ᐱᖓᓲᔪᖅᑐᑦ ᓄᓇᓂᒃ ᖃᐅᔨᓴᐃᓃᑦ ᓄᓇᑦᓯᐊᕐᒥ

ᐱᖓᓲᔪᖅᑐᑦ ᓄᓇᓂᒃ ᖃᐅᔨᓴᐃᓂᕐᒧᑦ ᑮᓇᐅᔭᖃᖅᑎᑦᑎᔨᐅᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᓄᓇᑦᓯᐊᕐᒥ, ᐊᒻᒪᓗ ᐱᐅᓯᕚᓪᓕᖅᑎᑦᑎᓂᐊᖅᖢᑎᒃ ᑕᖅᑲᐅᖓ ᐊᑐᐃᓐᓇᕈᖅᑎᑕᐅᓯᒪᔪᑦ ᓄᓇᓄᑦ ᑐᕌᖓᔪᑦ ᑐᓴᐅᒪᔾᔪᑎᓂᒃ; ᓄᑖᓂᒃ ᐱᑐᐃᓐᓇᐅᓐᖏᑦᑐᓂᒃ ᐊᑐᕐᓂᐊᖅᑐᑦ ᓄᓇᒥᐅᑕᓂᒃ ᕿᓂᖅᑎᓪᓗᒋᑦ ᐅᑭᐅᖅᑕᖅᑐᒥ; ᑭᓱᖃᐅᕐᒪᖔᖏᓐᓂᒃ ᓇᓗᓇᐃᔭᐃᓯᒪᓂᐊᕐᒥᔪᑦ ᓄᓇᓕᖕᓄᑦ ᐱᕚᓪᓕᐅᑕᐅᔪᓐᓇᖅᑐᓂᒃ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᒃᓴᓄᑦ ᐊᑐᕋᔭᖅᑐᓂᒃ, ᐊᒻᒪᓗ ᖃᐅᔨᓴᐃᓗᑎᒃ ᓄᓇᓐᖑᐊᓕᕆᓂᕐᒧᑦ, ᓄᓇᓕᕆᓂᕐᒧᑦ ᐊᒻᒪᓗ ᐊᕙᑎᓕᕆᓂᕐᒧᑦ ᑐᕌᖓᔪᑦ ᑐᑭᓯᔭᐅᒃᑲᓐᓂᕐᓂᐊᕐᒪᑕ ᑕᒪᓐᓇ ᓄᓇ ᐊᖏᔪᕐᔪᐊᖑᑎᓪᓗᒍ.  ᑲᑎᓕᒫᕐᓗᒋᑦ ᑕᒪᒃᑯᓄᖓ ᓄᓇᓄᑦ ᖃᐅᔨᓴᐅᑎᓄᑦ ᐊᑐᖅᑐᒃᓴᑦ ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᑦ $1.2 ᒥᓕᐊᓐᖑᓂᐊᖅᑐᑦ.

ᐱᓕᕆᐊᖅ 1: ᑲᒪᒋᔭᐅᓪᓗᐊᑕᖃᕐᓂᐊᖅᑐᑦ ᖃᐃᖅᑐᑦ ᓄᓇᓐᖑᐊᓕᐊᕆᔭᐅᓂᐊᕐᓂᖏᑦ ᓴᕕᒃᓴᓕᓪᓗ
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $422,000

ᖃᐃᖅᑐᑦ ᓄᓇᓐᖑᐊᓕᐊᕆᔭᐅᓂᐊᖅᑎᓗᒋᑦ ᐊᑕᐅᓯᐅᓐᖏᑦᑐᓂᒃ ᑕᒪᒃᑯᓄᖔᖅᑐᓂᒃ ᖃᐅᔨᓴᐃᓂᐊᖅᑐᑦ ᓴᕕᒃᓴᖃᕐᒪᖔᖏᑦ ᖃᐅᔨᓴᖅᑕᐅᓯᒪᓗᐊᓐᖏᑦᑐᓂ ᓄᓇᓐᖑᐊᓕᐊᕆᔭᐅᓯᒪᓐᖏᓗᐊᖅᑐᓂᓗ ᒪᑲᓐᔨᐅ ᖃᖅᑲᖏᓐᓃᑦᑐᓂᒃ.  ᖃᐅᔨᓴᖅᑕᐅᖃᑕᐅᓂᐊᖅᑐᑦ ᑐᑭᓯᓇᓱᒡᓗᑎᒃ ᖃᓄᐃᑦᑐᓂᒃ ᓴᕕᒃᓴᖃᐅᕐᒪᖔᖏᑦ, ᖃᐅᔨᓴᖅᑕᐅᓗᑎᒃ ᐊᔾᔨᒌᐸᓗᖕᓂᒃ ᑕᐅᑦᑐᓖᑦ ᐅᔭᖅᑲᑦ.

