ᓄᓇᑦᓯᐊᕐᒥ ᒪᑲᓐᔨ ᕚᒥᐅ ᐊᖅᑯᑎᕐᔪᐊᖓᑕ ᑮᓇᐅᔭᖅᑐᕐᓂᐊᕐᓂᖓ ᖃᐅᔨᓴᖅᑕᐅᕗᖅ - ᕆᒡᓕᒥᑦ ᑕᒻᔅᑑ ᐊᖅᑯᑎᕐᔪᐊᖓᓄᑦ

ᑲᓇᑕᐅ ᐅᑭᐅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐊᖏᖅᓯᕗᖅ $3 ᒥᓕᐊᓐᓂᒃ ᑮᓇᐅᔭᖅᑖᖅᑎᑦᑎᓂᐊᕐᓂᕐᒥᖕᓂᒃ ᐊᕐᕌᒎᖕᓄᑦ ᐅᖓᑖᓄᑦ, ᐊᑐᖅᑕᐅᓪᓗᑎᒃ ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ, ᖃᐅᔨᓴᖅᑕᐅᔪᓐᓇᕐᓂᐊᕐᒪᑦ ᖃᔅᓯᕌᕋᔭᓐᖑᐊᕐᓂᐊᕐᒪᖔᖓ ᓴᓇᒍᑎᒃ ᒪᑲᓐᔨ ᕚᓕᐅ ᐊᖅᑯᑎᕐᔪᐊᖓᓐᓂᑦ ᕆᒡᓕᒧᑦ ᑕᒻᔅᑑ ᐊᖅᑯᑎᕐᔪᐊᖓᓄᑦ ᑎᑭᓪᓗᒍ ᐃᓅᕕᐅ ᖃᓂᒋᔮᓄᑦ.

ᑖᓐᓇ ᖃᐅᔨᓴᐃᓂᖅ ᐃᓚᒋᔭᐅᖃᑕᐅᓂᐊᖅᑐᖅ ᒥᑭᓐᓂᖅᓴᓄᑦ ᖃᐅᔨᓴᐅᑕᐅᓚᐅᖅᑐᓄᑦ ᖃᔅᓯᕌᕋᔭᖕᒪᖔᖏᑦ, ᑮᓇᐅᔭᖃᖅᑎᑕᐅᔪᕕᓂᕐᓂᒃ ᓯᑎᐱᕆ 2009-ᒥ, ᓴᓇᔪᒪᓪᓗᑎᒃ ᐊᖅᑯᑎᕐᔪᐊᑉ ᐃᓚᖓᓂᒃ ᐅᐊᖕᓇᖓᓃᓐᓂᕐᒥ, ᐃᓅᕕᖕᒥᑦ ᑐᒃᑑᔭᖅᑑᕐᒧᑦ ᓯᒡᔭᒦᑦᑐᒧᑦ ᓄᓇᓕᖕᒧᑦ.  ᑕᒪᒃᑮᒃ ᐊᕐᕌᒎ ᐃᓗᐊᓂ ᐊᑐᖅᑕᐅᖏᓐᓇᖃᑦᑕᕐᓂᐊᖅᑐᖅ ᐊᖅᑯᑦ ᑲᑎᑎᑦᑎᓇᔭᖅᑐᖅ ᒫᓐᓇ ᑕᒻᔅᑐ ᐊᖅᑯᑎᕐᔪᐊᖓᓄᑦ.

