ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᓱᐃᕗᑦ ᐱᕈᖅᐸᓪᓕᐊᓂᖓᓂᒃ ᔫᑳᓐ ᐳᓚᕋᖅᑐᓕᕆᓂᕐᒥᒃ ᐃᓕᖅᑯᓯᓕᕆᓂᕐᒥᓗ ᐱᕙᓪᓕᐊᑎᑦᑎᓂᖏᑦ

CanNor-09-10

ᕙᐃᑦᕼᐅᐊᔅ, ᔫᑳᓐ (ᐊᒃᑑᐸ 16, 2009) –  ᑕᐃᔮᓐ ᐊᑉᓛᓐᔨ, ᒥᓂᔅᑕᕆᔭᐅᔪᖅ ᐱᓯᓂᓯᕋᓛᓄᑦ ᐳᓚᕋᖅᑐᓕᕆᓂᕐᒧᓪᓗ ᑮᒡᒐᖅᑐᐃᓪᓗᓂ ᓴᒃ ᔅᑐᕌᓪᒥᒃ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᑮᓇᐅᔭᖃᖅᑎᑦᑎᓂᐊᕐᓂᕐᒥᓂᒃ ᐱᖓᓱᓂᒃ ᐱᕚᓪᓕᐅᑕᐅᓂᐊᖅᑐᓂᒃ ᔫᑳᓐᒥ ᐳᓚᕋᖅᑐᓕᕆᓂᕐᒥᒃ ᐃᓕᖅᑯᓯᓕᕆᓂᕐᒥᒡᓗ.

ᐅᓪᓗᒥ ᓇᓗᓇᐃᖅᑕᐅᔪᖅ $1 ᒥᓕᐊᓐ ᐅᖓᑖᓃᑦᑐᓂᒃ ᑮᓇᐅᔭᖅᑖᖅᑎᑦᑎᓂᐅᓂᐊᖅᐳᖅ, ᐊᑐᖅᖢᒍ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓ, ᐊᒻᒪᓗ ᑕᒪᓐ ᓴᖅᑭᑕᐅᔪᓐᓇᖅᓯᓚᐅᖅᖢᓂ ᐊᑐᖅᖢᒍ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ.  ᐅᑯᐊ ᐱᓕᕆᐊᖑᔪᒃᓴᑦ ᐃᓚᒋᔭᐅᖃᑕᐅᕗᑦ:

