ ᕙᐃᑦᕼᐅᐊᔅᒥᐅᑦ ᓇᖕᒥᓂᖅ ᐱᓕᕆᕝᕕᓖᑦ ᑲᑐᔾᔨᖃᑎᒌᖏᓐᓄᑦ.  “ᑕᒪᓐᓇ ᑮᓇᐅᔭᖃᖅᑎᑕᐅᓂᖓᓄᑦ ᐱᓕᕆᐊᕗᑦ ᐊᖏᒡᓕᒋᐊᖅᑎᑦᑐᓐᓇᕐᓂᐊᓕᖅᑕᕗᑦ ᐊᒻᒪᓗ, ᐃᑲᔪᖅᑎᖃᕐᓗᑕ ᔫᑳᓐ ᒐᕙᒪᒃᑯᖏᓐᓄᑦ, ᐊᒃᑐᐃᓂᖃᓪᓚᕆᖕᓂᐊᖅᑐᖅ ᐊᔾᔨᒌᓐᖏᓕᒃᑲᓐᓂᕐᓂᐊᕐᒪᑕ ᐱᕈᖅᐸᓪᓕᐊᒃᑲᓐᓂᕈᓐᓇᕐᓂᐊᕐᒪᑕᓗ ᔫᑳᓐᒥ ᑮᓇᐅᔭᓕᐅᕋᓱᐊᕈᑕᐅᔪᓐᓇᖅᑐᑦ."

ᑐᒡᓕᕆᓕᖅᑕᖓᓂ ᐊᕐᕌᒍᑕᒫᖅᓯᐅᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᑲᑎᒪᕐᔪᐊᕐᓂᖅ ᓴᖅᑭᑕᐅᔪᓐᓇᖅᓯᓚᐅᖅᑐᖅ ᑮᓇᐅᔭᖅᑖᖅᑎᑕᐅᒐᒥᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐊᑐᖅᖢᓂᔾᔪᒃ ᓄᑖᓐᖑᕆᐊᖅᑎᑕᐅᓯᒪᔪᑦ ᑐᑭᒧᐊᒃᑎᑦᑎᓂᕐᒧᑦ ᑮᓇᐅᔭᖃᖅᑎᑦᑎᔾᔪᑏᑦ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᐃᓚᒋᔭᐅᖃᑕᐅᓪᓗᓂ Canada's Economic Action Plan  (ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᓐᓄᑦ) ᐊᒻᒪᓗ ᓄᓇᓕᖕᓂ ᐃᑲᔪᖅᓲᑎᓄᑦ ᐱᔨᑦᑎᕈᑎᑎᒍᑦ.

“ᔫᑳᓐᒥ ᐃᖅᑭᓖᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᖓᑦ ᖁᕕᐊᓱᕕᒡᔪᐊᖅᐳᑦ ᑲᑎᖃᑎᖃᕈᓐᓇᕋᒥᒃ ᔫᑳᓐᒥᐅᑦ ᓄᓇᖃᖅᑳᖅᓯᒪᔪᑦ ᓇᖕᒥᓂᖅ ᐱᓕᕆᕝᕕᖏᓐᓂᒃ ᐊᒻᒪᓗ ᐱᕙᓪᓕᐊᔪᓕᕆᓂᕐᒧᑦ ᑭᒡᒐᖅᑐᐃᔨᓂᒃ, ᔫᑳᓐᒥᐅᓪᓗ ᓇᖕᒥᓂᖅ ᐱᓕᕆᕝᕕᓕᖁᑎᖏᓐᓂᒃ ᑕᒪᑐᒧᖓ,” ᑕᐃᒪᓐᓇ ᐅᖃᓚᐅᖅᑐᖅ ᔅᑖᓐᓕ ᓄᐃᓪ, ᐊᖓᔪᖅᑳᕆᔭᐅᔪᖅ ᔫᑳᓐᒥ ᐃᖅᑭᓖᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᖓᓐᓄᑦ.  ᔫᑳᓐᒥᐅᑦ ᓄᓇᖃᖅᑳᖅᓯᒪᔪᖁᑎᖏᑦ ᓇᖕᒥᓂᖅ ᐱᓕᕆᕝᕕᓖᑦ ᑲᔪᓯᓂᖃᑦᑎᐊᕋᓗᐊᖅᑎᓪᓗᒋᑦ, ᐅᓄᒃᑲᓐᓂᖅᑐᓂᒃ ᐱᕕᑖᖅᑎᑕᐅᒃᑲᓐᓂᕈᓐᓇᖅᑐᑦ ᖃᓄᐃᓕᐅᖅᑎᑦᑎᖃᑦᑕᕐᓗᑎᒡᓗ, ᓲᕐᓗ ᐅᓇ ᒫᓐᓇ ᐊᑐᖅᑕᕗᑦ ᐆᒃᑑᑎᒋᓗᒍ, ᐃᓄᐃᑦ ᑲᑎᑎᑕᐅᖃᑦᑕᕈᓐᓇᕐᓂᐊᕐᒪᑕ ᐊᒻᒪᓗ ᓄᑖᓂᒃ ᑮᓇᐅᔭᓕᐅᕋᓱᐊᕈᑎᓂᒃ ᐃᓱᒪᒃᓴᖅᓯᐅᕈᑎᖃᖃᑦᑕᕈᓐᓇᕐᓂᐊᕋᒥᒃ."

ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᐊᕐᓂᖅ ᐱᕙᓪᓕᐊᑎᑕᐅᓂᖓᓄᑦ, ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐊᒻᒪᓗ ᓄᓇᓕᖕᓂ ᐃᑲᔪᖅᓲᑎᓄᑦ ᐱᔨᑦᑎᕈᑏᑦ ᐊᐅᓚᑕᐅᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᑖᒃᑯᐊ ᓴᖅᑭᑕᐅᓵᓚᐅᖅᑐᑦ ᐱᔭᒃᓴᖅᑖᖅᑎᑕᐅᓯᒪᓪᓗᑎᒃ ᑐᑭᒧᐊᒃᑎᑦᑎᓂᕐᒥᒃ ᓴᖅᑭᑦᑎᖃᑦᑕᕐᓂᕐᒥᒡᓗ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓕᐊᕆᓯᒪᔭᖏᓐᓂᒃ ᐊᕕᒃᑐᖅᓯᒪᔪᓂ ᐅᑭᐅᖅᑕᖅᑐᒥ, ᐊᒻᒪᓗ ᐱᓕᕆᐊᖃᕆᓪᓗᑎᒃ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.

ᒐᕙᒪᒃᑯᖏᑦᑕ ᐃᖅᑲᓇᐃᔮᕆᔭᖏᓐᓂᒃ ᓯᕗᒧᐊᒃᑎᑦᑎᕚᓪᓕᐅᑕᐅᓂᐊᖅᑐᖅ ᑲᑎᓐᖓᔾᔫᒥᓕᕐᓂᐊᕐᒪᑕ ᐅᑭᐅᖅᑕᖅᑐᒧᑦ ᑐᑭᒧᐊᕈᑏᑦ ᐊᒻᒪᓗ ᑲᓇᑕᐅᑕᐅᖃᑕᐅᓂᖓ ᐅᑭᐅᖅᑕᖅᑐᖅ ᓇᓗᓇᐃᖅᑕᐅᒃᑲᓐᓂᕐᓗᓂ, ᓴᐳᒻᒥᐅᓯᖅᑕᐅᓗᑎᒡᓗ ᐅᑭᐅᖅᑕᖅᑐᒥ ᐊᕙᑎᓕᕆᓂᕐᒧᑦ ᐃᑦᑕᕐᓂᓴᐃᑦ, ᓴᖅᑭᑎᑕᐅᒃᑲᓐᓂᕐᓗᑎᒃ ᐃᓅᓯᕐᒧᑦ ᑮᓇᐅᔭᓕᐅᕋᓱᐊᕈᑎᓪᓗ ᐊᒻᒪᓗ ᐅᑭᐅᖅᑕᖅᑐᒥ ᐊᐅᓚᑕᐅᓂᖓ ᑎᒍᒥᐊᖅᑕᐅᑦᑎᐊᒃᑲᓐᓂᓕᕐᓗᓂ. 

 

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
819-997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ, ᔫᑳᓐᒧᑦ
ᒪᕆ-ᓗᐃᔅ ᐳᐃᓚᓐ
ᑐᓴᐅᒪᔾᔪᑎᓕᕆᓂᕐᒧᑦ ᑲᒪᔨᑦ ᐊᖓᔪᖅᑳᖓᑦ
(867) 667-3854

ᕙᐃᑦᕼᐅᐊᔅᒥ ᓇᖕᒥᓂᖅ ᐱᓕᕆᕝᕕᓖᑦ ᑲᑐᔾᔨᖃᑎᒌᖏᑦ
ᕆᒃ ᑳᑉ
ᐊᖓᔪᖅᑳᖅ
(867) 667-7545

ᔫᑳᓐᒥᐅᑦ ᐃᖅᑭᓕᖏᑦᑕ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᐃᑦ
ᔅᑖᓐᓕ ᓄᐃᓪ
ᐊᖓᔪᖅᑳᖅ
(867) 334-9432 ᐅᕝᕙᓘᓐᓃᑦ (867) 668-3908