7 ᐱᓐᖑᐊᕐᕖᑦ ᐱᖁᑎᕐᔪᐊᓪᓗ ᓴᓇᔭᐅᓂᐊᕐᓂᖏᑦ ᓄᓇᑦᓯᐊᕐᒥ

7 ᐱᓕᕆᐊᓐᖑᖅᑎᑕᐅᔪᑦ ᑮᓇᐅᔭᖃᖅᑎᑕᐅᓪᓗᑎᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᓄᓇᑦᓯᐊᕐᒥ ᓂᕆᐅᒋᔭᐅᓪᓚᕆᒃᑐᓂᒃ ᓄᑖᓐᖑᕆᐊᖅᑎᑦᑎᔾᔪᑕᐅᓂᐊᖅᐳᑦ ᐱᓐᖑᐊᕐᕕᖕᓂᒃ. ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᐃᒡᓗᕐᔪᐊᑦ ᐊᑦᑕᓇᔾᔭᐃᖅᑕᐅᓯᒪᓂᖏᓐᓄᑦ ᐱᖏᓐᓇᓐᖏᓐᓂᖅᓴᐅᓕᖅᑎᑕᐅᓂᖏᓐᓄᓪᓗ; ᓄᑖᓐᖑᕆᐊᖅᑎᑕᐅᓗᓂ ᐳᐃᔾᔪᕌᕐᕕᒃ ᐊᒻᒪᓗ ᐊᓐᓂᑭᑦᑕᕐᕖᑦ; ᓴᓇᔭᐅᒃᑲᓐᓂᕐᓗᑎᒃ ᐃᒡᓗᕐᔪᐊᑦ ᓯᓚᑎᖏᑦ; ᐱᐅᓯᒋᐊᖅᑎᑕᐅᓗᑎᒃ ᐊᐅᓚᐅᑎᓖᑦ, ᐅᐊᔭᓅᖅᑐᑦ ᐊᒻᒪᓗ ᐊᓂᖅᓵᖅᑑᑎᓄᑦ ᐊᐅᓚᑦᑎᔾᔪᑏᑦ; ᐃᓕᐅᖅᑲᖅᑕᐅᓗᑎᒃ ᓯᓚᒥ ᐱᓐᖑᐊᕐᕕᒃ ᐊᒻᒪᓗ ᐃᖃᐃᔭᕈᑏᑦ; ᐊᒻᒪᓗ ᐋᖅᑭᒃᓱᐃᓗᑎᒃ ᓯᓚᒥ ᐃᒡᓕᓂᓕᐊᕆᔭᐅᓯᒪᔪᓂᒃ ᐅᓂᒃᑳᕐᕕᖕᓂᒃ.  ᑲᑎᓕᒫᕐᓗᒋᑦ ᑲᓇᑕᐅ ᒐᕙᒪᒃᑯᖏᓐᓂᓐᖔᖅᑐᑦ ᑕᒪᒃᑯᓄᖓ ᐊᑐᖅᑐᒃᓴᑦ $550,000-ᖑᓂᐊᖅᑐᑦ.

1. ᑕᓖᓐ - ᒍᕇ ᒎᔅ ᐃᒡᓕᓂᐊ - ᑐᒡᓕᐊᓂ ᑲᒪᒋᔭᐅᔪᑦ ($34,668)
   
   ᑖᓐᓇ ᐱᓕᕆᐊᖑᔪᒪᔪᖅ ᐋᖅᑭᒃᓱᐃᒃᑲᓐᓂᐅᑕᐅᓂᐊᖅᑐᖅ ᐃᒡᓕᓂᑐᖃᕆᔭᐅᕙᒃᑐᕕᓂᕐᓂᒃ ᐅᐸᒐᕐᓂᖅᐸᓚᐅᖅᓯᒪᓐᖏᑦᑐᓂᒃ.  ᓇᓗᓇᐃᒃᑯᑦᑎᖅᑕᐅᓂᐊᖅᑐᑦ ᐅᓂᒃᑳᖅᓯᒪᔪᓂᒃ, ᐃᓚᓕᐅᓪᓗᒋᑦ ᖃᐅᔨᒪᔭᑐᖃᑦ, ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᐱᕙᓪᓕᐊᓂᑯᕕᓂᕐᓂᒡᓗ ᐱᔾᔪᑎᓕᖕᓂᒃ ᓵᑑ ᓄᓇᖓᓐᓂ.  ᑕᑯᔪᒥᓇᕐᓂᐊᖅᑐᑦ ᓲᕐᓗ ᒍᕇ ᒎᔅ ᑕᓯᖓ ᖃᓂᒋᔮᓂ ᓄᓇᖃᕐᕕᕕᓂᖅᑕᖃᖅᖢᓂ, ᐃᒡᓗᕋᓛᖅᑕᖃᖅᖢᓂ, ᓯᑮᕐᕕᖃᖅᖢᓂ, ᑐᓚᒡᕕᒃ ᐊᒻᒪᓗ ᑏᓕᐅᕐᕖᑦ, ᑕᓖᓐᒥᐅᓄᑦ ᐊᒻᒪᓗ ᐳᓛᕆᐊᖅᑐᓄᑦ ᑕᒪᓐᓇ ᐃᒡᓕᓂᓕᐊᕆᔭᐅᓯᒪᔪᖅ ᐊᑐᖅᑕᐅᓂᖃᑦᑕᕐᓂᐊᖅᖢᓂ.
   
