ᓄᓇᕗᒻᒥ ᐆᒻᒪᖅᑯᑎᓕᕆᓂᕐᒧᑦ ᐱᖁᑎᕐᔪᐊᑦ ᓄᑖᓐᖑᕆᐊᖅᑎᑕᕗᑦ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ

CanNor-09-022

ᐃᖃᓗᐃᑦ, ᓄᓇᕗᑦ, (ᕕᕗᐊᕆ 8, 2010) – ᓄᓇᕗᒻᒥᐅᑦ ᐃᑲᔫᓯᐊᕐᓂᐊᓯᕗᑦ ᐆᒻᒪᖅᑯᑎᓕᕆᔾᔪᑎᖏᑦ ᐱᖁᑎᕐᔪᐊᑦ ᓄᑖᓐᖑᕆᐊᖅᑕᐅᒃᐸᑕ ᐊᑐᕐᓗᒋᑦ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᒪᔾᔭᐃᔾᔪᑏᑦ ᐸᕐᓇᐅᑎᖏᑦ.  ᓄᑖᓐᖑᕆᐊᖅᑎᑦᑎᓂᒃᑯᑦ ᓄᐃᑦᑎᓂᐊᖅᑐᒍᑦ ᐃᖅᑲᓇᐃᔮᒃᓴᓂᒃ, ᖃᒥᑦᑕᓐᖏᓐᓂᖅᓴᐅᓕᕐᓗᑎᒡᓗ ᐊᐅᓚᐅᑏᑦ ᓄᓇᕗᒻᒥᐅᓄᑦ ᐊᑐᖅᑕᐅᕙᒃᑐᑦ, ᐊᒻᒪᓗ ᐊᕗᖓᐅᔨᓯᒪᔪᒃᑯᑦ ᐊᕙᑎᕗᑦ ᐃᑲᔫᑎᑖᒃᑲᓐᓂᕈᓐᓇᕐᓂᐊᖅᖢᓂ.

ᑕᒪᓐᓇ ᑐᓴᒐᒃᓴᖅ ᐅᓪᓗᒥ ᓇᓗᓇᐃᖅᑕᐅᓚᐅᖅᑐᖅ ᓕᐅᓇ ᐊᒡᓘᒃᑲᕐᒧᑦ, ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᐅᑭᐅᖅᑕᖅᑐᒥ ᐊᒻᒪᓗ ᒥᓂᔅᑕᕆᔭᐅᓪᓗᓂ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ, ᑭᒡᒐᖅᑐᖅᖢᓂᐅᒃ ᓴᒃ ᔅᑐᕌᓪᒥᒃ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ.  ᑕᐃᑲᓃᖃᑎᖃᓚᐅᖅᑐᖅ ᐲᑕ ᒫᑭᒥᕐ, ᐊᖓᔪᖅᑳᖅ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑯᐊᐳᕇᓴᖏᓐᓄᑦ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐊᑐᐃᓐᓇᕈᐃᓂᐊᖅᑐᑦ $5.8 ᒥᓕᐊᓐ ᐅᖓᑎᑦᑎᐊᕌᕐᔪᖏᓐᓃᑦᑐᓂᒃ ᐊᕐᕌᒎᒃ ᒪᕐᕉᒃ ᓈᓇᓱᖕᓂᖏᓐᓂ, ᐊᖅᑯᑕᐅᓗᓂ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ, ᐊᑐᖅᑕᐅᓂᐊᖅᖢᑎᒡᓗ ᓄᑕᐅᓐᖏᓗᐊᓕᖅᑐᑦ ᐅᖅᓱᖅᑐᖅᑐᑦ ᐊᐅᓚᐅᑏᑦ ᐊᓯᔾᔨᖅᑕᐅᔪᓐᓇᕐᓂᐊᕐᒪᑕ ᐊᕐᕕᐊᓂ, ᐃᖃᓗᒃᑑᑦᑎᐊᕐᒥ, ᐃᒡᓗᓕᒑᕐᔪᖕᒥ, ᐅᖅᓱᖅᑑᕐᒥ, ᒥᑦᑎᒪᑕᓕᖕᒥ, ᑲᖏᖅᖠᓂᕐᒥ, ᖃᐅᓱᐃᑦᑐᕐᒥ ᐊᒻᒪᓗ ᑎᑭᕋᕐᔪᐊᕐᒥ.  ᑕᐃᒃᑯᐊ ᓄᑖᑦ ᐊᐅᓚᐅᑏᑦ ᓄᖅᑲᖅᑕᓐᖏᓐᓂᖅᓴᐅᓂᐊᖅᑐᑦ, ᐅᖅᓱᖅᑐᓐᖏᓐᓂᖅᓴᐅᓗᑎᒃ ᐊᒻᒪᓗ ᐃᓯᐊᕿᓐᖏᓐᓂᖅᓴᐅᓗᑎᒃ.  ᐱᑐᒃᓯᒪᐅᑎᖃᕐᓂᐊᕐᒥᔪᑦ ᐅᖅᑰᓴᐅᑏᑦ ᐊᑐᖅᓯᒪᔪᑦ ᐊᑐᖅᑕᐅᒃᑲᓐᓂᖃᑦᑕᕈᓐᓇᕐᓂᐊᕐᒪᑕ.

