ᐃᓅᕕᖕᒥᐅᑦ ᑕᐅᓐᖓ ᓄᒃᑕᒐᕐᒥᒃ ᐱᓐᖑᐊᖅᑐᓂᒃ ᖁᓐᖏᐊᕐᕕᓕᐅᖅᐳᑦ

ᒪᑲᓐᔨ ᑎᐅᓪᑕᐅ ᕿᑎᐊᓃᖢᓂ ᓄᓇᑦᓯᐊᕐᒥ, ᐃᓅᕕᒃ ᑐᑦᑕᕐᕕᓪᓚᕆᐅᕗᑦ ᐱᕙᓪᓕᐊᑎᑦᑎᔪᓄᑦ ᐊᒻᒪᓗ ᐅᐸᒃᑕᐅᒡᒍᓪᓗᓂ ᓂᕆᕕᒡᔪᐊᖅᑐᓄᑦ, ᐱᓐᖑᐊᕆᐊᖅᑐᓄᑦ ᐊᒻᒪᓗ ᖁᕕᐊᓲᑎᖃᖅᑎᑦᑎᔪᓄᑦ.  ᑕᒪᒃᑯᐊ ᓄᓇᓕᖕᓂ ᐱᕙᓪᓕᐊᑎᑕᐅᖃᑦᑕᖅᑐᑦ ᐊᒃᓱᐊᓗᒃ ᐱᒻᒪᕆᐅᕗᑦ ᑕᑯᕋᓐᓂᕆᔭᐅᖃᑦᑕᕐᓂᖏᓐᓄᑦ ᐳᓚᕋᖅᑎᓄᑦ, ᐊᒥᓱᓪᓗ ᐳᓚᕋᖅᑏᑦ ᐸᕐᓇᐅᓯᐅᖃᑦᑕᖅᖢᑎᒃ ᖃᓄᐃᑦᑐᖃᕐᓂᐊᓕᕐᓂᕐᓄᑦ ᓈᒻᒪᖅᑯᓯᖅᓯᓯᒪᓇᓱᒃᐸᒃᖢᑎᒃ ᐊᕕᒃᑐᖅᓯᒪᔪᓂ ᖃᓄᐃᓕᐅᕐᓃᑦ ᑕᑯᓕᒪᓇᓐᖏᓐᓂᖏᑦ ᐱᔾᔪᑕᐅᓪᓗᑎᒃ.

ᐃᓅᕕᐅᑉ ᓯᓚᑖᓃᑦᑐᓂᒃ ᐱᓐᖑᐊᖅᑐᓂᒃ ᖁᓐᖏᐊᕐᕕᖕᓂᒃ ᐊᑐᖅᑐᐊᕆᐊᖃᖃᑦᑕᕐᓂᖅ ᓯᕗᓂᓪᓚᕆᐊᓗᐊᓂ ᑭᓯᐊᓂ ᐋᖅᑭᒃᓱᐃᕙᒌᕆᐊᖃᖃᑦᑕᕐᓂᕐᒧᑦ ᐊᒻᒪᓗ ᐊᓯᖏᓐᓂᒃ ᐅᐸᓗᖓᐃᔭᐃᔭᕆᐊᖃᕐᓂᕐᒧᑦ, ᑮᓇᐅᔭᖅᑐᕐᓂᖏᓐᓄᓪᓗ ᐱᔭᕐᓂᓐᖏᓐᓈᕈᑕᐅᖃᑦᑕᖅᑐᑦ ᐋᖅᑭᒃᓱᐃᔨᓄᑦ.  ᐊᒻᒪᓗ, ᓯᓚᒥ ᐱᓐᖑᐊᖅᑐᑦ ᖁᓐᖏᐊᖅᑕᐅᓂᐊᖅᑎᓪᓗᒋᑦ, ᐱᓐᖑᐊᖅᑏᑦ ᐅᖅᑯᐊᖃᓐᖏᑦᑐᒦᖃᑦᑕᕆᐊᓖᑦ, ᐱᓗᐊᕐᓗᒍ ᐅᑭᐅᖅᑕᖅᑐᒦᒻᒪᑦ ᓯᓚ ᐱᔭᕐᓂᓐᖏᔾᔪᑕᐅᖃᑦᑕᖅᖢᓂ; ᓯᓚ ᐊᓯᔾᔨᐊᕐᔪᑯᓗᒃᑲᓗᐊᖅᐸᑦ ᖃᓄᐃᓕᐅᕐᓂᐊᕐᓂᕆᔭᐅᔪᑦ ᑭᖑᕙᕆᐊᖅᑕᐅᖃᑦᑕᕆᐊᖃᖅᑐᑦ ᐊᒻᒪᓘᓐᓃᑦ ᓄᖅᑲᖅᑎᑕᐅᑦᑎᐊᒻᒪᕆᒃᖢᑎᒃ.