   
2. ᔭᓗᓇᐃᕝ - ᕉᑦ ᐃᓐᓯᐅᑉ ᐳᐃᔾᔪᕌᕐᕕᖓ ᐱᖏᓐᓇᐃᒃᑯᑕᓕᐅᕐᕕᖓ ᓴᓂᕌᖏᓪᓗ ᓴᓇᔭᐅᓂᖏᑦ ($36,000)
   
   ᓴᓇᔭᐅᓯᒪᓪᓗᑎᒃ ᒪᑐᐃᖓᑎᑕᐅᓪᓗᓂ, ᕉᑦ ᐃᓐᓯᐅᑉ ᐳᐃᔾᔪᕌᕐᕕᖓ ᓯᓚᑖᓅᖓᔪᓂᒃ ᐹᖃᐅᓐᖏᑦᑐᖅ ᐊᑭᕐᖓᖅᑕᖃᐅᓐᖏᖢᓂᓗ.  ᑕᖅᑲᒃᑯᓄᖓ ᐊᑐᐃᓐᓇᐅᑎᑕᐅᓇᓱᒃᖢᓂ ᒪᑐᐃᖓᑎᑕᐅᓚᐅᕐᓂᖓ ᐱᔾᔪᑕᐅᒐᓗᐊᖅᑎᓪᓗᒍ, ᒪᑐᐃᖓᓗᐊᕐᓂᖓᓄᑦ ᐊᑦᑕᕐᓈᕿᓂᕐᒥᒃ ᓴᖅᑭᑦᑎᕕᐅᓂᐅᓴᑐᐃᓐᓇᖅᑐᖅ.  ᐅᐊᔭᓅᖅᑐᓂᒃ ᐹᓕᖅᓱᖅᑕᐅᒍᓂ, ᐊᑭᕐᖓᓕᐅᕐᕕᐅᓗᓂ ᐊᒻᒪᓗ ᑐᐊᕕᕐᓇᖅᑐᖅᓯᐅᑎᓂᒃ ᐹᓕᐅᖅᑕᐅᒃᐸᑦ ᐃᖅᑲᓇᐃᔭᖅᑏᑦ ᐊᒻᒪᓗ ᐳᐃᔾᔪᕌᕐᕕᖕᒥᒃ ᐊᑐᖅᑐᑦ ᐊᑦᑕᓇᔾᔭᐃᖅᑕᐅᓯᒪᓂᖅᓴᐅᓂᐊᖅᑐᑦ.  ᓴᓇᔭᐅᒃᑲᓐᓂᐊᕐᓂᕐᒥᔪᖅ ᐃᒡᓗᕐᔪᐊᑉ ᓯᓚᑖ ᐊᒻᒪᓗ ᓴᓇᔭᐅᒃᑲᓐᓂᕈᓂ ᕿᐅᒃᑲᖃᑦᑕᕐᓂᕐᒧᑦ ᓱᕋᒃᐸᓪᓕᐊᖏᓐᓂᖅᓴᐅᓂᐊᖅᑐᖅ.
   