“ᑕᒪᒃᑯᐊ ᓄᑖᓐᖑᕆᐊᖅᑎᑕᐅᓂᖏᓐᓄᑦ ᖃᒥᒐᔪᓐᖏᓐᓂᖅᓴᐅᓂᐊᓕᖅᑐᑦ ᖃᐅᒻᒪᖅᑯᑏᑦ ᓄᓇᕗᒻᒥᐅᓄᑦ ᐊᑐᖅᑕᑦ, ᐊᒻᒪᓗ ᐆᒻᒪᖅᑯᑎᓄᑦ ᑮᓇᐅᔭᖅᑐᕈᑏᑦ ᐊᑦᑎᒃᓯᒋᐊᕐᓂᐊᖅᖢᑎᒃ ᐱᓯᓂᓯᓄᑦ ᐃᓄᖕᓄᓪᓗ ᐊᑐᖅᑕᐅᖃᑦᑕᖅᑐᑦ ᓄᓇᕗᒻᒥ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᐊᒡᓘᒃᑲᖅ.  “ᓄᑖᓂᒃ ᐊᐅᓚᐅᑎᓂᒃ ᐃᓕᐅᖅᑲᐃᒍᑦᑕ 8-ᓄᑦ ᓄᓇᕗᒻᒥᐅᑦ ᓄᓇᓕᖁᑎᖏᓐᓄᑦ ᓴᖅᑭᑦᑐᖃᕐᓂᐊᕐᒥᔪᖅ ᐃᖅᑲᓇᐃᔮᒃᓴᓂᒃ.”

“ᑕᖅᑲᐅᖓ ᒑᓯᕐᓗᐃᑦ ᐃᓯᐊᕿᓂᖏᑦ ᐊᑦᑎᒃᓯᕚᓪᓕᖅᐸᑕ ᐊᒻᒪᓗ ᐅᖅᓱᐊᓗᒃᑐᓐᖏᓐᓂᖅᓴᐅᓕᖅᐸᑕ ᐊᒃᓱᐊᓗᒃ ᐱᐅᔪᒧᑦ ᐊᕗᖓᐅᔨᓯᒪᔪᒧᑦ ᐱᕚᓪᓕᐅᑕᐅᓂᐊᖅᑐᖅ ᐊᕙᑎᑦᑎᓐᓄᑦ, ᒥᓂᔅᑕ ᔅᑖᓪ ᑕᐃᒪᓐᓇ ᐅᖃᓚᐅᖅᑐᖅ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ.  “ᑕᒪᓐᓇ ᐊᓪᓗᕆᐊᒃᑲᓐᓂᐅᑕᐅᕗᖅ ᐊᕙᑎᕗᑦ ᐊᒃᑐᖅᑕᐅᓐᖏᓐᓂᖅᓴᐅᓕᕐᓂᐊᕐᓂᖓᓄᑦ, ᑕᒪᓐᓇ ᓯᕗᓪᓕᐅᔾᔭᐅᓯᒪᓪᓚᕆᖕᒪᑦ ᐊᒥᓱᓄᑦ ᐅᑭᐅᖅᑕᖅᑐᒥᐅᓄᑦ.”

“ᑮᓇᐅᔭᓂᒃ ᐅᓄᖅᑐᓂᒃ ᑐᓂᔭᐅᓂᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᑦ, ᑭᒡᒐᖅᑐᖅᑕᐅᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᑦ, ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦ ᑲᒪᒋᔭᖃᕈᓐᓇᖅᓯᓂᐊᖅᑐᑦ ᐃᓚᖏᓐᓂᒃ ᐊᑭᑐᔪᖅᑐᕈᑎᒃᓴᖏᑦᑕ ᐸᕐᓇᐅᑎᖏᓐᓃᖏᑦᑐᓂᒃ ᑮᓇᐅᔭᑭᒃᓴᕐᓂᖅ ᐱᔾᔪᑎᒋᓪᓗᒍ.  ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑯᐊᐳᕇᓴᖓᑦ ᓂᐅᕕᕈᓐᓇᖅᓯᓂᐊᖅᑐᑦ ᓄᑖᓂᒃ, ᐅᖅᓱᖅᑐᓐᖏᓐᓂᖅᓴᓂᒃ ᐊᐅᓚᐅᑎᓂᒃ ᓄᓇᓕᖕᓄᑦ ᒥᑭᒃᓴᓗᐊᓕᖅᑐᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᐲᑕ ᒫᑭ.

