ᐱᒋᐊᕐᓂᕕᓂᐊ

ᑲᓇᑕᐅᑉ ᒐᕙᒪᒃᑯᖏᑦ ᐊᖏᖅᓯᓚᐅᖅᑐᑦ $788,000-ᓂᒃ ᑮᓇᐅᔭᓂᒃ ᒪᕐᕉᖕᓄᑦ ᐃᖅᑭᓖᑦ ᑲᑐᔾᔨᖃᑎᒌᖏᓐᓄᑦ ᐊᑐᖅᑐᒃᓴᐅᑕᐅᓂᐊᖅᑐᓂᒃ ᐱᓕᕆᐊᒃᓴᓂᒃ ᑲᔪᓯᑎᑦᑎᔪᓐᓇᕐᓂᐊᕐᒪᑕ ᐃᖅᑲᓇᐃᔮᓂᒃ ᓴᖅᑭᑦᑎᔾᔪᑕᐅᓂᐊᖅᑐᓂᒃ, ᐳᓚᕋᖅᑏᓪᓗ ᑲᔪᖏᖅᓴᖅᑎᑕᐅᒃᑲᓐᓂᕈᓐᓇᕐᓂᐊᕐᒪᑕ ᓄᓇᑦᓯᐊᕐᒧᐊᕈᒪᒋᐊᒃᓴᖅ ᐊᒻᒪᓗ ᓄᓇᓖᑦ ᐃᓗᐊᓂ ᐱᕈᓐᓇᒃᓴᐃᒃᑲᓐᓂᕈᓐᓇᕐᓂᐊᕐᒪᑕ.

ᑐᓖᑕ ᐃᖅᑭᓖᑦ ᑲᑎᒪᔨᖏᑦ - ᑲᓅᓪ ᐃᒡᓕᓂᖓᓂ ᐅᐊᔭᓂᒃ ᐲᔭᐃᓂᖅ

ᑐᓖᑕᐅ ᐃᖅᑭᓖᑦ ᑲᑎᒪᔨᖏᑦ, ᐃᖅᑲᓇᐃᔭᖃᑎᖃᖅᖢᑎᒃ ᓄᐊᒪᓐ ᕕᐅᓪᔅ ᓄᓇᓕᕆᔨᖏᑦᑕ ᑯᐊᐳᕇᓴᖏᓐᓂᒃ, ᑮᓇᐅᔭᖅᑖᖅᑎᑕᐅᓂᐊᖅᑐᑦ $488,000-ᓂᒃ ᐲᔭᐃᔪᓐᓇᕐᓂᐊᕐᒪᑕ ᐃᒃᓯᓐᓇᑯᕕᓂᕐᓂᒃ ᐅᐊᔭᓂᒃ ᐊᑐᖅᑕᐅᖃᑦᑕᓚᐅᖅᓯᒪᔪᕕᓂᕐᓂᒃ ᓴᓇᔭᐅᕐᖓᓕᖅᑎᓪᓗᒍ ᑲᓅᓪ ᐃᒡᓕᓂᖓ 1940 ᐊᑐᖅᑎᓪᓗᒋᑦ.  ᐅᐊᔭᕕᓂᐊᓗᐃᑦ ᐲᔭᖅᑕᐅᒃᐸᑕ ᐃᒡᓕᓂᒃᑰᖃᑦᑕᖅᑐᑦ ᐅᓗᕆᐊᓇᖅᑐᖅᓯᐅᓐᖏᓐᓂᖅᓴᒻᒪᕆᐊᓘᓕᕐᓂᐊᖅᑐᑦ.  ᑕᒪᒃᑯᓂᖓ ᐱᓕᕆᐊᖃᕐᓂᐊᖅᑐᑦ ᐅᐊᔭᓂᒃ ᐲᔭᐃᓯᒋᐊᕐᓂᐊᖅᑐᑦ ᒪᐃᓕᖓᑕ ᓇᓗᓇᐃᒃᑯᑕᖓᓂ ᐱᒋᐊᕐᓗᑎᒃ 230-ᒥᒃ, ᔫᑳᓐ ᓄᓇᖁᑖᑕ ᑭᒡᓕᖓᑕ ᖃᓂᒋᔮᓂ ᐊᒻᒪ ᐃᓱᓕᕝᕕᖃᕐᓂᐊᖅᖢᓂ ᒪᐃᓕᖓᑕ ᓇᓗᓇᐃᒃᑯᑕᖓᓂ 170-ᒥ ᒑᑦᓕᓐ ᑕᓯᖓᑕ ᖃᓂᒋᔮᓂ.