• ᔫᑳᓐᒥ ᐃᖅᑭᓖᑦ ᑲᑐᔾᔨᖃᑎᒌᖏᑦ ᑮᓇᐅᔭᖅᑖᖅᑎᑕᐅᓂᐊᖅᑐᑦ $715,800-ᓂᒃ ᔫᑳᓐᒥ ᐃᖅᑭᓖᑦ 2010 ᐱᓕᕆᓂᖏᓐᓄᑦ, ᐃᑲᔪᖅᑕᐅᔪᓐᓇᕐᓂᐊᕐᒪᑕ ᐋᖅᑭᒃᓱᐃᑎᓪᓗᒋᑦ ᓴᖅᑭᑦᑎᓂᐊᖅᑎᓪᓗᒋᓪᓗ ᓄᓇᕐᔪᐊᓕᒫᒥ ᓴᖅᑭᔮᖅᑎᑦᑎᓂᐊᕐᓂᖏᓐᓄᑦ ᖁᕕᐊᓲᑎᖃᕐᓂᐊᕐᓂᖏᓐᓄᓪᓗ ᔫᑳᓐᒥ ᐊᔾᔨᒌᓐᖏᑦᑐᓂᒃ ᐊᓯᖃᓐᖏᑦᑐᓂᒡᓗ ᐃᖅᑭᓕᖕᓂᒃ, ᐃᓕᖅᑯᓯᑐᖃᖏᓐᓂᒃ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᒃᓴᖏᓐᓂᒃ 2010-ᒥ ᐅᑭᐅᒃᑯᑦ ᐱᓐᖑᐊᕕᒡᔪᐊᕐᓂᖅᑕᖃᖅᑎᓪᓗᒍ.
• ᔫᑳᓐ ᒐᕙᒪᖏᑦᑕ ᐳᓚᕋᖅᑐᓕᕆᓂᕐᒧᑦ ᑮᓇᐅᔭᓕᖅᓯᓂᕐᒧᑦ ᐱᓕᕆᐊᖓᑦ ᑮᓇᐅᔭᖅᑖᖅᑎᑕᐅᓂᐊᖅᑐᑦ $245,000-ᓂᒃ ᐋᖅᑭᒃᓱᐃᕙᓪᓕᐊᔪᓐᓇᕐᓂᐊᕐᒪᑕ ᐊᑕᐅᓯᐅᓐᖏᑦᑐᓂᒃ ᐳᓚᕋᖅᑐᓕᕆᓂᕐᒧᑦ ᑐᕌᖓᔪᓂᒃ ᐊᒻᒪᓗ ᓴᓇᕐᕈᑎᒃᓴᖏᓐᓂᒃ, ᓴᖅᑭᔮᒃᑲᓐᓂᕈᓐᓇᖅᓯᓂᐊᕐᒪᑦ ᐳᓚᕋᖅᑐᓕᕆᓂᖅ ᐊᑕᐅᓯᐅᓐᖏᑦᑐᓄᑦ ᐊᕐᕌᒍᓄᑦ, ᐊᒻᒪᓗ ᓴᓐᖏᒃᑎᑉᐹᓪᓕᕈᓐᓇᕐᓂᐊᕐᒪᑦ ᔫᑳᓐᒥᐅᑦ ᐳᓚᕋᖅᑐᓕᕆᓂᕐᒥᒃ ᓂᐅᕐᕈᑎᖃᒃᑲᓐᓂᕋᓱᖕᓂᖏᑦ.
• ᐅᑭᐅᖅᑕᖅᑐᒥ ᐃᓕᖅᑯᓯᑐᖃᓕᕆᔩᑦ ᓱᓴᐃᔭᑎᖏᑦ ᑮᓇᐅᔭᖅᑖᖅᑎᑕᐅᓚᐅᖅᑐᑦ $40,000-ᓂᒃ ᑐᑭᒧᐊᒃᑎᑦᑎᓂᕐᒧᑦ ᐸᕐᓇᐅᓯᐅᕈᓐᓇᕐᓂᐊᕐᒪᑕ ᐊᒻᒪᓗ ᑕᑯᓐᓇᒐᕆᓂᐊᖅᑕᒥᖕᓂᒃ ᐋᖅᑭᒃᓱᐃᔪᓐᓇᕐᓂᐊᕐᒪᑕ, ᓴᖅᑭᔮᖅᑎᑕᐅᓂᖅᓴᐅᓕᕐᓗᑎᒃ ᔫᑳᓐᒥᐅᑦ ᓴᓇᓐᖑᐊᖅᑎᖏᑦ ᐊᒻᒪᓗ ᓴᓇᓐᖑᐊᖃᑦᑕᖅᑕᖏᑦ.

“ᑕᒪᒃᑯᐊ ᐱᕐᔪᐊᑦ ᐱᓕᕆᐊᖑᔪᑦ ᐊᖅᑯᑕᐅᓗᑎᒃ ᑮᓇᐅᔭᓂᒃ ᓴᒡᕙᐃᕕᐅᔪᓐᓇᖅᑐᑦ ᐊᒻᒪᓗ ᐃᑲᔪᖅᓱᖅᑕᐅᓗᑎᒃ ᔫᑳᓐᒥ ᐳᓚᕋᖅᑐᓕᕆᓂᕐᒧᑦ ᐱᖅᑯᓯᓕᕆᓂᕐᒧᓪᓗ ᑐᕌᖓᔪᑦ, ᐃᖅᑲᓇᐃᔮᒃᓴᓂᒡᓗ ᓄᐃᑦᑎᓗᑎᒃ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᐊᑉᓛᓐᔨ.  “ᑕᒪᒃᑯᐊ ᑮᓇᐅᔭᖃᖅᑎᑦᑎᓂᐅᔪᑦ ᐆᒃᑑᑎᑦᑎᐊᕙᐅᕗᑦ ᒐᕙᒪᑦᑕ ᐊᖏᖅᓯᒪᑦᑎᐊᕐᓂᖏᓐᓂᒃ ᐱᕙᓪᓕᐊᑎᑦᑎᒃᑲᓐᓂᕋᓱᖕᓂᕐᒥᒃ ᐱᕈᖅᓴᐃᓂᕐᒥᒡᓗ ᔫᑳᓐᒥ ᐊᔾᔨᒌᓐᖏᑦᑐᓂᒃ ᐱᖃᐅᕐᓂᖓᓂᒃ ᐊᒻᒪᓗ ᐊᔾᔨᐅᓐᖏᑦᑐᒥᒃ ᐱᖅᑯᓯᑐᖃᕐᒥᒃ ᐱᓯᒪᓂᖏᓐᓂᒃ.”