ᓂᕆᐅᒃᑐᒍᑦ ᓄᑖᕐᒥᒃ ᒪᑐᓯᒪᔪᓂᒃ ᐱᓐᖑᐊᖅᑐᓄᑦ ᖁᓐᖏᐊᕐᕕᓕᐅᕈᑦᑕ ᐃᓅᕕᖕᒥᐅᑦ ᐅᐸᒃᑕᐅᖃᑦᑕᖅᓯᓂᐊᕋᓱᒋᓪᓗᑎᒃᑯᑦ ᐊᖏᓂᖅᓴᒻᒪᕆᖕᓄᑦ ᖃᓄᐃᓕᐅᕐᓂᐅᔪᓄᑦ, ᖃᓄᐃᓕᐅᕐᓂᐅᔪᓪᓗ ᑮᓇᐅᔭᖅᑐᕈᑎᖏᑦ ᐊᑭᓪᓕᒋᐊᕐᓗᑎᒃ, ᓯᓚ ᐱᔾᔪᑎᒋᓪᓗᒍ ᑭᖑᕙᕆᐊᖅᑕᐅᔪᑦ ᓄᖅᑲᖅᑎᑕᐅᔭᕆᐊᓕᓪᓗ ᐱᑕᖃᓐᖏᓐᓂᖅᓴᐅᓕᕐᓗᑎᒃ, ᐱᔪᒥᒃᓱᕐᓂᖅᓴᐅᓕᕐᓗᑎᒃ ᑕᐃᒃᑯᐊ ᑕᑯᒃᓴᐅᑎᑦᑎᔭᕆᐊᓖᑦ, ᐊᒻᒪᓗ ᐊᓯᖏᓐᓄᑦ ᐃᕚᓪᓕᐅᑕᐅᓪᓚᕆᖕᓂᐊᖅᖢᓂ ᔨᒻ ᑰ ᒥᕐᖑᐃᖅᓯᕕᖓᓂ.

ᑖᓐᓇ ᓄᒃᑕᒐᖅ ᐱᓐᖑᐊᖅᑐᓄᑦ ᖁᓐᖏᐊᖅᑕᐅᕕᒃ ᐊᑑᑎᖃᑦᑎᐊᖅᑐᒃᑯᑦ ᐃᓱᒪᖅᓲᑕᐅᓂᖅᓴᐅᓗᓂᓗ ᐊᑐᖅᑕᐅᖃᑦᑕᕈᓐᓇᕐᓂᐊᖅᑐᑦ ᖃᓄᐃᓕᐅᕐᓂᐅᔪᓄᑦ.  ᕿᓚᒥᑯᓗᒃ ᒪᑭᑕᐅᔪᓐᓇᖅᑐᖅ, ᓅᑕᐅᔪᓐᓇᖅᖢᓂ ᓄᓇᓯᐅᒻᒧᑦ ᐅᓯᕝᕕᓕᖕᒧᑦ, ᐊᒻᒪᓗ ᖁᓕᖃᖅᖢᓂ ᓴᓂᕋᖃᖅᖢᓂᓗ ᓯᓚ ᐱᐅᓗᐊᓐᖏᑎᓪᓗᒍ ᐅᖅᑯᐊᖃᕐᓂᐊᕐᒪᑕ.  ᐃᓕᓯᕕᖃᐅᕐᒥᔪᖅ ᓂᐱᖃᐅᑎᓄᑦ ᖃᐅᒻᒪᖅᑯᑎᓄᓪᓗ, ᐊᒻᒪᓗ ᓇᓂᓕᒫᖅ ᐊᑐᖅᑕᐅᔪᓐᓇᖅᖢᓂ ᒥᕐᖑᐃᖅᓯᕕᖕᓂ, ᐃᓚᒋᔭᐅᖃᑕᐅᓪᓗᓂ ᔨᒻ ᑰ ᒥᕐᖑᐃᖅᓯᕕᖓ.

