ᑲᓇᑕᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦ ᓄᓇᑦᓯᐊᕐᒥ ᓄᓇᓂᒃ ᖃᐅᔨᓴᐃᓂᕐᒥᒃ ᐃᑲᔪᖅᓱᐃᕗᑦ

CanNor-09-009

ᔭᓗᓇᐃᕝ, ᓄᓇᑦᓯᐊᖅ (ᐊᒃᑑᐸ 14, 2009) –  ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᐱᖓᓲᔪᖅᑐᓂᒃ ᓄᓇᓂᒃ ᖃᐅᔨᓴᐃᓂᐅᓂᐊᖅᑐᓂᒃ ᓄᓇᑦᓯᐊᕐᒥ.  ᑕᒪᓐᓇ ᓴᖅᑭᑦᑐᓐᓇᖅᓯᓚᐅᖅᑐᖅ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦᑎᒍᑦ ᐊᒻᒪᓗ ᓯᕗᓂᒃᓴᒥ ᓄᓇᒥᐅᑕᓂᒃ ᕿᓂᕐᓂᕐᒧᑦ ᑮᓇᐅᔭᓂᒃ ᓴᒡᕙᐃᑎᑦᑎᔾᔪᑕᐅᒃᑲᓐᓂᕈᓐᓇᕐᓂᐊᖅᖢᓂ ᓄᓇᑦᓯᐊᕐᒦᑦᑐᓂᒃ.

“ᑐᑭᓯᐅᒪᒃᑲᓐᓂᓕᕈᑦᑕ ᓄᓇᑦᓯᐊᑉ ᓄᓇᖁᑖᓂᒃ ᐊᔾᔨᐅᓐᖏᑦᑐᒥᒃ ᐃᑲᔪᖅᓲᑕᐅᒃᑲᓐᓂᕈᓐᓇᕐᓂᐊᖅᑐᖅ ᐊᕗᖓᐅᔨᒃᑲᓐᓂᕐᓂᐊᕐᒪᑦ ᑮᓇᐅᔭᓕᐅᕋᓱᐊᕈᑕᐅᔪᓐᓇᖅᑐᖅ ᑕᒫᓂ ᓄᓇᑦᓯᐊᕐᒥ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ.  “ᑕᒪᒃᑯᐊ ᐱᓕᕆᐊᕆᔭᕗᑦ ᐱᕕᑖᖅᑎᑦᑎᒃᑲᓐᓂᕐᓂᐊᖅᑐᑦ ᓄᑖᓂᒃ ᐅᔭᕋᒃᓯᐅᕐᓂᕐᓂᒃ ᓄᓇᑦᓯᐊᕐᒥ, ᐊᒻᒪᓗ ᐅᑭᐅᖅᑕᖅᑐᒥᐅᓄᑦ ᐃᖅᑲᓇᐃᔮᒃᓴᓂᒃ ᓄᐃᑦᑎᓂᐊᕆᓪᓗᑎᒃ.”

“ᓄᓇᒥᐅᑕᓂᒃ ᐱᕙᓪᓕᐊᑎᑦᑎᓂᖅ ᐱᒻᒪᕆᐅᕗᖅ ᐃᓚᒋᔭᐅᖃᑕᐅᑎᓪᓗᒍ ᓄᓇᑦᓯᐊᕐᒥ ᑮᓇᐅᔭᓕᐅᕋᓱᐊᕐᓂᕐᒧᑦ.  ᑖᒃᑯᓂᖓ ᑮᓇᐅᔭᓂᒃ ᓴᒡᕙᐃᓂᖅ ᐱᕚᓪᓕᐅᑕᐅᓂᐊᕐᒥᔪᖅ ᓄᓇᓕᖕᓂ ᖃᐅᔨᒪᔭᐅᓕᖅᑐᓂᒃ ᐊᒻᒪᓗ ᐅᔾᔨᕈᓱᒃᑲᓐᓂᓕᕐᓗᑎᒃ ᓄᓇᒥᐅᑕᐃᑦ ᖃᐅᔨᓴᖅᑕᐅᓂᖏᓐᓂᒃ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᐅᑭᐅᖅᑕᖅᑐᒥ ᐊᒻᒪᓗ ᒥᓂᔅᑕᕆᔭᐅᓪᓗᓂ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ.

ᑲᓇᑕᐅᑉ ᒐᕙᒪᒃᑯᖏᑦ $1.2 ᒥᓕᐊᓐᓂᒃ ᐊᑐᐃᓐᓇᕈᐃᓂᐊᖅᑐᑦ ᐊᖅᑯᑎᒋᔭᐅᓗᓂ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ.  ᑖᒃᑯᐊ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᐱᖓᓲᔪᖅᑐᓄᑦ ᓄᓇᓂᒃ ᖃᐅᔨᓴᐅᑎᓄᑦ ᐱᔭᕇᖅᑕᐅᔪᒃᓴᒫᖑᔪᓄᑦ 2009-10 ᐃᖅᑲᓇᐃᔭᕐᓇᕐᒥ.  ᑲᓇᑕᐅᑉ ᒐᕙᒪᒃᑯᖏᑦᑕ ᓄᓇᑦᓯᐊᕐᒥ ᓄᓇᓐᖑᐊᓕᕆᕕᖓᑦ ᑕᒪᑐᒥᖓ ᐱᓕᕆᐊᒃᓴᒥᒃ ᐱᔭᕇᖅᓯᓂᐊᖅᑐᖅ, ᐃᖅᑲᓇᐃᔭᖃᑎᖃᕐᓗᑎᒃ ᓄᓇᑦᓯᐊᑉ ᒐᕙᒪᒃᑯᖏᑦᑕ ᓴᓇᔪᓕᕆᔨᖏᓐᓂᒃ, ᐳᓚᕋᖅᑐᓕᕆᔨᖏᓐᓂᒃ, ᐊᒻᒪᓗ ᕿᑐᕐᖏᐅᖅᑎᑦᑎᔨᖏᓐᓂᒃ.  ᑕᒪᒃᑯᐊ ᐃᓗᓕᑯᓘᔭᖏᑦ ᐅᓂᒃᑲᐅᓯᕆᔭᐅᑦᑎᐊᖅᓯᒪᔪᑦ ᐱᒋᐊᕐᓂᕕᓂᖏᑦᑕ ᑎᑎᖅᑲᖏᑦᑎᒍᑦ.

ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᑐᕌᖓᔪᑦ ᐱᔭᒃᓴᖅᑖᕆᔭᐅᖃᑕᐅᓯᒪᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐊᒻᒪᓗ ᓵᓐᖓᓪᓗᐊᖅᖢᑎᒃ ᐊᕗᖓᐅᔨᓯᒪᔪᒧᑦ ᑮᓇᐅᔭᓕᐅᕋᓱᐊᕈᑎᒃᓴᖅᓯᐅᕐᓂᕐᒥᒃ ᐱᖓᓱᓂ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᓐᓄᑦ. 

ᐱᕙᓪᓕᐊᔪᒃᑰᖅᑎᑕᐅᔪᕕᓃᑦ ᑕᑯᒋᐊᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:

ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᓂᒃ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦ ᑐᑭᓯᒃᑲᓐᓂᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:
ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᑭᒧᐊᕈᑏᑦ, ᐅᓇ ᑕᑯᒋᐊᕐᓗᒍ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᒥᓯᐅᓪ ᔭᐅ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
(819) 997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᐅᒪᔾᔪᑎᓕᕆᔨᖏᑦ
ᓄᓇᑦᓯᐊᕐᒧᑦ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
(867) 669-2580