   
3. ᐸᓐᓲᑰ - ᐃᑦᔪᒥ ᐱᓐᖑᐊᕐᕕᒃ ᓄᑖᓐᖑᕆᐊᖅᑎᑕᐅᓂᐊᕐᓂᖓ ($52,525)
   
   ᓄᑖᓐᖑᕆᐊᖅᑎᑕᐅᓕᖅᐸᑦ ᐃᑦᔪᒥ ᐱᓐᖑᐊᕐᕕᒃ ᐃᓚᖃᕐᓂᐊᖅᑐᖅ ᓄᑖᕐᒥᒃ ᐃᑭᐊᕐᒥᒃᓴᓕᖅᑕᐅᓗᓂ ᐳᐃᔾᔪᕌᕐᕕᒃ, ᓄᑖᓂᒃ ᐅᕕᓂᖕᓂᐊᕐᕕᖕᓂᒃ ᑯᕕᔪᓂᒃ ᐃᓕᐅᖅᑲᐃᓗᑎᒃ ᐊᒻᒪᓗ ᐊᓯᖏᓐᓂᒃ ᓴᓇᒃᑲᓐᓂᕐᓗᑎᒃ ᐳᐃᔾᔪᕌᕐᕕᒃ ᒪᑐᐃᖅᑕᐅᒃᑲᓐᓂᕈᓐᓇᕐᓂᐊᕐᒪᑦ.  ᓄᑖᒥᒃ ᓴᐃᒍᐊᓕᖅᑕᐅᓂᐊᕐᒥᔪᖅ ᐊᑦᑕᓇᓐᖏᓐᓂᖅᓴᐅᓕᕐᓂᐊᕐᒪᑦ ᐊᓇᐅᓕᒑᕐᕕᒃ ᐊᒻᒪᓗ ᐹᔅᑭᑦᐹᕐᕕᒃ, ᐊᑦᑕᓇᓐᖏᓐᓂᖅᓴᒦᓐᓂᐊᕐᒪᑕ ᑕᖅᑲᒃᑯᐊ ᐊᒻᒪᓗ ᑕᒪᒃᑯᓂᖓ ᐊᑐᖅᐸᒃᑐᑦ.
   
   
4. ᕗᐊᑦ ᐳᕌᕕᑕᓐᔅ - ᕗᐊᑦ ᐳᕌᕕᑕᓐᔅ ᐃᓕᓐᓂᐊᕐᕕᒃ ᓄᓇᓕᖕᓂ ᐃᓅᓯᖃᑦᑎᐊᕐᓂᕐᒧᑦ ᑐᕌᖓᔪᓂᒃ ᑮᓇᐅᔭᓂᒃ ᐊᑐᕐᓗᑎᒃ ($52,500)
   
   ᕗᐊᑦ ᐳᕌᕕᑕᓐᔅ ᐃᓕᓐᓂᐊᕐᕕᖓ ᓄᓇᓕᓕᒫᓄᑦ ᒪᑐᐃᖓᑎᑕᐅᖃᑦᑕᖅᐳᖅ ᐱᓐᖑᐊᕐᕕᐅᓪᓗᓂ.  ᓯᓚᒥ ᐱᓐᖑᐊᕐᕖᑦ ᐃᓕᐅᖅᑲᖅᑕᐅᓂᐊᖅᑐᑦ ᐊᒻᒪᓗ ᐃᓕᓐᓂᐊᕐᕕᐅᑉ ᐃᓚᖓ ᓄᑖᓂᒃ ᐅᐊᔭᓕᖅᓱᖅᑕᐅᓗᓂ ᐊᒻᒪᓗ ᓄᑖᓐᖑᕆᐊᖅᑎᑕᐅᓗᓂ ᑭᒃᑯᓕᒫᓄᑦ ᐃᖃᐃᔭᕐᕕᐅᖃᑦᑕᕈᓐᓇᕐᓂᐊᕐᒪᑦ, ᐃᒡᓗᖃᐅᕐᓗᓂ 15-ᓂᒃ ᐃᖃᐃᔭᐅᑎᓂᒃ (ᑖᒃᑯᓄᖓ ᐊᑐᖅᑐᒃᓴᓂᒃ ᐃᓕᓐᓂᐊᕐᕕᒃ ᑮᓇᐅᔭᖁᑎᓖᑦ ᐊᓯᖏᓐᓄᑦ ᐊᑐᖅᑕᐅᔭᕆᐊᖃᓐᖏᑦᑐᓂᒃ ᐱᕈᖅᑎᑕᐅᓯᒪᔪᓂᒃ).
   