ᐃᓅᕕᖕᒥ ᖁᕕᐊᓲᑎᖃᖃᑦᑕᖅᐳᑦ ᐱᖅᑯᓯᑐᖃᕐᒥᓂᒃ ᐊᕐᕌᒍᑕᒫᖅ, ᓲᕐᓗ ᓄᓇᖃᖅᑳᖅᓯᒪᔪᑦ ᐅᓪᓗᖓᓂ, ᐅᑭᐅᖅᑕᖅᑐᒥ ᓴᓇᓐᖑᐊᖅᑏᑦ ᑎᑎᕋᐅᔭᖅᑏᓪᓗ ᑕᑯᒃᓴᐅᑎᑦᑎᓂᖓᑦ ᐊᒻᒪᓗ ᓂᔾᔭᐅᓯᔭᖅᑎᑦᑎᖃᑦᑕᖅᖢᑎᒃ, ᐊᒻᒪᓗ ᐃᓚᒋᔭᐅᖃᑕᐅᓛᖅᖢᑎᒃ ᖁᕕᐊᓲᑎᖃᓕᖅᐸᑕ ᐱᓐᖑᐊᕕᒡᔪᐊᕐᓂᐊᖅᑐᓄᑦ ᖃᐅᒪ ᐃᑯᒪᔪᖅ ᑕᐃᑯᓐᖓᖅᑕᐅᒃᐸᑦ ᓄᕕᐱᕆ 4, 2009-ᒥ.  ᑕᐃᒪᓐᖓᓕᒫᖅ ᖃᓄᐃᓕᐅᕐᓂᐅᔪᑦ ᐃᓅᕕᖕᒥ ᑕᑯᔭᖅᑐᕈᒪᔪᑦ ᐅᓄᖅᓯᕙᓪᓕᐊᖏᓐᓇᖅᑎᓪᓗᒋᑦ, ᑖᓐᓇ ᐱᓐᖑᐊᖅᑐᓄᑦ ᖁᓐᖏᐊᕐᕕᒃ ᐊᒃᓱᐊᓗᒃ ᐊᑐᖅᑕᐅᖃᑦᑕᕐᓂᐊᕐᕙᓗᒃᑐᖅ.

ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ

ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᑦ ᑮᓇᐅᔭᑦ $75,000 ᐊᑐᐃᓐᓇᕈᖅᑎᑕᐅᓂᐊᖅᑐᑦ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᒍᑦ.  ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ (ᑮᓇᐅᔭᑦ ᐊᑐᕈᒫᕐᓂᐊᖅᑐᑦ 2009) ᓄᑖᓐᖑᕆᐊᖅᑎᑕᐅᓯᒪᔪᑦ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ $90 ᒥᓕᐊᓐᓄᑦ ᐋᖅᑭᒃᑕᐅᓯᒪᓪᓗᑎᒃ ᑕᓪᓕᒪᓄᑦ ᐊᕐᕌᒍᓄᑦ.  ᑮᓇᐅᔭᑦ ᐊᑐᐃᓐᓇᕈᖅᑎᑕᐅᓯᒪᔪᑦ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᒍᑦ. ᐊᔾᔨᒌᓕᖅᑎᑕᐅᓪᓗᑎᒃ ᐊᒡᒍᖅᑐᖅᑕᐅᖃᑦᑕᖅᐳᑦ ᐱᖓᓱᓄᑦ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓄᑦ.  ᑐᑭᓯᒋᐊᒃᑲᓐᓂᕈᒪᒍᕕᑦ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᒍᑦ ᑮᓇᐅᔭᖁᑎᓂᒃ ᐊᒻᒪᓗ ᐅᑭᐅᖅᑕᖅᑐᒥ ᑮᓇᐅᔭᓕᐅᕋᓱᐊᕐᓂᐅᑉ ᒥᒃᓵᓄᑦ, ᑕᑯᒋᐊᕐᓂᐊᖅᐸᐃᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᖃᕆᓴᐅᔭᒃᑰᖅᑎᑕᖏᑦ, ᐅᕝᕙ ᑐᕌᕈᑖ: http://www.north.gc.ca

ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᐊᐅᓚᑕᐅᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ, ᓄᑖᑦ ᓴᖅᑭᑕᐅᓵᖅᑐᑦ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐅᑯᐊ ᖃᐅᔨᒃᑲᐃᔾᔪᑏᑦ ᓇᓗᓇᐃᖅᓯᕗᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᑐᑭᒧᐊᕈᑎᓕᐊᕕᓂᖏᓐᓂᒃ, ᐅᑭᐅᖅᑕᖅᑐᖅ ᑲᓇᑕᒥᐅᑕᐅᖃᑕᐅᓂᖓᓂᒃ,  ᓴᐳᒻᒥᐅᓯᖅᓯᓯᒪᓗᑎᒡᓗ ᐅᑭᐅᖅᑕᖅᑐᒥ ᐊᕙᑎᑦᑎᓐᓂ ᐃᑦᑕᕐᓂᓴᕐᓂᒃ, ᓴᖅᑭᔮᖅᑎᑦᑎᒃᑲᓐᓂᕐᓗᑎᒃ ᐃᓅᓯᕐᒧᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᐱᕚᓪᓕᐅᑕᐅᔪᓐᓇᖅᑐᓂᒃ, ᐊᒻᒪᓗ ᐱᐅᓯᒋᐊᖅᑎᑦᑎᓗᑎᒃ ᓴᓐᖏᓂᖅᑖᖅᑎᑦᑎᓗᑎᒡᓗ ᐅᑭᐅᖅᑕᖅᑑᑉ ᐊᐅᓚᑕᐅᓂᖏᓐᓂᒃ.