“ᑲᓇᑕ ᐅᐱᑉᐳᖅ ᐃᑲᔪᖅᓱᐃᔪᓐᓇᕋᒥᒃ ᐃᖅᑭᓖᑦ ᐃᓚᐅᑎᑕᐅᓂᐊᕐᓂᖏᓐᓂ ᑮᓇᐅᔭᓕᐅᕋᓱᐊᕐᓂᕐᒥ ᔫᑳᓐᒥ, ᐊᒻᒪᓗ ᓴᖅᑭᔮᖅᑎᑦᑎᓂᐊᕐᓂᖏᓐᓂᒃ ᔫᑳᓐ ᐳᓛᕆᐊᕈᒥᓇᕐᓂᖓᓂᒃ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲ,ᖅ ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᐅᑭᐅᖅᑕᖅᑐᓕᕆᓂᕐᒥᒃ ᐊᒻᒪᓗ ᒥᓂᔅᑕᐅᓪᓗᓂ ᐋᓐᓂᐊᖃᕐᓇᓐᖏᑦᑐᓕᕆᔨᒃᑯᓐᓄᑦ.

"ᑕᒪᓐᓇ ᖁᕕᐊᓇᖅᑐᖅ ᓴᖅᑭᔮᖅᑎᑕᐅᓂᐊᕐᓂᖓ ᐃᑲᔪᖅᑕᐅᔪᓐᓇᕐᓂᖏᓪᓗ 2010-ᒥ ᐱᓐᖑᐊᕕᒡᔪᐊᖅᑎᓪᓗᒋᑦ ᐃᓚᐅᓂᐊᕐᓂᖏᑦ ᔫᑳᓐᒥᐅᑦ ᐃᖅᑭᓕᖏᑦᑕ ᓄᓇᓕᖁᑎᖏᑦ,” ᑕᐃᒪᓐᓇ ᐅᖃᓚᐅᖅᑐᖅ ᐃᖅᑭᓖᑦ ᑲᑐᔾᔨᖃᑎᒌᖏᓐᓄᑦ ᐊᖓᔪᖅᑳᕐᔪᐊᖅ ᐋᓐᑎ ᑳᕕᐅᓪ.  “ᐊᔾᔨᒌᓐᖏᑦᑐᕈᓘᔭᕐᓂᒃ ᓴᖅᑭᔮᖅᑎᑦᑎᓂᐊᖅᑐᒍᑦ ᔫᑳᓐᒥ ᐃᖅᑭᓖᑦ ᓴᓇᓐᖑᐊᖅᑎᖏᓐᓂᒃ ᐊᒻᒪᓗ ᐱᓯᓂᓯᑎᒍᑦ ᑮᓇᐅᔭᓕᐅᕈᑕᐅᒃᑲᓐᓂᕈᓐᓇᕐᓂᐊᖅᑐᓂᒃ ᐃᓄᖁᑎᑦᑎᓐᓄᑦ ᐊᒻᒪᓗ ᓄᓇᖁᑎᑦᑎᓐᓄᑦ ᐊᕐᕌᒍᓄᑦ ᐊᒥᓱᓄᑦ ᐊᒡᒋᖅᑐᓄᑦ."

ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᐊᕐᓂᖅ ᐱᕙᓪᓕᐊᑎᑕᐅᓂᖓᓄᑦ ᑮᓇᐅᔭᑦ ᐊᐅᓚᑕᐅᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐊᒻᒪᓗ ᑐᕌᒐᖃᓗᐊᖅᖢᑎᒃ ᐊᕗᖓᐅᔨᓯᒪᔪᓂᒃ ᑮᓇᐅᔭᓕᐅᕋᓱᐊᕈᑎᒃᓴᓂᒃ ᐱᖓᓱᓂ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓃᑦᑐᓂᒃ.  ᖃᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᑦ ᑐᑭᒧᐊᒃᑎᑦᑎᓂᕐᒥᒃ ᓴᖅᑭᑦᑎᖃᑦᑕᕐᓂᕐᒥᒡᓗ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓕᐊᕆᓯᒪᔭᖏᓐᓂᒃ ᐊᕕᒃᑐᖅᓯᒪᔪᓂ ᐅᑭᐅᖅᑕᖅᑐᒥ, ᐊᒻᒪᓗ ᐱᓕᕆᐊᖃᕆᓪᓗᑎᒃ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᓴᖅᑭᔮᖅᑎᑦᑎᒃᑲᓐᓂᕋᓱᖕᓂᖅ ᐃᓅᓯᓕᕆᓂᕐᒧᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᐅᑭᖅᑕᖅᑐᒥ ᑎᓴᒪᒋᔭᐅᖃᑕᐅᕗᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒥ ᑐᑭᒧᐊᕈᑎᒃᓴᓕᐊᕆᓯᒪᔭᖏᓐᓄᑦ.