   
5. ᕗᐊᑦ ᓯᒥᑦ - ᐱᓐᖑᐊᕐᕕᒃ ᐊᒻᒪᓗ ᐃᖃᐃᔭᐅᕐᕕᐅᑉ ᐊᓄᕆᓯᐅᑎᖏᑦᑕ ᖃᐅᔨᓴᖅᑕᐅᓂᖏᑦ ᓄᑖᓐᖑᕆᐊᖅᑎᑕᐅᓂᖏᓪᓗ ($80,050)
   
   ᕗᐊᑦ ᓯᒥᑦᒥ ᐱᓐᖑᐊᕐᕕᐅᑉ ᐊᒻᒪᓗ ᐃᖃᐃᔭᕐᕕᐅᑉ ᐊᓄᕆᓯᐅᑎᖏᑦ ᐱᐅᓐᖏᓗᐊᕐᓂᖏᓐᓄᑦ ᐊᕐᕌᒎ ᐃᓗᐊᓂ ᐃᓚᖓᓂ ᐊᑐᖅᑕᐅᔪᓐᓇᓐᖏᑦᑐᖅ, ᐃᖃᐃᔭᕐᕖᑦ ᐅᖅᑰᓗᐊᖃᑦᑕᖅᖢᑎᒃ ᐊᐅᔭᒃᑯᑦ ᐊᒻᒪᓗ ᐅᐱᔾᔪᕌᕐᕕᒃ ᐊᑐᖅᑕᐅᒡᒐᖃᑦᑕᖅᖢᓂ ᐅᑭᐅᒃᑯᑦ.  ᐊᓄᕆᓯᐅᑏᑦ ᐃᖏᕐᕋᓂᖏᑦ ᖃᐅᔨᓴᖅᑕᐅᓂᐊᖅᑐᑦ, ᐊᒻᒪᓗ ᐅᖅᑰᓴᐅᑎᖏᑦ ᓂᒡᓕᓴᐅᑎᖏᓪᓗ ᓄᑖᓐᖑᕆᐊᖅᑎᑕᐅᓂᐊᖅᖢᑎᒃ ᐊᕐᕌᒍᓕᒫᖅ ᑕᒪᒃᑯᐊ ᐊᑐᖅᑕᐅᖃᑦᑕᕈᓐᓇᕐᓂᐊᕐᒪᑕ.
   
   
6. ᕗᐊᑦ ᓕᐊᑦ - ᕗᐊᑦ ᓕᐊᑦᒥ ᐱᓐᖑᐊᕐᕕᐅᑉ ᐆᒻᒪᖅᑯᑎᖏᑦᑕ ᓄᑖᓐᖑᕆᐊᖅᑎᑕᐅᓂᖏᑦ ($94,119)
   
   ᕗᐊᑦ ᓕᐊᑦᒥ ᐱᓐᖑᐊᕐᕕᒃ ᐃᓗᓕᖃᐅᖅᑐᖅ ᐊᓐᓂᑭᑦᑕᕐᕕᖕᒥᒃ, ᐱᓐᖑᐊᕐᕕᖕᒥᒃ ᐊᒻᒪᓗ ᐊᕐᕌᒎ ᐃᓚᖓᓂ ᐊᑐᖅᑕᐅᖃᑦᑕᖅᑐᒥᒃ ᐳᐃᔾᔪᕌᕐᕕᖕᒥᒃ.  ᑕᒪᑐᒪ ᐱᓕᕆᐊᖑᔪᒪᔫᑉ ᑮᓇᐅᔭᖅᑐᕈᑖ ᓄᑖᓐᖑᕆᐊᖅᑎᑦᑎᓂᕐᒧᑦ ᐊᑐᖅᑕᐅᓂᐊᖅᑐᑦ ᐃᒡᓘ ᐅᖅᑰᓴᐅᑎᖏᓐᓄᑦ, ᐊᓄᕆᓯᐅᑎᖏᓐᓄᑦ ᐊᒻᒪᓗ ᓂᒡᓕᓴᐅᑎᖏᓐᓄᑦ, ᐊᒻᒪᓗ ᐅᐊᔭᓅᖅᑐᑦ ᓄᑖᓐᖑᕆᐊᖅᑎᑕᐅᓗᑎᒃ.  ᑕᒪᓐᓇ ᐱᓕᕆᐊᖑᓂᐊᖅᑐᖅ ᑮᓇᐅᔭᖃᖅᑎᑕᐅᓂᐊᖅᑐᖅ ᒐᕙᒪᖏᑦ ᐃᓕᓯᓗᑎᒃ ᓯᕿᓂᕐᒥᒃ ᐊᑐᖅᑐᒥᒃ ᐃᒥᕐᒥᒃ ᐆᓇᖅᓯᑎᑦᑎᔾᔪᒻᒥᒃ ᐳᐃᔾᔪᕌᕐᕕᖕᒧᑦ ᑕᕝᕙᓂ ᐃᓗᐊᓃᖃᑕᐅᔪᒥᒃ.  ᐆᒻᒪᖅᑯᑎᑐᓐᖏᓐᓂᖅᓴᓂᒃ ᐊᑐᖅᑐᓂᒃ ᐃᓕᐅᖅᑲᐃᓂᐊᕐᒥᔪᑦ ᐊᒻᒪᓗ ᐆᒻᒪᖅᑯᑎᓕᕆᓂᕐᒧᑦ ᑐᕌᖓᔪᓂᒃ ᐃᓕᐅᖅᑲᐃᕕᐅᒐᓂ ᐊᐅᓚᔾᔪᑎᓄᑦ ᑮᓇᐅᔭᖅᑐᕈᑏᑦ ᐅᓄᕈᓐᓃᒃᑲᓐᓂᕐᓂᐊᖅᑐᑦ ᐊᒻᒪᓗ ᐳᐃᔾᔪᕌᕐᕕᒃ ᐊᑐᖅᑕᐅᔪᓐᓇᖅᓯᓗᓂ ᐊᑯᓂᒃᑲᓐᓂᖅ.
   