ᑕᒪᓐᓇ ᑲᑐᔾᔭᐅᔪᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐊᒻᒪᓗ ᐅᑭᐅᖅᑕᖅᑐᒥ ᒐᕙᒪᒃᑯᑦ ᑎᒥᓐᖑᖅᑎᓯᒪᔭᖏᑦᑕ ᑯᐊᐳᕇᓴᖏᓐᓄᑦ, ᑲᑎᓕᒫᖅᖢᒋᑦ $14 ᒥᓕᐊᓐᖑᓪᓗᑎᒃ.

ᐃᓚᒋᔭᐅᖃᑕᐅᓪᓗᓂ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᓐᓄᑦ, ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᐃᑲᔫᑏᑦ $1 ᐱᓕᐊᓐᖑᓪᓗᑎᒃ ᑲᓇᑕᓕᒫᒧᑦ ᑐᕌᖓᕗᑦ ᑮᓇᐅᔭᓕᐅᕈᑎᒃᓴᖅᓯᐅᕈᓐᓇᕐᓂᐊᕐᒪᑕ ᓄᓇᓖᑦ ᐊᒃᑐᖅᑕᐅᓯᒪᓗᐊᓐᖑᐊᖅᑐᑦ ᑮᓇᐅᔭᑦ ᑲᑕᓚᐅᕐᓂᖏᓐᓄᑦ ᓄᓇᕐᔪᐊᓕᒫᒥ.  ᑮᓇᐅᔭᑦ $32.8 ᒥᓕᐊᓐᓂᒃ ᐊᑐᐃᓐᓇᕈᐃᓂᐊᖅᑐᑦ ᐱᖓᓱᓄᑦ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓄᑦ 2009 ᐊᒻᒪᓗ 2011 ᐊᑯᓐᓂᖓᓂ.

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᕌᖓᕗᑦ, ᐱᔭᒃᓴᖅᑖᕆᔭᐅᓯᒪᓪᓗᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑎᖏᓐᓄᑦ ᓄᓇᕗᒻᒥ, ᓄᓇᑦᓯᐊᕐᒥ ᐊᒻᒪᓗ ᔫᑳᓐᒥ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᑦ ᑐᑭᒧᐊᖅᑎᑦᑎᓂᕐᒥᒃ ᓴᖅᑭᑎᑦᑎᓂᕐᒥᒡᓗ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᖏᓐᓂᒃ ᐅᑭᐅᖅᑕᖅᑑᑉ ᒐᕙᒪᖃᕐᕕᖏᓐᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᓂᐃᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᒐᒃᓴᓕᐊᕕᓂᖏᓐᓂᒃ ᑕᑯᔪᒪᒍᕕᑦ, ᐅᕘᓇ ᑕᑯᔪᓐᓇᖅᑕᑎᑦ:

ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᓂᒃ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ ᑐᑭᓯᒃᑲᓐᓂᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:
ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᑭᒧᐊᕈᑏᑦ, ᐅᓇ ᑕᑯᒋᐊᕐᓗᒍ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᒥᓯᐅᓪ ᔭᐅ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
(819) 997-0002
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ (ᓄᓇᕗᒻᒥ ᐊᕕᒃᑐᖅᓯᒪᔪᑦ ᑎᑎᕋᕐᕕᐊ)
ᑭᐅᕋᓐ ᒪᑲᓐᔨ
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᑦ ᐊᖓᔪᖅᑳᖓᑦ
(867) 867-975-4537

ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑯᐊᐳᕇᓴᖓᑦ
ᒪᐃᒐᓐ ᒪᒃᕌᐃ
ᑐᓴᐅᒪᔾᔪᑎᓕᕆᓂᕐᒧᑦ ᑲᒪᔨ
ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑯᐊᐳᕇᓴᖓᓐᓄᑦ
mmcrae@npc.nu.ca
(867)979-7534
(867)222-1861