ᓵᓐᖓᔭᐅᓗᐊᓐᖑᐊᕐᓂᐊᖅᑐᑦ ᓄᓇᓐᖑᐊᓕᐅᕐᓗᑎᒃ ᖃᐅᔨᓴᖅᑕᐅᔪᒃᓴᓂᒡᓗ ᓄᐊᑦᑎᓗᑎᒃ ᔭᓗᓇᐃᕝ ᖃᓂᒋᔮᓃᑦᑐᓂᒃ (ᒎᓗᓯᐅᕐᓗᑎᒃ) ᐊᒻᒪᓗ ᐸᓛᔅᕗᐊᑦᒦᑦᑐᓂ (ᓴᕕᒃᓴᓖᑦ ᑕᑯᓕᒪᓇᓐᖏᑦᑐᓂᒃ).  ᓴᕕᒃᓴᖅᓯᐅᕐᓂᐊᖅᑐᑦ ᓄᓇᓂ ᓇᓗᓇᐃᖅᑕᐅᓯᒪᓐᖏᑦᑐᓂ ᐱᔪᓐᓇᐅᑎᑖᕐᕕᐅᓯᒪᓐᖏᑦᑐᓂᓗ ᖃᐅᔨᓴᕐᕕᐅᕙᓪᓕᐊᓂᖅᓴᐅᓕᖁᓪᓗᒋᑦ.  ᑕᒪᒃᑮᒃ ᐱᓕᕆᐊᖑᑎᓪᓗᒋᑦ ᓄᓇᑦᓯᐊᕐᒥ ᓄᓇᓕᕆᔨᒃᑯᑦ ᑎᑎᕋᕐᕕᖓᑦ/ᓯᓚᑦᑐᖅᓴᕐᕕᒡᔪᐊᑦ/ᓴᓇᔨᓪᓚᕇᑦ ᑲᑐᔾᔨᖃᑎᒋᔭᐅᓗᑎᒃ.

ᐱᓕᕆᐊᖅ 2: ᐊᕕᒃᑐᖅᓯᒪᔪᓂ ᑰᒐᓛᓃᑦᑐᑦ ᐅᔭᖅᑲᑦ ᐊᒻᒪᓗ ᐃᒪᕐᒦᑦᑐᑦ ᓴᕕᒃᓴᖃᕐᓂᖏᑦᑕ ᖃᐅᔨᓴᖅᑕᐅᓂᖏᑦ
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $500,000

ᑕᒪᒃᑯᐊ ᖃᐅᔨᓴᖅᑕᐅᓂᖏᑦ ᐱᔾᔪᑎᖃᓗᐊᖅᑐᑦ ᑐᑭᓯᒃᑲᓐᓂᕈᒪᓪᓗᑎᒃ ᓄᓇᖏᓐᓂᒃ ᐊᒻᒪᓗ ᐊᕙᑎᒧᑦ ᖃᐅᔨᒪᔭᐅᔪᑦ ᓄᓇ ᐊᖏᔪᖅ ᐱᔾᔪᑕᐅᓗᓂ.  ᑕᒪᒃᑯᐊ ᖃᐅᔨᓴᖅᑕᐅᓂᖏᑦᑎᒍᑦ ᓇᒡᕚᕋᓱᖕᓂᐊᖅᑐᑦ ᓄᑖᓂᒃ ᓴᕕᒃᓴᓂᒃ, ᑲᑉᐸᓂᐅᔪᑦ ᑕᒪᒃᑯᓂᖓ ᕿᓂᓲᑦ ᕿᓂᕐᕕᒃᓴᖅᑖᕐᓂᐊᕐᒪᑕ.  ᑕᒪᒃᑯᓂᖓ ᖃᐅᔨᓴᐃᓂᒃᑯᑦ ᑐᑭᓯᕚᓪᓕᕐᓂᐊᕐᒥᔪᑦ ᐊᕙᑎᒧᑦ ᑐᕌᖓᔪᓂᒃ, ᐊᑐᖅᑕᐅᔪᓐᓇᕐᓂᐊᖅᑐᓂᒃ ᖃᓄᐃᑦᑐᓂᒃ ᒪᓕᒐᖅᑎᒍᑦ ᐊᐅᓚᑕᐅᔪᓐᓇᕐᓂᐊᕐᒪᖔᖏᑦ ᐱᓕᕆᐊᖑᕙᓪᓕᐊᓕᖅᑎᓪᓗᒋᑦ.