   
7. ᐊᒃᖥᕕᒃ - ᓯᑎᑦᓯᓐᓕᐅ ᐱᓐᖑᐊᕐᕕᖓᓂ ᐊᓐᓂᑭᑦᑕᕐᕕᐅᑉ ᐊᕙᓗᐊ ᐊᒻᒪᓗ ᓇᑎᖓ ($200,138)
   
   ᐊᑐᖅᑕᐅᖏᓐᓇᐅᔭᖅᑐᖅ ᓯᑎᑦᓯᓐᓕᐅ ᐊᓐᓂᑭᑦᑕᕐᕕᖓ ᐊᒃᖥᕕᖕᒥ ᐊᕐᕌᒍᖃᓕᖅᑐᖅ 24-ᓂᒃ ᐊᒻᒪᓗ ᓄᑕᐅᔪᓐᓃᖅᐸᓪᓕᐊᑎᓪᓗᒍ ᐊᓐᓂᑭᑦᑕᕐᕕᖓ ᓄᑖᓐᖑᕆᐊᖅᑕᐅᔭᕆᐊᖃᓕᖅᑐᖅ ᒪᑐᐃᖓᑎᑕᐅᖏᓐᓇᕐᓂᐊᖅᐸᑦ.  ᓄᑖᓂᒃ ᕼᐋᑭᕐᕕᖕᒥ ᐊᕙᓗᐊ ᕿᔪᖕᓂᒃ ᐃᓕᐅᖅᑲᐃᕕᐅᓂᐊᖅᑐᖅ ᐊᒻᒪᓗ ᓄᑖᒥᒃ ᓇᑎᕋᖅᑖᖅᑎᑕᐅᓗᓂ ᓄᑖᓐᖑᕆᐊᖅᑎᑕᐅᓯᒪᔪᓂᒃ ᐊᒃᓴᓗᐊᕕᓂᕐᓂᒃ ᐊᑐᕐᓗᑎᒃ.  ᓄᑖᖅ ᐊᒃᓴᓗᐊᕕᓂᕐᓂᒃ ᓴᓇᓯᒪᔪᖅ ᓇᑎᖅ ᐱᑕᖃᓕᖅᐸᑦ ᒪᒃᑯᒃᑐᖅᓯᐅᑎᓂᒃ ᐱᓐᖑᐊᕈᓯᕐᓂᒃ ᐱᔨᑦᑎᕈᑎᓂᒡᓗ ᐊᑐᐃᓐᓇᖃᖅᑎᑦᑎᔪᓐᓇᖅᓯᓂᐊᖅᑐᖅ ᐊᕐᕌᒍᓕᒫᖅ.
   