ᒪᐅᖓᑦᑎᐊᖅ ᑎᑭᐅᒪᔪᑦ ᐃᑲᔫᑏᑦ ᐃᓚᖃᕐᓂᐊᖅᐳᑦ ᓴᖅᑭᑲᐅᑎᒋᔪᓂᒃ ᐊᒻᒪᓗ ᓄᓇᓕᖕᓂ ᐃᖅᑲᓇᐃᔮᒃᓴᓂᒃ ᐊᒻᒪᓗ ᐱᐅᓯᒋᐊᖅᑕᐅᓂᐊᖅᖢᓂ ᓄᓇᓖᑦ ᐃᒡᓕᓂᓕᐊᕈᓐᓇᕈᓯᖏᑦ ᐃᕿᐊᓐᖑᐃᔭᕆᐊᖅᑐᕐᓂᐊᖅᑎᓪᓗᒋᑦ.  ᐊᕗᖓᐅᔨᓯᒪᔪᑦ ᐃᑲᔫᑏᑦ ᐃᓚᖃᕐᓂᐊᖅᑐᑦ ᐊᑦᑕᓇᔾᔭᐃᖅᓯᒪᒃᑲᓐᓂᕐᓂᐊᕐᓂᖏᑦ ᐃᓄᐃᑦ ᐊᒻᒪᓗ ᐆᒪᔪᑦ ᐃᒡᓕᓂᕐᒥᒃ ᐊᑐᖃᑦᑕᖅᑐᑦ, ᐊᒻᒪᓗ ᐱᕕᖃᕐᓂᖅᓴᐅᓕᕐᓂᐊᖅᖢᑎᒃ ᑲᔾᔭᐅᓴᒋᐊᖅᑐᓄᑦ ᑮᓇᐅᔭᓕᐅᕈᑎᖃᒃᑲᓐᓂᕈᓐᓇᖅᓯᓂᐊᕐᓂᖅ ᑕᒪᓐᓇ ᐊᑐᕐᓗᒍ.

ᑕᒪᓐᓇ ᓴᓗᒻᒪᖅᓴᖅᑕᐅᓂᐊᖅᑐᖅ ᐅᖓᓯᒃᑲᓗᐊᖅᑎᓪᓗᒍ, ᐊᑐᖅᑕᐅᒐᔪᒃᑐᖅ ᓵᑑᒥᐅᓄᑦ ᐊᖑᓇᓱᒋᐊᕐᕕᐅᓪᓗᓂ, ᒥᑭᒋᐊᕐᓂᐊᕐᕕᐅᓪᓗᓂ ᐊᒻᒪᓗ ᐃᕿᐊᓐᖑᐃᔭᕆᐊᖅᑐᕐᕕᐅᓪᓗᓂ.  ᐃᒡᓕᓂᐊᑕ ᖃᓂᒋᔮᓂ ᒪᕐᕉᖕᓂᒃ ᐃᒡᓗᕋᓛᖅᑕᓕᒃ, ᐊᑐᖅᑕᐅᖃᑦᑕᖅᖢᑎᒡᓗ ᐊᐅᓪᓚᐃᔾᔨᔨᓄᑦ, ᐊᖑᓇᓱᒋᐊᖅᑐᓄᑦ ᐊᒻᒪᓗ ᑲᔾᔭᐅᓴᒋᐊᖅᑐᖅᓯᒪᔪᓄᑦ.  ᓄᓇᖓ ᑲᔾᔮᕐᓇᕐᓂᖓᓄᑦ ᐊᓃᕋᔭᒍᒻᒪᐃᑦ ᑕᒪᐅᓐᖓᖃᑦᑕᕐᓂᐊᖅᑐᒃᓴᐅᖕᒥᔪᑦ, ᓲᕐᓗ ᐱᓱᔪᒋᐊᖅᑐᖅᓯᒪᔪᑦ, ᑐᒃᑲᕆᐊᓕᒃᑰᖅᑐᑦ, ᓯᑮᕆᐊᖅᑐᕈᒪᔪᑦ, ᖃᒧᑕᐅᔭᕆᐊᕈᒪᔪᑦ ᐊᒻᒪᓗ ᑎᓴᒪᓕᒃᑯᑦ ᑕᒪᐅᓈᖃᑦᑕᕈᒪᔪᑦ.  ᑐᒃᑐᕙᒡᔪᐊᑦ, ᑐᒃᑐᑦ ᐊᒻᒪᓗ ᐊᓯᖏᑦ ᓂᕐᔪᑏᑦ ᑕᒪᐅᓇ ᐃᒡᓕᓂᒃᑰᖃᑦᑕᕐᒥᔪᑦ ᓂᕆᓇᓱᒃᖢᑎᒃ ᐊᒻᒪᓗ ᐃᖏᕐᕋᓕᖅᑎᓪᓗᒋᑦ.