ᐱᓕᕆᐊᖅ 3: ᖃᕆᓴᐅᔭᓕᕆᓂᖅ
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $105,000

ᑐᕌᒐᖃᓗᐊᖅᑐᒍᑦ ᓄᓇᑦᓯᐊᕐᒧᑦ ᑐᕌᖓᔪᑦ ᑎᑎᖅᑲᑦ ᖃᐅᔨᒪᔾᔪᑏᑦ ᑐᓐᓂᖅᑯᑎᒋᔪᒪᓪᓗᑎᒃᑯᑦ ᓯᕗᓂᒃᓴᒥ ᑮᓇᐅᔭᓕᐅᕋᓱᐊᖅᑎᐅᓂᐊᖅᑐᒍᑦ.  ᓄᓇᑦᓯᐊᕐᒥ ᓄᓇᓐᖑᐊᓕᕆᓂᕐᒧᑦ ᑎᑎᕋᕐᕕᒃ ᐊᐅᓚᑦᑎᖃᑦᑕᖅᐳᖅ ᓯᐊᒻᒪᒃᑎᕆᔨᐅᓪᓗᑎᒡᓗ ᑕᒪᒃᑯᓄᖓ ᑐᕌᖓᔪᓂᒃ ᑐᓴᐅᒪᔾᔪᑎᓂᒃ ᐱᖓᓱᐃᓕᖓᔪᑦ ᑐᒃᓯᕋᐅᑏᑦ ᐊᑐᖅᑕᐅᓪᓗᑎᒃ:  ᓄᓇᑦᓯᐊᕐᒥ ᓄᓇᓐᖑᐊᓕᕆᓂᖅ ᖃᕆᓴᐅᔭᒃᑰᖅᑎᑕᐅᓯᒪᔪᖅ (NT Go Map) ᐊᒻᒪᓗ ᐊᓯᖏᑦ ᖃᕆᓴᐅᔭᒃᑰᖅᑎᑕᑦ ᐋᖅᑭᒃᓱᖅᑕᐅᓯᒪᓂᖏᑦ;  Gateway, ᖃᕆᓴᐅᔭᒃᑰᖅᑎᑕᐅᓯᒪᖕᒥᔪᖅ ᑎᑎᖅᑲᓄᑦ ᓯᐊᒻᒪᒃᑎᕐᕕᒃ ᑕᑕᑎᒐᒃᓴᓕᒡᓗ; ᐊᒻᒪᓗ NORMIN, ᖃᕆᓴᐅᔭᒃᑰᖅᑎᑕᐅᓯᒪᔪᖅ ᓇᓗᓇᐃᔭᐃᓯᒪᓪᓗᓂ ᓇᓂ ᓴᕕᒃᓴᖅᑕᖃᐅᕐᒪᖔᖅ ᐊᒻᒪᓗ ᑐᑭᓯᒋᐊᒃᑲᓐᓂᕐᕕᒃ.  ᑖᒃᑯᐊ ᐱᖓᓱᐃᓕᖓᔪᑦ ᑕᐃᒪᓐᖓᓕᒫᖅ ᓄᑖᓐᖑᕆᐊᖅᑎᑕᐅᖃᑦᑕᕆᐊᓖᑦ ᐱᐅᓯᒋᐊᖅᑎᑕᐅᖏᓐᓇᖃᑦᑕᕐᓗᑎᒡᓗ ᑐᓴᐅᒪᔾᔪᑏᑦ ᐅᓪᓗᒥᒧᑦ ᐊᓐᖑᑎᓯᒪᐃᓐᓇᕐᓂᐊᕐᒪᑕ ᐊᒻᒪᓗ ᐊᐅᓚᑕᐅᑦᑎᐊᕐᓗᑎᒃ ᓄᓇᑦᓯᐊᖅ ᓂᕈᐊᖅᖠᖅᑕᐅᖅᑳᖃᑦᑕᕐᓂᐊᕐᒪᑦ ᓴᕕᒃᓴᖅᓯᐅᖅᑎᓄᑦ.