   

ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᓪᓗ ᑲᓇᑕᒥ

ᑖᒃᑯᐊ ᑮᓇᐅᔭᖃᖅᑎᑕᐅᓂᖏᑦ ᐊᑐᐃᓐᓇᕈᖅᑎᑕᐅᓂᐊᖅᑐᑦ ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᓪᓗ ᑲᓇᑕᒥ ᑮᓇᐅᔭᖁᑎᖏᑦᑎᒍᑦ.  ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᓪᓗ ᑲᓇᑕᒥ ᑮᓇᐅᔭᖁᑎᖃᕐᕕᒃ ᑲᓇᑕᓕᒫᒧᑦ ᑐᕌᖓᕗᖅ ᐊᒻᒪᓗ ᑮᓇᐅᔭᖅᑐᕈᑎᓂᒃ ᐊᑭᓕᖅᓱᐃᖃᑕᐅᖃᑦᑕᖅᖢᑎᒃ ᓴᓇᒃᑲᓐᓂᕆᐊᖃᖅᑐᓄᑦ, ᓄᑖᓐᖑᕆᐊᖅᑎᑕᐅᔭᕆᐊᓕᖕᓄᑦ ᐊᖏᒡᓕᒋᐊᖅᑕᐅᔭᕆᐊᖃᖅᑐᓄᓪᓘᓐᓃᑦ ᐱᓐᖑᐊᕐᕖᑦ ᑲᓇᑕᒦᑦᑐᑦ.  ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᓪᓗ ᑲᓇᑕᒥ ᑮᓇᐅᔭᖁᑎᖃᕐᕕᒃ ᐊᑐᐃᓐᓇᕈᐃᓯᒪᕗᑦ $500 ᒥᓕᐊᓐᓂᒃ ᑲᓇᑕᒥᒫᒧᑦ ᑐᕌᖓᔪᓂᒃ ᒫᔾᔨ 31, 2011-ᖑᕋᓱᖕᓂᖓᓄᑦ.  ᐱᓕᕆᐊᓄᑦ ᑮᓇᐅᔭᖅᑐᕈᑏᑦ $1.7 ᒥᓕᐊᓐ ᓴᓂᕐᕙᒃᑕᐅᓚᐅᖅᑐᑦ ᐱᖓᓱᓄᑦ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓄᑦ ᐊᑐᖅᑐᒃᓴᓐᖑᖅᑎᑕᐅᓪᓗᑎᒃ ᐱᓐᖑᐊᕐᕕᖕᓄᑦ ᐊᒻᒪᓗ ᐱᖁᑎᕐᔪᐊᓕᕆᓂᕐᒧᑦ ᑐᕌᖓᔪᓄᑦ.

ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᓪᓗ ᑲᓇᑕᒥ ᑮᓇᐅᔭᖁᑏᑦ  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐊᐅᓚᑕᐅᕗᑦ, ᑎᒥᓐᖑᖅᑎᑕᐅᓵᓚᐅᖅᑐᑦ ᐱᔭᒃᓴᖅᑖᖅᑎᑕᐅᓯᒪᓪᓗᑎᒃ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐅᑯᐊ ᓇᓗᓇᐃᖅᑕᐅᔪᑦ ᓴᖅᑭᑎᑦᑎᒋᐊᓪᓚᒃᑲᓐᓂᖅᐳᑦ ᑲᓇᑕᐅᑉ ᒐᕙᒪᒃᑯᖏᑦ ᓯᕗᒧᐊᒃᐸᓪᓕᐊᑎᑦᑎᔪᒪᓂᖏᓐᓂᒃ ᑲᑎᓐᖓᔪᓂᒃ ᐅᑭᐅᖅᑕᖅᑐᒧᑦ ᑐᑭᒧᐊᕈᑎᓂᒃ ᐊᒻᒪᓗ ᑲᓇᑕᒥᐅᑕᐅᖃᑕᐅᓂᖏᓐᓂᒃ ᐅᑭᐅᑕᖅᑐᖅ, ᓴᐳᒻᒥᐅᓯᖅᑕᐅᓯᒪᓪᓗᑎᒃ ᐅᑭᐅᑕᖅᑑᑉ ᐊᕙᑎᑦᑎᓐᓂᒃ ᐃᑦᑕᕐᓂᓴᖃᕐᕕᖏᑦ, ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐊᒻᒪᓗ ᐱᕈᓐᓇᐃᕚᓪᓕᕋᓱᖕᓂᖅ ᓴᓐᖏᓂᖅᑖᖅᑎᑦᑎᒃᑲᓐᓂᕋᓱᖕᓂᕐᓗ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᓐᓄᑦ.