ᒥᓂᔅᑕ ᔅᑐᕌᓪ ᓇᓗᓇᐃᖅᓯᕗᖅ 7-ᓂ ᓄᓇᑦᓯᐊᕐᒦᑦᑐᓂ ᓄᓇᓕᖕᓂ 7-ᓂᒃ ᐱᓐᖑᐊᕐᕕᖕᓂᒃ ᓄᑖᓐᖑᕆᐊᖅᑕᐅᓂᐊᕐᓂᖏᓐᓂᒃ

CanNor-09-12

ᔭᓗᓇᐃᕝ  (ᓄᕕᐱᕆ 12, 2009) – ᓴᒃ ᔅᑐᕌᓪ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᑮᓇᐅᔭᖃᖅᑎᑕᐅᓂᐊᕐᓂᖏᓐᓂᒃ 7-ᖑᔪᑦ ᐱᓐᖑᐊᕐᕖᑦ ᓄᓇᑦᓯᐊᕐᒥ, ᓄᑖᓐᖑᕆᐊᖅᑎᑕᐅᓗᑎᒃ ᐊᒻᒪᓗ ᐱᕈᓐᓇᒃᓴᖅᑕᐅᓗᑎᒃ.

“ᐱᓐᖑᐊᕐᕕᖕᓄᑦ ᑐᕌᖓᔪᑦ ᐅᑭᐅᖅᑕᖅᑐᒥ ᐃᑲᔪᕐᓂᖃᓪᓚᒃᐳᑦ ᑲᓇᑕᒥᐅᑉ ᐋᓐᓂᐊᖃᓐᖏᓐᓂᖅᓴᐅᓂᖏᓐᓄᑦ ᐊᒻᒪᓗ ᐃᓅᓯᖃᑦᑎᐊᕐᓂᖏᓐᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ. “ᑕᒪᒃᑯᐊ ᐱᓕᕆᐊᑦ ᐊᒃᓱᐊᓗᒃ ᐱᕚᓪᓕᐅᑕᐅᓂᐊᖅᑐᑦ ᓄᓇᑦᓯᐊᕐᒥᐅᑦ ᐃᓅᓯᖏᓐᓄᑦ, ᑲᑎᕝᕕᖃᕈᓐᓇᕐᓂᐊᕐᒪᑕ, ᐱᓐᖑᐊᕐᕕᖃᕈᓐᓇᕐᓂᐊᕐᒪᑕ ᐊᒻᒪᓗ ᐃᖃᐃᔭᕐᕕᖃᕈᓐᓇᕐᓂᐊᕐᒪᑕ.”

“ᑕᒪᒃᑯᐊ ᐱᓐᖑᐊᕐᕖᑦ ᓄᓇᓕᖕᓄᑦ ᑐᑦᑕᕐᕕᒋᔭᐅᓪᓚᕆᒃᑐᑦ, ᐱᓐᖑᐊᕐᕕᑐᐃᓐᓇᐅᓐᖏᒻᒪᑕ, ᑲᑎᕝᕕᐅᖃᑦᑕᕐᒥᖕᒪᑕ ᓄᓇᖅᑲᑎᒌᓕᒫᓄᑦ, “ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᐅᑭᐅᖅᑕᖅᑐᕐᒥᐅᓂᒃ ᐊᒻᒪᓗ ᒥᓂᔅᑕᕆᔭᐅᓪᓗᓂ ᐋᓐᓂᐊᖃᕐᓇᓐᖏᑦᑐᓕᕆᔨᒃᑯᓐᓄᑦ.  “ᒐᕙᒪᕗᑦ ᐊᖏᖅᓯᒪᑦᑎᐊᖅᐳᑦ ᑲᓇᑕᒥᐅᑕᓕᒫᑦ ᐊᑐᐃᓐᓇᖃᖅᑎᑕᐅᔭᕆᐊᖃᕐᓂᖏᓐᓂᒃ ᐃᓐᓄᒃᑕᕐᕕᐅᔪᓂᒃ ᐱᖁᑎᕐᔪᐊᕐᓂᒃ, ᓴᖅᑭᔮᒃᑲᓐᓂᕐᓂᐊᕐᒪᑦ ᐋᓐᓂᐊᖃᓐᖏᓐᓂᖅᓴᐅᔪᑦ ᒪᑭᒪᑦᑎᐊᕈᓐᓇᖅᑐᓪᓗ ᓄᓇᓖᑦ.”

ᑕᒪᒃᑯᐊ ᑕᐃᔭᐅᔪᑦ ᐱᓕᕆᐊᖑᓂᐊᕐᓂᕋᖅᑕᐅᖅᑲᐅᔪᑦ ᐅᓪᓗᒥ ᐃᑲᔫᑕᐅᓪᓚᕆᖕᓂᐊᖅᑐᑦ ᑭᓐᖒᒪᔭᖃᓪᓚᕆᖕᒪᑕ ᓄᑕᐅᓐᖏᓗᐊᖅᑐᑦ ᐋᖅᑭᒃᓱᖅᑕᐅᔪᒃᓴᖏᓐᓂᒃ ᐊᒻᒪᓗ ᓄᑖᓐᖑᕆᐊᖅᑎᑕᐅᔭᕆᐊᖃᕐᓂᖏᓐᓂᒃ, ᐱᐅᓯᒃᑲᓐᓂᖅᐸᑕ ᓄᓇᖅᑲᑎᒌᑦ ᐃᓅᓯᖃᑦᑎᐊᕐᓂᖅᓴᐅᓕᕐᓂᐊᕐᒪᑕ.  ᐱᓐᖑᐊᕐᕖᑦ ᐊᒃᓱᐊᓗᒃ ᐱᒻᒪᕆᐅᔪᑦ ᐊᒥᓱᓄᑦ ᐅᑭᐅᑕᖅᑐᒦᑦᑐᓄᑦ ᓄᓇᓕᖕᓄᑦ , ᐃᖃᐃᔭᕐᕕᐅᖃᑦᑕᕐᒪᑕ ᐊᒻᒪᓗ ᐱᓐᖑᐊᕐᕕᐅᓪᓗᑎᒃ, ᐃᓕᓐᓂᐊᕐᕕᖕᓄᓪᓗ ᐃᖃᐃᔭᕐᕕᒋᔭᐅᓯᓐᓈᖅᖢᑎᒃ, ᓂᕈᐊᖅᑐᖃᓕᕌᖓᓪᓗ ᓂᕈᐊᕐᕕᐅᖃᑦᑕᖅᖢᑎᒃ, ᐊᒻᒪᓗ ᑕᖅᑲᒃᑯᓄᖓ ᐊᔾᔨᒌᓐᖏᑦᑐᓂᒃ ᐱᔾᔪᑎᖃᖅᖢᑎᒃ ᓄᓇᖅᑲᑎᒌᓄᑦ ᑲᑎᕝᕕᐅᕙᒃᖢᑎᒃ ᖁᕕᐊᓲᑎᖃᕐᕕᐅᖃᑦᑕᖅᖢᑎᒡᓗ.  ᐱᐅᓂᖅᓴᓂᒃ ᐱᓐᖑᐊᕐᕕᖃᕈᒪᓂᕐᒧᑦ ᑮᓇᐅᔭᓂᒃ ᐃᓕᓯᕝᕕᒋᖃᑦᑕᕈᑦᑎᒍᑦ ᓄᓇᓕᖕᓂ ᑮᓇᐅᔭᓕᐅᕋᓱᐊᕈᑏᑦ ᐱᕚᓪᓕᐅᑎᖃᒃᑲᓐᓂᕐᓂᐊᖅᑐᑦ.  ᐱᓕᕆᐊᑦ ᒥᒃᓵᓄᑦ ᐃᓗᓕᑯᓘᔭᖏᑦ ᓇᓗᓇᐃᔭᖅᑕᐅᓯᒪᔪᑦ ᐅᑯᐊ ᐅᐃᒍᖏᓐᓂ ᐅᓂᒃᑳᖅᓯᒪᔪᓂ ᖃᓄᖅ ᐱᒋᐊᕐᓂᖃᓚᐅᖅᓯᒪᓂᖏᓐᓂᒃ.

ᑕᒪᒃᑯᐊ ᑮᓇᐅᔭᖃᖅᑎᑕᐅᔪᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒧᖁᑖᑕ ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᑦ ᑲᓇᑕᒥ ᑮᓇᐅᔭᖃᐅᑎᖃᕐᕕᖓᒍᑦ.  ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᓪᓗ ᑲᓇᑕᒥ ᑮᓇᐅᔭᖃᐅᑎᖃᕐᕕᒃ ᑲᓇᑕᓕᒫᒧᑦ ᑐᕌᖓᕗᑦ, ᐊᒻᒪᓗ ᑮᓇᐅᔭᓕᐅᕈᑎᒃᓴᓂᒃ $500 ᒥᓕᐊᓐᓂᒃ ᐊᑐᐃᓐᓇᕈᐃᓯᒪᓂᐊᖅᖢᑎᒃ ᒫᔾᔨ 31, 2011-ᖑᕋᓱᖕᓂᖓᓄᑦ ᐊᒻᒪᓗ ᐃᓚᒋᔭᐅᖃᑕᐅᓪᓗᓂ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ.  ᑖᒃᑯᑎᒎᓇᖅ ᑮᓇᐅᔭᖃᖅᑎᑦᑎᔪᓐᓇᖅᑐᑦ ᓴᓇᔭᐅᒃᑲᓐᓂᕈᓐᓇᕐᓂᐊᕐᒪᑕ, ᓄᑖᓐᖑᕆᐊᖅᑎᑕᐅᔪᓐᓇᕐᓂᐊᕐᒪᑕ ᐅᕝᕙᓘᓐᓃᑦ ᐊᖏᒡᓕᒋᐊᖅᑕᐅᔪᓐᓇᕐᓂᐊᕐᒪᑕ ᐱᓐᖑᐊᕐᕖᑦ ᑲᓇᑕᒦᑦᑐᓂ ᓄᓇᓕᖕᓂ.  ᑮᓇᐅᔭᑦ $1.67 ᒥᓕᐊᓐ ᓴᓂᕐᕙᒃᑕᐅᓯᒪᔪᑦ ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᓪᓗ ᑲᓇᑕᒥ ᐱᖓᓱᓂ ᐅᑭᐅᑕᖅᑐᒥ ᒐᕙᒪᖃᕐᕕᖕᓂ.

ᐱᓐᖑᐊᕐᕕᖕᓄᑦ ᐱᖁᑎᕐᔪᐊᓕᕆᓂᕐᒧᓪᓗ ᑲᓇᑕᒥ ᑮᓇᐅᔭᖁᑏᑦ  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐊᐅᓚᑕᐅᕗᑦ ᓄᓇᑦᓯᐊᕐᒥ, ᔫᑳᓐᒥ ᐊᒻᒪᓗ ᓄᓇᕗᒻᒥ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᑦ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᑐᕌᖓᔪᑦ ᐅᑭᐅᖅᑕᖅᑐᒥ ᑎᓴᒪᒋᔭᐅᓪᓗᑎᒃ ᐱᓪᓗᐊᑕᕆᔭᐅᔪᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᐱᕚᓪᓕᐅᑎᒃᓴᓕᐊᕆᓯᒪᔭᖏᓐᓄᑦ.

ᐱᕙᓪᓕᐊᔪᒃᑰᖅᑎᑕᐅᔪᕕᓃᑦ ᑕᑯᒋᐊᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:

ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᓂᒃ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦ ᑐᑭᓯᒃᑲᓐᓂᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:
ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᑭᒧᐊᕈᑏᑦ, ᐅᓇ ᑕᑯᒋᐊᕐᓗᒍ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᒥᓯᐅᓪ ᔭᐅ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
(819) 997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᐅᒪᔾᔪᑎᓕᕆᔨᖏᑦ
ᓄᓇᑦᓯᐊᕐᒧᑦ
ᐲᑐᕋ ᕙᐃᑦ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
(867) 669-2580