ᐱᓕᕆᐊᖅ 4: ᓄᓇᓐᖑᐊᓕᕆᓂᕐᒨᖓᔪᑦ ᑎᑎᖅᑲᖁᑏᑦ ᑐᑭᓕᐅᖅᑕᐅᓂᖏᑦ
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $20,000

ᐊᑐᖅᖢᒋᑦ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ, ᑕᓪᓕᒪᐃᖅᖢᑎᒃ ᖃᖓᑕᓲᒃᑯᑦ ᓄᓇᒥᒃ ᕿᒥᕐᕈᓇᓚᐅᖅᑐᑦ ᖃᐅᔨᓴᖅᑕᐅᓯᒪᓐᖏᓗᐊᓐᖑᐊᖅᑐᓂᒃ ᓴᕕᒃᓴᖃᕈᓇᖅᑐᓂᒃ ᐅᕝᕙᓘᓐᓃᑦ ᐅᖅᓱᐊᓗᒃᓯᐅᕐᕕᐅᔪᓐᓇᖅᑐᓂᒃ.  ᑕᐃᒪᐃᑦᑐᑦ ᖃᐅᔨᓴᐃᓃᑦ ᐅᓪᓗᒥᐅᓕᖅᑐᖅ ᓄᓇᓐᖑᐊᓕᕆᓂᒃᑯᑦ ᑭᑭᑕᐅᓯᒪᔪᓂᒃ ᑲᒪᒋᔭᖃᖅᐳᑦ ᓄᓇᑦᓯᐊᕐᒧᑦ ᑐᕌᖓᔪᓂᒃ.  ᓄᑖᓂᒃ ᑮᓇᐅᔭᓂᒃ ᐊᑐᕐᓗᑎᒃ, ᑕᒪᒃᑯᐊ ᓄᐊᑕᐅᔪᑦ ᖃᐅᔨᓴᖅᑕᐅᔪᓐᓇᖅᓯᔪᑦ ᐊᒻᒪᓗ ᐱᓕᕆᐊᕆᔭᐅᒃᑲᓐᓂᕐᓗᑎᒃ ᓄᑖᓂᒃ ᕿᓂᕐᕕᐅᔪᓐᓇᖅᑐᓂᒃ ᓇᓗᓇᐃᔭᐃᔪᓐᓇᕐᓂᐊᕋᒥᒃ.

ᐱᓕᕆᐊᖅ 5: ᓄᑖᑦ ᐱᓕᕆᐊᑦ ᐊᒻᒪᓗ ᖃᐅᔨᓴᖅᑕᐅᓂᖏᑦ
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $20,000

ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᓂᕆᐅᓇᓐᖏᑦᑐᓄᑦ ᐱᓕᕆᐊᓄᑦ, ᓲᕐᓗ ᐅᔭᖅᑲᑦ ᓇᒡᕚᖅᑕᐅᔪᑦ ᓄᓇᓐᖑᐊᓕᕆᑎᓪᓗᑕ ᖃᓄᑎᒋ ᐱᑐᖃᐅᖕᒪᖔᖏᓐᓂᒃ ᖃᐅᔨᓴᖅᑕᐅᓗᑎᒃ.  ᑮᓇᐅᔭᑦ ᐊᑐᖅᑕᐅᓂᐊᕐᒥᔪᑦ ᓯᓚᑦᑐᖅᓴᕐᕕᒡᔪᐊᕐᓂ ᑕᓯᕐᓂᓐᖔᖅᑐᓂᒃ ᖃᐅᔨᓴᒐᒃᓴᓂᒃ ᓄᐊᑦᑎᓂᖏᓐᓄᑦ, ᖃᐅᔨᓴᐃᑎᓪᓗᒋᑦ ᑲᓐᑐᐃᑐᒥᑦ ᑎᐸᒧᑦ ᑎᑭᓪᓗᒍ ᑕᓯᒃᑯᑦ ᐊᖅᑯᓯᐊᕆᔭᐅᓯᒪᔪᒥᒃ.  ᑖᓐᓇ ᑕᓯᒃᑯᑦ ᐊᖅᑯᑦ ᐱᕐᔪᐊᒻᒪᕆᐊᓗᒃ ᓄᓇᑦᑎᐊᕐᒥᐅᑦ ᑮᓇᐅᔭᓕᐅᕋᓱᐊᕈᓯᖏᓐᓄᑦ.

ᐱᓕᕆᐊᖅ 6: ᐱᑐᐃᓐᓇᐅᓐᖏᑦᑐᓕᕆᔩᑦ ᐃᑲᔪᖅᑎᒋᔭᐅᓂᐊᕐᓂᖏᑦ
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ: $135,000

ᓄᓇᓐᖑᐊᓕᕆᓂᕐᒥᒃ ᐱᓕᒻᒪᒃᓯᒪᒻᒪᕆᒃᑐᖅ ᐊᒻᒪᓗ ᑐᓴᐅᒪᔾᔪᑎᓂᒃ ᐊᐅᓚᑦᓯᔨᐅᑉ ᐃᑲᔪᖅᑎᖓ ᐊᑕᐅᓯᐅᓐᖏᑦᑐᓂᒃ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᑮᓇᐅᔭᖁᑎᖏᓐᓂᒃ ᐊᑐᖅᑐᓂᒃ ᐊᑕᐅᓯᐅᓐᖏᑦᑐᓂᒃ ᑲᒪᔨᐅᖃᑕᐅᓂᐊᖅᑐᑦ.

ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ

2009-10-ᒥ ᓄᓇᓐᖑᐊᓕᕆᓂᖅ ᑮᓇᐅᔭᖃᖅᑎᑕᐅᔪᖅ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ.  ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦ (ᑮᓇᐅᔭᑦ ᐊᑐᕈᒫᕐᓂᐊᖅᑐᑦ 2009) ᓄᑖᓐᖑᕆᐊᖅᑎᑦᑎᕗᑦ ᑮᓇᐅᔭᓂᒃ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᒎᖅᑐᓂᒃ, $90 ᒥᓕᐊᓐᖑᓪᓗᑎᒃ ᐊᕐᕌᒍᓄᑦ ᑕᓪᓕᒪᓄᑦ.  ᑮᓇᐅᔭᑦ ᐊᑐᐃᓐᓇᐅᔪᑦ ᐊᒡᒍᖅᑐᖅᑕᐅᖃᑦᑕᖅᐳᑦ ᐱᖓᓱᓄᑦ ᐅᑭᐅᖅᑕᖅᑐᒥ ᒐᕙᒪᖃᕐᕕᐅᔪᓄᑦ.  ᑐᑭᓯᒋᐊᒃᑲᓐᓂᕈᒪᒍᕕᑦ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ, ᖃᐅᔨᒋᐊᕈᓐᓇᖅᑕᐃᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᖃᕆᓴᐅᔭᒃᑰᖅᑎᓯᒪᔭᖏᑦ, ᐅᕘᓇ: www.north.gc.ca .

ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᐊᐅᓚᑕᐅᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐅᑯᐊ ᖃᐅᔨᒃᑲᐃᔾᔪᑏᑦ ᓇᓗᓇᐃᖅᓯᕗᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᑐᑭᒧᐊᕈᑎᓕᐊᕕᓂᖏᓐᓂᒃ, ᐅᑭᐅᖅᑕᖅᑐᖅ ᑲᓇᑕᒥᐅᑕᐅᖃᑕᐅᓂᖓᓂᒃ,  ᓴᐳᒻᒥᐅᓯᖅᓯᓯᒪᓗᑎᒡᓗ ᐅᑭᐅᖅᑕᖅᑐᒥ ᐊᕙᑎᑦᑎᓐᓂ ᐃᑦᑕᕐᓂᓴᕐᓂᒃ, ᓴᖅᑭᔮᖅᑎᑦᑎᒃᑲᓐᓂᕐᓗᑎᒃ ᐃᓅᓯᕐᒧᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᐱᕚᓪᓕᐅᑕᐅᔪᓐᓇᖅᑐᓂᒃ, ᐊᒻᒪᓗ ᐱᐅᓯᒋᐊᖅᑎᑦᑎᓗᑎᒃ ᓴᓐᖏᓂᖅᑖᖅᑎᑦᑎᓗᑎᒡᓗ ᐅᑭᐅᖅᑕᖅᑑᑉ ᐊᐅᓚᑕᐅᓂᖏᓐᓂᒃ.