ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᓱᐃᕗᑦ ᓄᓇᑦᓯᐊᕐᒥ ᓄᓇᓕᖕᓂ ᐱᕈᓐᓇᒃᓴᐃᓂᐅᓂᐊᖅᑐᓂᒃ, ᑮᓇᐅᔭᖃᖅᑎᑕᐅᓂᐊᖅᑐᓂᒃ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ

CanNor-09-11

ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᓱᐃᕗᑦ ᓄᓇᑦᓯᐊᕐᒥ ᓄᓇᓕᖕᓂ ᐱᕈᓐᓇᒃᓴᐃᓂᐅᓂᐊᖅᑐᓂᒃ, ᑮᓇᐅᔭᖃᖅᑎᑕᐅᓂᐊᖅᑐᓂᒃ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ

ᔭᓗᓇᐃᕝ  (ᓄᕕᐱᕆ 2, 2009) –ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᒪᕐᕉᖕᓂᒃ ᐃᖅᑭᓕᖕᓄᑦ ᐱᓕᕆᐊᕆᔪᒪᔭᖏᓐᓂᒃ ᓄᓇᑦᓯᐊᕐᒥ ᑮᓇᐅᔭᖃᖅᑎᑦᑎᓂᐊᕐᓂᕐᒥᓂᒃ.  ᑖᒃᑯᐊ ᑲᒪᒋᔭᐅᔪᒪᔫᒃ ᑲᔪᓯᑎᑕᐅᔪᓐᓇᕐᓂᐊᖅᑐᑦ ᑮᓇᐅᔭᖃᖅᑎᑕᐅᓂᐊᕐᓂᕐᒥᒍᑦ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ ᐊᒻᒪᓗ ᓴᖅᑭᑦᑎᔾᔪᑕᐅᓂᐊᖅᖢᑎᒃ ᐃᖅᑲᓇᐃᔮᓂᒃ, ᐳᓚᕋᖅᑐᓕᕆᓂᕐᒧᑦ ᑐᕌᖓᔪᓂᒃ ᐊᒻᒪᓗ ᓄᓇᓕᖕᓂ ᐱᕈᓐᓇᒃᓴᐃᓂᐊᕐᓂᕐᒥᒃ.

 “ᑖᒃᑯᐊᒃ ᐱᓕᕆᐊᖑᔪᒪᔫᒃ ᓴᖅᑭᑦᑎᓂᐊᖅᑑᒃ ᓄᓇᓕᖕᓂ ᐃᖅᑲᓇᐃᔮᒃᓴᓂᒃ ᐊᒻᒪᓗ ᐃᑲᔪᖅᓲᑕᐅᒃᑲᓐᓂᕐᓂᐊᖅᖢᑎᒃ ᓄᓇᓕᖕᓂ ᐋᓐᓂᐊᖃᓐᖏᓐᓂᖅᓴᐅᓂᕐᒥᒃ ᐊᒻᒪᓗ ᐊᑦᑕᓇᔾᔭᐃᖅᓯᓯᒪᒃᑲᓐᓂᕐᓂᕐᒥᒃ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ.  “ᑐᓖᑕᒥ ᐃᖅᑭᓖᑦ ᑲᑎᒪᔨᖏᑦ ᐊᒻᒪᓗ ᑲᑦᓘᑏᑦᓰ ᐃᖅᑭᓕᖏᑦ ᐆᒃᑑᑎᒃᓴᑦᑎᐊᕙᐅᕘᒃ ᐅᑭᐅᖅᑕᖅᑐᒥ ᓄᓇᓕᖁᑎᒥᖕᓂᒃ ᒪᑭᒪᑦᑎᔾᔪᑎᒃᓴᖅᓯᐅᖅᑎᓪᓗᒋᑦ ᑮᓇᐅᔭᖅᑎᒍᑦ, ᐊᒻᒪᓗ ᒪᑭᒪᑦᑎᐊᖅᑐᓂᒃ, ᐃᓅᓯᖃᑦᑎᐊᖅᑐᓂᒡᓗ ᓄᓇᓕᖃᕐᓂᕐᒥᒃ.  ᒐᕙᒪᕗᑦ ᐅᐱᑦᑐᑦ ᑕᐃᒪᐃᑦᑐᓂᒃ ᐃᑲᔪᖅᓱᐃᔪᓐᓇᕋᒥᒃ.

“ᓄᓇᓕᖕᓂ ᑐᓐᖓᕕᓖᑦ ᐱᓕᕆᐊᑦ ᐱᐅᓯᕚᓪᓕᖅᑎᑦᑎᓪᓚᕆᖕᓂᐊᖅᑐᑦ ᓄᓇᓖᑦ ᐃᓗᐊᓃᑦᑐᓂᒃ ᐊᒻᒪᓗ ᓄᓇᓕᖕᓂ ᐱᓯᓂᓯᖃᖅᑐᓄᑦ ᐱᕚᓪᓕᐅᑕᐅᓪᓚᕆᖕᓂᐊᖅᖢᑎᒃ, ᐳᓚᕋᖅᑎᓄᓪᓗ ᒪᑐᐃᖅᐹᓪᓕᐅᑕᐅᓂᐊᖅᖢᓂ ᑕᑯᔭᖅᑐᕈᒪᔪᓄᑦ ᓄᓇᑦᓯᐊᕐᒧᑦ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᐅᑭᐅᖅᑕᖅᑐᒥᐅᓂᒃ ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᔨᒃᑯᓐᓄᑦ ᒥᓂᔅᑕ.

ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᑦ ᑮᓇᐅᔭᑦ $488,000 ᑐᓐᓂᖅᑯᑕᐅᓂᐊᖅᑐᑦ ᑐᓖᑕᐅ ᐃᖅᑭᓖᑦ ᑲᑎᒪᔨᖏᓐᓄᑦ, ᐃᖅᑲᓇᐃᔭᖃᑎᖃᕐᓗᑎᒡᓗ ᓄᐊᒪᓐ ᕕᐅᓪᔅ ᓄᓇᓕᕆᓂᕐᒧᑦ ᑯᐊᐳᕇᓴᖏᓐᓂᒃ, ᐲᔭᐃᓂᐊᖅᑐᑦ ᐅᐊᔭᕕᓂᕐᓂᒃ ᑲᓅᓪ ᐃᒡᓕᓂᐊᑕ ᓴᓂᐊᒎᖅᑐᓂᒃ ᐱᑐᖃᕕᓂᕐᓂᒃ.  ᑕᒪᒃᑯᐊ ᐅᐊᔭᕕᓃᑦ ᐃᒃᓯᓐᓇᖅᑕᐅᓂᑯᑦ ᓴᓇᔭᐅᕐᖓᓚᐅᖅᑎᓪᓗᒍ ᑲᓅᓪ ᐃᒡᓕᓂᖓ 1940 ᐊᑐᖅᑎᓪᓗᒋᑦ.  ᐅᐊᔭᕕᓂᕐᓂᒃ ᐲᔭᖅᑕᐅᓯᒪᓕᖅᐸᑕ ᐅᓗᕆᐊᓇᖅᑐᖅᓯᐅᓐᖏᓐᓂᖅᓴᐅᓂᐊᖅᑐᑦ ᐆᒪᔪᑦ ᐊᒻᒪᓗ ᐃᓄᐃᑦ ᐃᒡᓕᓂᕐᒥᒃ ᐊᑐᖃᑦᑕᖅᑐᑦ, ᓄᓇᓕᖕᓂᓗ ᐃᕿᐊᓐᖑᐃᔭᕐᕖᑦ ᐱᐅᓂᖅᓴᐅᓕᕐᓗᑎᒃ, ᐊᒻᒪᓗ ᐃᑲᔪᕈᑕᐅᒃᑲᓐᓂᕐᓂᐊᖅᖢᓂ ᑕᒪᓐᓇ ᐃᒡᓕᓂᖃᕐᕕᒃ ᓴᓇᔭᐅᒃᑲᓐᓂᕈᒪᓐᓂᖅᐸᑦ ᐳᓚᕋᖅᑐᓕᕆᓂᕐᒧᑦ ᑐᕌᖓᔪᓄᑦ ᐊᑐᖅᑕᐅᖃᑦᑕᕐᓂᐊᕐᒪᑦ.

ᑲᑦᓗᑏᑦᓯ ᐃᖅᑭᓕᖏᑦ ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᓂᒃ ᑮᓇᐅᔭᖅᑖᖅᑎᑕᐅᓂᐊᖅᑐᑦ $300,000-ᓂᒃ ᑎᓴᒪᓂᒃ ᓄᓇᓕᖕᓂ ᐱᕈᓐᓇᒃᓴᐅᑎᓂᒃ ᐱᓕᕆᐊᖃᕈᓐᓇᕐᓂᐊᕐᒪᑕ.  ᑖᒃᑯᓄᖓ ᐃᓚᓕᐅᔾᔭᐅᓯᒪᔪᑦ ᓄᓇᐃᑦ ᑲᔾᔮᕐᓇᖅᓴᖅᑕᐅᓂᖏᑦ ᐊᒻᒪᓗ ᓄᓇᓕᖅᓱᖅᑕᐅᓂᖓ ᓄᓇᖁᑖᑕ ᕿᑎᐊᓃᑦᑐᖅ, ᒪᕐᕉᖕᓂᒃ ᐄᑯᓂᒃ ᐊᖏᓂᓕᖕᒥᒃ ᓄᓇᓕᖕᓂ ᓂᕿᒃᓴᓂᒃ ᐱᕈᖅᓰᕕᓕᐅᕐᓗᑎᒃ, ᐃᑯᐊᓪᓚᒃᑎᑦᑎᑦᑕᐃᓕᒪᓂᕐᒧᑦ ᐊᒻᒪᓗ ᓴᐳᒻᒥᐅᓯᖅᓯᓯᒪᔪᓄᑦ ᑐᕌᖓᔪᑦ ᐱᓕᕆᐊᕆᔭᐅᓗᑎᒃ, ᐊᒻᒪᓗ ᓴᓇᔭᐅᒃᑲᓐᓂᕐᓗᓂ 7 ᑭᓚᒦᑕᓂᒃ ᑕᑭᓂᓕᒃ ᐃᒡᓕᓂᖅ.  ᑕᒪᒃᑯᐊ ᐱᓕᕆᐊᖑᔪᒪᔪᑦ ᐃᓚᓕᐅᑎᑐᐃᓐᓇᕐᓂᐊᖅᑐᑦ ᐊᓯᖏᓐᓄᑦ ᓄᓇᓕᖕᓄᑦ ᐱᓕᕆᐊᕆᔭᐅᔪᓄᑦ ᐳᓚᕋᖅᑐᓕᕆᓂᕐᒧᑦ ᓄᓇᓕᖕᓂᓗ ᑮᓇᐅᔭᓕᐅᕈᑕᐅᔪᓐᓇᖅᑐᓄᑦ ᐱᕚᓪᓕᐅᑎᒃᓴᓕᐊᕆᔭᐅᓯᒪᔪᓄᑦ, ᐊᒻᒪᓗ ᐃᑲᔪᕐᓂᖃᓪᓚᕆᖕᓂᐊᖅᖢᓂ ᐋᓐᓂᐊᖃᓐᖏᓐᓂᖅᓴᐅᓂᕐᒧᑦ ᐃᓅᓯᖃᑦᑎᐊᕐᓂᕐᒧᓪᓗ. 