ᑲᓅᓪ ᐃᒡᓕᓂᖓ ᓴᓇᔭᐅᕐᖓᓚᐅᖅᓯᒪᔪᖅ ᓱᓪᓗᑯᑖᓕᐅᖅᐸᓪᓕᐊᓕᖅᑎᓪᓗᒋᑦ 1942 ᐊᒻᒪ 1943 ᐊᑯᓐᓂᖓᓂ, ᐅᖅᓱᐊᓗᖕᓂᒃ ᑭᓂᖅᑐᓂᒃ ᐊᔾᔭᖅᑐᐃᔪᓐᓇᕐᓂᐊᕋᒥᒃ ᓄᐊᒪᓐ ᕕᐅᓪᔅᒥᑦ ᒪᑲᓐᔨᐅᑉ ᖃᖅᑲᖏᑦᑎᒍᑦ ᐊᓛᔅᑲᐅᑉ ᐊᖅᑯᑎᕐᔪᐊᖓᓄᑦ ᔫᑳᓐᒥ.  ᑲᓅᓪ ᐃᒡᓕᓂᖓ ᒫᓐᓇ ᑲᓇᑕᐅᑉ ᒐᕙᒪᒃᑯᖏᑦᑕ ᓄᓇᖁᑖᒎᖅᑐᖅ, ᑕᒪᓐᓇᓗ ᓄᓇᖓ ᓇᓗᓇᐃᖅᑕᐅᓯᒪᓪᓗᓂ ‘ᓱᕈᕐᓇᖅᑐᖃᕐᓂᖓᓂᒃ’ ᐊᒻᒪᓗ ᒫᓐᓇ ᑲᓇᑕᐅᑉ ᒐᕙᒪᒃᑯᖏᓐᓄᑦ ᖃᐅᔨᓴᖅᑕᐅᓕᖅᖢᓂ ᓴᓗᒻᒪᖅᓴᖅᑕᐅᓂᐊᕐᓂᖓᓄᑦ ᐅᐸᓗᖓᐃᖅᑕᐅᕙᓪᓕᐊᓪᓗᓂ.  ᓄᓇᖓ ᓴᓗᒻᒪᖅᓴᖅᑕᐅᕌᓂᒃᐸᑦ, ᓄᓇ ᑐᓐᓂᖅᑯᑕᐅᓂᐊᖅᑐᖅ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ, ᐱᖅᑯᓯᑐᖃᕐᕕᖃᕐᓂᖓ ᐱᔾᔪᑕᐅᓗᓂ ᒥᕐᖑᐃᖅᓯᕕᓐᖑᖅᑎᑕᐅᓂᐊᕐᒪᑦ.  ᐅᐊᔭᐃᑦ ‘ᓱᕈᕐᓇᐅᑕᐅᓂᖏᓐᓂᒃ’ ᑕᐃᔭᐅᔪᓐᓇᓐᖏᒃᑲᓗᐊᖅᑎᓪᓗᒋᑦ, ᐲᔭᖅᑕᐅᒃᐸᑕ ᓴᓗᒻᒪᖅᓴᐃᓂᕐᒧᑦ ᐃᑲᔫᑕᐅᒃᑲᓐᓂᑐᐃᓐᓇᕐᓂᐊᖅᑐᖅ ᐊᒻᒪᓗ ᐃᑲᔪᖅᓱᐃᓂᐊᖅᖢᓂ ᓄᓇᓖᑦ ᓄᓇᐃᑦ ᐊᑐᖅᑕᐅᓂᐊᕐᓂᖏᑦᑕ ᑐᕌᒐᓕᐊᕆᔭᐅᓯᒪᓂᖏᓐᓄᑦ.