ᒐᕙᒪᒃᑯᖏᑦᑕ ᐃᖅᑲᓇᐃᔮᕆᔭᖏᓐᓂᒃ ᓯᕗᒧᐊᒃᑎᑦᑎᕚᓪᓕᐅᑕᐅᓂᐊᖅᑐᖅ ᑲᑎᓐᖓᔾᔫᒥᓕᕐᓂᐊᕐᒪᑕ ᐅᑭᐅᖅᑕᖅᑐᒧᑦ ᑐᑭᒧᐊᕈᑏᑦ ᐊᒻᒪᓗ ᑲᓇᑕᐅᑕᐅᖃᑕᐅᓂᖓ ᐅᑭᐅᖅᑕᖅᑐᖅ ᓇᓗᓇᐃᖅᑕᐅᒃᑲᓐᓂᕐᓗᓂ, ᓴᐳᒻᒥᐅᓯᖅᑕᐅᓗᑎᒡᓗ ᐅᑭᐅᖅᑕᖅᑐᒥ ᐊᕙᑎᓕᕆᓂᕐᒧᑦ ᐃᑦᑕᕐᓂᓴᐃᑦ, ᓴᖅᑭᑎᑕᐅᒃᑲᓐᓂᕐᓗᑎᒃ ᐃᓅᓯᕐᒧᑦ ᑮᓇᐅᔭᓕᐅᕋᓱᐊᕈᑎᓪᓗ ᐊᒻᒪᓗ ᐅᑭᐅᖅᑕᖅᑐᒥ ᐊᐅᓚᑕᐅᓂᖓ ᑎᒍᒥᐊᖅᑕᐅᑦᑎᐊᒃᑲᓐᓂᓕᕐᓗᓂ. 

ᐅᑯᐊ ᓴᖅᑭᑕᐅᔪᑦ ᐊᒻᒪᓗ ᐱᒋᐊᕐᓂᕕᓂᖏᑦᑕ ᐅᓂᒃᑳᖅᓯᒪᓂᖕᑦᑕ ᐊᔾᔨᖏᑦ ᖃᕆᓴᐅᔭᒃᑯᑦ ᐊᑐᐃᓐᓇᐅᔪᑦ ᐅᕘᓇ http://www.north.gc.ca/mr/nr-eng.asp.
ᑐᑭᓯᒋᐊᒃᑲᓐᓂᕈᒪᒍᕕᑦ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᐃᔾᔭᐃᔾᔪᑏᑦ ᐸᕐᓇᐅᑎᖏᓐᓂᒃ, ᐅᓇ ᑕᑯᒋᐊᕈᓐᓇᖅᑕᐃᑦ ᐊᒻᒪᓗ ᑐᑭᓯᒋᐊᒃᑲᓐᓂᕈᒪᒍᕕᑦ ᑲᓇᑕᒥ ᐅᑭᐅᖅᑕᖅᑐᒧᑦ ᑐᑭᒧᐊᕈᑎᖏᓐᓂᒃ, ᑕᑯᒋᐊᕐᓗᒍ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᒥᓯᐅᓪ ᔭᐅ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
819-997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᓴᐅᒪᔾᔪᑎᓕᕆᔨᖏᑦ
ᒪᕆ-ᓗᐃᔅ ᐳᐃᓚᓐ
ᑐᓴᐅᒪᔾᔪᑎᓕᕆᓂᕐᒧᑦ ᑲᒪᔨᑦ ᐊᖓᔪᖅᑳᖓᑦ
(867) 667-3854

ᔫᑳᓐᒥ ᐃᖅᑭᓖᑦ 2010
ᐹᑎ ᐸᓪᓯᓕ, CAE
ᐊᐅᓚᑦᓯᔨ, ᓂᐅᕐᕈᑎᖃᕋᓱᐊᕐᓂᕐᒧᑦ ᑐᓴᐅᒪᔾᔪᑎᓕᕆᓂᕐᒧᓪᓗ
(867)334-2522
patti@navigonet.com

ᔫᑳᓐ ᒐᕙᒪᖏᑦ
ᑭᐅᕋᓐ ᑮᓕ
ᑐᓴᐅᒪᔾᔪᑎᓕᕆᓂᕐᒧᑦ, ᐳᓚᕋᖅᑐᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ
(867) 667-8304

Sundog Carving Studio ᓴᓇᓐᖑᐊᒐᐃᕐᕕᒃ
ᕼᐊᑐ ᕕᓐᑕᓐ
ᐅᑭᐅᖅᑕᖅᑐᒥ ᐃᓕᖅᑯᓯᓕᕆᔩᑦ ᑲᑐᔾᔨᖃᑎᒌᖏᑦ
(867) 633-4183