ᑕᒪᒃᑮᒃ ᐱᒋᐊᖅᑎᑕᐅᔪᒪᔫᕐ ᑮᓇᐅᔭᖃᖅᑎᑕᐅᓂᐊᖅᑑᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᖃᕐᕕᖓᒍᑦ. ᐃᓚᒋᔭᐅᖃᑕᐅᑎᑕᐅᓪᓗᑎᒃ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ, ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ, ᒪᕐᕉᖕᓄᑦ ᐋᖅᑭᒃᑕᐅᓯᒪᔪᖅ, $1 ᐱᓕᐊᖑᓪᓗᑎᒃ ᑲᓇᑕᓕᒫᒧᑦ ᑐᕌᖓᔪᑦ ᑮᓇᐅᔭᓕᐅᕋᓱᐊᕈᑏᑦ ᒪᑭᒃᑲᓐᓂᕈᓐᓇᕐᓂᐊᕐᒪᑕ ᐃᖅᑲᓇᐃᔮᓂᒡᓗ ᓄᐃᑦᑎᓗᑎᒃ ᓄᓇᓖᑦ ᐊᒃᑐᖅᑕᐅᓗᐊᓐᖑᐊᖅᑐᕕᓃᑦ ᑮᓇᐅᔭᑦ ᑲᑕᐅᒥᓯᒪᓚᐅᖅᑎᓪᓗᒋᑦ.  ᐊᕗᖓᐅᔨᓯᒪᔪᑦ ᑮᓇᐅᔭᓕᐅᕈᑎᒃᓴᓄᑦ ᐊᕙᑎᒧᓪᓗ ᐃᑲᔫᑎᒃᓴᑦ ᑮᓇᐅᔭᖃᖅᑎᑕᐅᔪᓐᓇᕐᒥᔪᑦ ᑕᕝᕘᓇ. ᑖᒃᑯᐊ ᑮᓇᐅᔭᑦ ᐊᑐᐃᓐᓇᕈᐃᓂᐊᕐᒥᔪᑦ $32.8 ᒥᓕᐊᓐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ.

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᑐᕌᖓᔪᑦ ᐱᔭᒃᓴᖅᑖᕆᔭᐅᖃᑕᐅᓯᒪᕗᓪᓗ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐊᒻᒪᓗ ᓵᓐᖓᓪᓗᐊᖅᖢᑎᒃ ᓄᓇᑦᓯᐊᕐᒧᑦ, ᔫᑳᓐᒧᑦ ᐊᒻᒪᓗ ᓄᓇᕗᒻᒧᑦ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᓐᓄᑦ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᒐᒃᓴᓕᐊᕆᖃᑦᑕᖅᓯᒪᔭᖏᑦᑕ ᐊᔾᔨᖏᓐᓂᒃ ᑕᑯᒋᐊᕈᒪᒍᕕᑦ, ᐅᓇ ᑕᑯᒋᐊᕈᓐᓇᖅᑕᐃᑦ:

ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᓂᒃ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦ ᑐᑭᓯᒃᑲᓐᓂᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:
ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᑭᒧᐊᕈᑏᑦ, ᐅᓇ ᑕᑯᒋᐊᕐᓗᒍ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᒥᓯᐅᓪ ᔭᐅ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
(819) 997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᐅᒪᔾᔪᑎᓕᕆᔨᖏᑦ
ᓄᓇᑦᓯᐊᕐᒧᑦ
ᐲᑐᕋ ᕙᐃᑦ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
(867) 669-2580