ᑲᑦᓘᑏᑦᓯ ᐃᖅᑭᓖᑦ - ᓄᓇᓕᖕᓂ ᐱᕈᓐᓇᒃᓴᐃᓂᖅ ᑲᔾᔮᕐᓇᖅᓴᐃᓂᕐᓗ

ᑲᑦᓘᑏᑦᓯ ᐃᖅᑭᓖᑦ ᑮᓇᐅᔭᖅᑖᖅᑎᑕᐅᓂᐊᖅᑐᑦ $300,000-ᓂᒃ ᑎᓴᒪᓂᒃ ᑲᔪᓯᑎᑦᑎᔪᓐᓇᕐᓂᐊᕐᒪᑕ ᐃᑲᔪᖅᓱᖅᑕᐅᒃᑲᓐᓂᕈᓐᓇᕐᓂᐊᕐᒪᑕ ᐋᓐᓂᐊᖃᕐᓇᓐᖏᓐᓂᖅᓴᐅᔪᒧᑦ, ᐊᑦᑕᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᓄᓇᓕᖕᓂ ᐅᓄᖅᓯᕚᓪᓕᕈᓐᓇᕐᓂᐊᕐᒪᑕ.

ᓄᓇᓕᖕᓂ ᐱᖁᓐᓇᒃᓴᐃᓂᖅ ᑲᔾᔮᕐᓇᖅᓴᐃᓂᕐᓗ: ᑕᒪᓐᓇ ᐱᓕᕆᐊᖑᔪᒪᔪᖅ ᐊᑐᖅᑕᐅᓗᓂ ᑕᑯᒥᓇᖅᓯᑎᑦᑎᒃᑲᓐᓂᕋᓱᖕᓂᐊᖅᑐᑦ ᐃᓐᓄᒃᑕᖅᑐᑦ ᐃᒡᓗᑦ ᖃᓂᒋᔮᓃᑦᑐᓂᒃ, ᓄᓇᖓ ᑲᔾᔮᕐᓇᖅᓴᖅᑕᐅᓗᓂ, ᐱᓱᒡᕖᑦ ᐊᒻᒪᓗ ᐱᕈᖅᑐᕕᓂᕐᓂᒃ ᓄᓇᕋᓂᒡᓗ ᐃᓕᐅᖅᑲᐃᕕᐅᓗᑎᒃ.  ᑕᒪᒃᑯᐊ ᑕᑯᒥᓇᕐᓂᖅᓴᐅᓕᖅᐸᑕ ᐃᑲᔫᑕᐅᓂᐊᖅᑐᖅ ᑲᑦᓘᑏᑦᓯ ᐃᖅᑭᓖᑦ ᓴᖅᑭᔮᖅᑎᑦᑎᓂᕆᔭᖏᓐᓂᒃ ᐳᓚᕋᖅᑎᓄᑦ ᐊᒻᒪᓗ ᐱᓯᓂᓯᓂᒃ ᑲᑐᔾᔨᖃᑎᒌᖕᓂᒃᑰᖃᑎᒋᓇᔭᖅᑕᖏᓐᓄᑦ.

ᓄᓇᓕᖕᓂ ᓂᕿᒃᓴᓂᒃ ᐱᖁᖅᓰᕕᒃ: ᑕᒪᓐᓇ ᐊᑐᖅᑕᐅᓗᓂ 2 ᐄᑯᓂᒃ ᐊᖏᓂᓕᖕᒥᒃ ᓄᓇᓕᖕᓂ ᓂᕿᒃᓴᓂᒃ ᐱᕈᖅᓰᕕᓕᐅᕐᓂᐊᖅᑐᑦ.  ᑖᓐᓇ ᐱᕈᖅᓰᕕᒃ ᐋᓐᓂᐊᖃᓐᖏᓐᓂᖅᓴᐅᓂᕐᒥᒃ ᐃᓅᓯᖃᑦᑎᐊᕐᓂᖅᓴᐅᓂᕐᒧᓪᓗ ᐃᑲᔫᑎᒋᔭᐅᔪᓐᓇᕐᓂᐊᖅᑐᖅ ᑕᕝᕙᓂ ᓄᓇᓕᖕᓄᑦ, ᓯᓚᒦᕋᔭᖕᓂᖅᓴᐅᔪᓐᓇᕐᓂᐊᕐᒪᑕ ᐊᒻᒪᓗ ᐊᑐᐃᓐᓇᖃᕐᓂᖅᓴᐅᓂᐊᕐᒪᑕ ᐊᑭᑭᓐᓂᖅᓴᓂᒃ, ᑎᒥᒧᑦ ᐱᐅᔪᓂᒃ ᓂᕿᓂᒃ.  ᓄᓇᓕᖕᓂ ᐱᕈᖅᓰᔩᑦ ᑮᓇᐅᔭᓕᐅᒐᓛᒍᓐᓇᕐᓂᐊᕐᒥᔪᑦ ᓄᓇᒥᑕ ᐃᓗᐊᓂ ᐱᕈᖅᓯᐊᕕᓂᕐᒥᓂᒃ ᓂᐅᕐᕈᑎᖃᖃᑦᑕᕐᓂᒃᑯᑦ.

ᐃᓄᐃᓪᓚᒥ ᐃᑯᐊᓪᓚᒃᑎᑦᑎᑦᑕᐃᓕᒪᓂᖅ: ᐃᓄᐃᓪᓚᒥ ᐃᑯᐊᓪᓚᒃᑎᑦᑎᑦᑕᐃᓕᒪᓂᒃᑯᑦ ᐱᓕᕆᐊᑦ ᐊᖅᑯᑕᐅᓪᓗᑎᒃ ᓴᐳᒻᒥᐅᓯᖅᓯᓯᒪᐅᑕᐅᓂᐊᖅᐳᖅ ᓇᐹᖅᑐᖃᕐᕕᖕᓂ ᐊᒻᒪᓗ ᓄᓇᓕᖕᓂ ᑮᓇᐅᔭᓕᐅᕋᓱᐊᕈᑕᐅᔪᓐᓇᖅᑐᓂᒃ ᐅᑯᓂᖓ ᐱᓕᕆᐊᖃᕐᓂᒃᑯᑦ: ᓴᓇᓗᑎᒃ ᐊᒻᒪᓗ ᒪᑐᐃᖓᑎᑦᑎᓗᑎᒃ ᖃᑦᑎᕆᔨᓄᑦ ᐊᑐᖅᑕᐅᖃᑦᑕᖅᑐᓂᒃ ᐊᖅᑯᑎᓂᒃ, ᐃᒥᖃᕐᕕᓕᐊᕆᔭᐅᓯᒪᔪᑦ ᐊᒻᒪᓗ ᓴᓇᔭᐅᓯᒪᔪᑦ ᐃᑯᐊᓚᔪᖃᓕᕐᓂᖅᐸᑦ ᓄᖅᑲᕐᕕᓕᐊᖑᓯᒪᔪᑦ; ᓄᑖᓐᖑᕆᐊᖅᑎᑕᐅᓗᑎᒃ ᐃᑯᐊᓚᔪᓂᒃ ᓇᐅᑦᑎᖅᓱᕐᕖᑦ; ᓴᓇᔭᐅᒃᑲᓐᓂᕐᓗᑎᒃ ᖃᑦᑎᕈᑏᑦ ᓄᓇᓯᐅᑏᑦ ᐊᒻᒪᓗ ᐊᓯᖏᑦ ᑲᑦᑎᕆᔨᓄᑦ ᐊᑐᖅᑕᐅᕙᒃᑐᑦ; ᐊᒻᒪᓗ, ᓇᐹᖅᑐᖃᕐᕕᖕᓂ ᐃᑯᐊᓪᓚᒃᑎᑦᑎᑦᑕᐃᓕᒪᔾᔪᑎᓂᒃ ᐱᓕᕆᐊᖃᕐᓗᑎᒃ, ᓲᕐᓗ ᓇᐹᖅᑐᓂᒃ ᐱᖁᓕᓵᖅᑐᓂᒃ ᐊᒻᒪᓗ ᐃᓂᖅᓯᒪᔪᓂᒃ ᓇᐹᖅᑐᓂᒃ ᐲᔭᐃᓗᑎᒃ.

ᑲᔾᔭᐅᓴᒋᐊᖅᑐᓄᑦ ᐊᑐᖅᑕᒃᓴᑦ ᐃᒡᓕᓂᖅ: ᑖᓐᓇ ᐱᓕᕆᐊᖑᔪᒪᔪᖅ ᐊᑐᖅᑕᐅᓗᓂ ᓴᓇᓂᐊᖅᑐᑦ ᐅᐸᒐᕐᓂᖅᑐᒥᒃ 7 ᑭᓚᒦᑕᓂᒃ ᑕᑭᓂᓕᖕᒥᒃ ᐃᒡᓕᓂᕐᒥᒃ ᑲᔾᔭᐅᓴᒋᐊᖅᑐᓄᑦ ᐊᑐᖅᑕᐅᖃᑦᑕᖅᑐᒃᓴᒥᒃ.  ᑕᒪᓐᓇ ᐃᒡᓕᓂᓕᐊᖅ ᐋᖅᑭᒃᑕᐅᓯᒪᓂᐊᖅᑐᖅ ᐊᑐᐃᓐᓇᐅᓂᐊᕐᒪᑦ ᐳᓛᕆᐊᖅᑐᓕᒫᓄᑦ ᖃᖓᑐᐃᓐᓇᖅ, ᐊᒻᒪᓗ ᑕᒪᒃᑮᖕᓄᑦ ᐳᓛᖅᑎᓄᑦ ᓄᓇᖃᖅᑐᓄᓪᓗ ᐊᑐᖅᑕᐅᔪᓐᓇᕐᓂᐊᕐᓗᓂ ᑲᔾᔭᐅᓴᒋᐊᕈᒪᔪᓄᑦ.

 ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ

ᑖᒃᑯᐊ ᐱᓕᕆᐊᖑᔪᒪᔪᑦ ᑮᓇᐅᔭᖃᖅᑎᑕᐅᓂᐊᖅᑐᑦ ᐃᓚᒋᔭᐅᖃᑕᐅᑎᑕᐅᓪᓗᑎᒃ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ, ᐊᖅᑯᑎᒋᔭᐅᓪᓗᑎᒃ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ, ᒪᕐᕉᖕᓄᑦ ᐋᖅᑭᒃᑕᐅᓯᒪᔪᖅ, $1 ᐱᓕᐊᖑᓪᓗᑎᒃ ᑲᓇᑕᓕᒫᒧᑦ ᑐᕌᖓᔪᑦ ᑮᓇᐅᔭᓕᐅᕋᓱᐊᕈᑏᑦ ᒪᑭᒃᑲᓐᓂᕈᓐᓇᕐᓂᐊᕐᒪᑕ ᐃᖅᑲᓇᐃᔮᓂᒡᓗ ᓄᐃᑦᑎᓗᑎᒃ ᓄᓇᓖᑦ ᐊᒃᑐᖅᑕᐅᓗᐊᓐᖑᐊᖅᑐᕕᓃᑦ ᑮᓇᐅᔭᑦ ᑲᑕᐅᒥᓯᒪᓚᐅᖅᑎᓪᓗᒋᑦ. ᐊᒻᒪᓗ ᓴᖅᑭᔮᖅᑎᑦᑎᒃᑲᓐᓂᕐᓗᑎᒃ ᐊᔾᔨᒌᓐᖏᑦᑐᓂᒃ ᑮᓇᐅᔭᓕᐅᕈᑕᐅᔪᓐᓇᖅᑐᓂᒃ ᑕᒪᒃᑯᓄᖓ ᓄᓇᓕᖕᓄᑦ.  ᐊᕗᖓᐅᔨᓯᒪᔪᑦ ᑮᓇᐅᔭᓕᐅᕈᑎᒃᓴᓄᑦ ᐊᕙᑎᒧᓪᓗ ᐃᑲᔫᑎᒃᓴᑦ ᑮᓇᐅᔭᖃᖅᑎᑕᐅᔪᓐᓇᕐᒥᔪᑦ ᑕᕝᕘᓇ.  ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐃᓚᒋᔭᐅᖃᑕᐅᕗᑦ ᐊᔾᔨᒌᓐᖏᑦᑐᓄᑦ ᐱᓕᕆᐊᓐᖑᖅᑎᑕᐅᓯᒪᔪᓄᑦ ᐊᐅᓚᑕᐅᔪᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᓄᓇᑦᓯᐊᕐᒥ, ᔫᑳᓐᒥ ᐊᒻᒪᓗ ᓄᓇᕗᒻᒥ.