ᓄᑖᑦ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᓄᓇᑦᓯᐊᑉ ᒐᕙᒪᒃᑯᖏᑦᑕ ᐃᖏᕐᕋᔾᔪᑎᓕᕆᔨᒃᑯᖏᓐᓄᑦ, ᐋᖅᓱᐃᓗᑎᒃ ᐃᓗᓕᖃᐅᑦᑎᐊᖅᑐᓂᒃ ᐱᓕᕆᐊᖑᓂᐊᖅᑑᑉ ᖃᓄᐃᓕᖓᓂᐊᕐᓂᖓᑕ ᐅᓂᒃᑳᖏᓐᓂᒃ.  ᑖᒃᑯᐊ ᐱᓕᕆᐊᖑᓂᐊᖅᑑᑉ ᖃᓄᐃᓕᖓᓂᐊᕐᓂᖓᑕ ᐅᓂᒃᑳᑦ ᐃᓗᓕᖃᐅᕐᓂᐊᖅᑐᑦ ᐊᕙᑎᓕᕆᓂᕐᒨᖓᔪᓂᒃ ᐊᒻᒪᓗ ᐱᑐᐃᓐᓇᐅᓐᖏᑦᑐᑦ ᖃᓄᖅ ᑲᒪᒋᔭᐅᓂᐊᕐᒪᖔᖏᑦ, ᐃᑲᔫᑕᐅᔪᓐᓇᕐᓂᐊᕐᒪᑕ ᒪᓕᒐᓕᕆᔨᑦ ᖃᓄᖅ ᐊᒃᑐᐃᓂᖃᕐᓂᐊᕐᒪᖔᖓᓂᒃ ᓴᓇᔭᐅᔪᒪᔪᖅ.  ᐃᓗᓕᖃᐅᕈᓐᓇᖅᑐᑦ ᓲᕐᓗ ᖃᓄᖅ ᑕᒪᓐᓇ ᐃᖅᑲᓇᐃᔮᕆᔭᐅᓂᐊᕐᒪᖔᖓ, ᓴᐅᒃᑰᕐᓂᐊᕐᒪᖔᖓ ᐊᖅᑯᑎᕐᔪᐊᓕᐊᕆᔭᐅᔪᒪᔪᑦ, ᐊᑭᑐᔪᖅᑐᕈᑏᑦ ᖃᔅᓯᕌᕋᔭᓐᖑᐊᕐᓂᐊᕐᒪᖔᖏᑦ. ᓯᕗᓪᓕᖅᐹᖅᓯᐅᑏᑦ ᐱᓕᕆᐊᑉ ᖃᓄᐃᑦᑐᒥᒃ ᑕᐅᑦᑐᖃᕐᓂᐊᕐᒪᖔᖓ ᐊᒻᒪᓗ ᐱᓕᕆᐊᖑᓂᐊᖅᑐᑦ ᐱᔭᕇᖅᑕᕐᕕᒃᓴᖏᑦ, ᓄᓇᐅ ᖃᐅᔨᓴᖅᑕᐅᓂᖓ ᓄᓇᓐᖑᐊᓕᕆᓂᕐᓗ, ᐊᕙᑎᓕᕆᓂᕐᒧᑦ ᑐᓐᖓᕕᒋᔭᐅᓂᐊᖅᑐᑦ, ᐊᒃᑐᐃᓂᐊᕐᓂᕐᒧᑦ ᐊᐅᓚᑦᑎᔾᔪᑏᑦ ᐊᒻᒪᓗ ᐃᖢᐊᖅᓯᒋᐊᕈᑏᑦ, ᑕᖅᑲᒃᑯᓂᖓ ᐃᓄᓕᒫᖅᑎᑦᑎᓂᖅ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᑦ.  ᐱᓕᕆᐊᖑᓂᐊᖅᑑᑉ ᖃᓄᐃᓕᖓᓂᐊᕐᓂᖓᑕ ᐅᓂᒃᑳᖏᑦ ᐃᑲᔫᑕᐅᓂᐊᖅᑐᑦ ᒐᕙᒪᒃᑯᓐᓄᑦ ᐊᒻᒪᓗ ᐊᒃᑐᖅᑕᐅᓂᐊᖅᑐᓄᑦ, ᓇᓗᓇᐃᔭᐃᑎᓪᓗᒋᑦ ᖃᐅᔨᓴᐃᑎᓪᓗᒋᓪᓗ ᐊᑭᑐᔪᖅᑐᕈᑎᒃᓴᑦ ᑮᓇᐅᔭᖅᑐᕈᑎᒃᓴᖏᑦ, ᐱᔭᕇᖅᑕᕐᕕᒃᓴᑦ, ᖃᔅᓯᓂᒃ ᐃᖅᑲᓇᐃᔭᖅᑎᑦᑎᔭᕆᐊᖃᕐᓂᐊᕐᒪᖔᖏᑦ, ᐊᕙᑎᐅᑉ ᐊᒃᑐᖅᑕᐅᓂᖓ ᐊᒻᒪᓗ ᐱᑐᐃᓐᓇᓐᖏᑦᑐᓄᑦ ᑐᕌᖓᔪᑦ ᐊᒻᒪᓗ ᐃᓅᓯᕐᒧᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᐊᒃᑐᐃᓂᖃᕐᓂᐊᖅᑐᑦ ᐃᑲᔫᓯᐊᖅᑖᖑᓂᐊᖅᑐᓪᓗ.

ᐊᖅᑯᑎᕐᔪᐊᓕᐊᖑᔪᒪᔫᑉ ᐃᓂᒃᓴᖓ ᐃᑳᕐᓂᐊᕐᓂᖓ ᒍᕆᑦᓯᓐ ᓄᓇᖁᑎᖏᓐᓂᒃ, ᓵᑑ ᓄᓇᖁᑎᖏᓐᓂᒃ, ᑕᐃᑦᓲ ᓄᓇᑖᕆᔪᒪᔭᖏᓐᓂᒃ ᐊᒻᒪᓗ ᑲᓇᑕᐅᑉ ᓄᓇᖁᑎᖏᓐᓂᒃ, ᑕᒪᓐᓇ ᐱᓕᕆᐊᖑᔪᒪᔪᖅ ᐊᐅᓚᑕᐅᓂᐊᖅᑐᖅ ᓄᓇᑦᓯᐊᑉ ᒐᕙᒪᒃᑯᖏᑦᑕ ᐃᖏᕐᕋᔾᔪᑎᓕᕆᔨᒃᑯᖏᓐᓄᑦ, ᐃᑲᔪᖅᑕᐅᓗᑎᒃ ᓄᓇᑖᖃᑕᐅᓯᒪᔪᑦ ᑎᒥᖁᑎᖏᓐᓄᑦ ᐊᒻᒪᓗ ᐊᓯᖏᓐᓄᑦ ᐃᑲᔪᖅᑎᒋᔭᐅᔪᒪᔪᓄᑦ, ᐃᓚᓕᐅᓪᓗᒍ ᓄᓇᓕᖕᓂ ᒐᕙᒪᒋᔭᐅᔪᑦ.  ᑕᒪᒃᑯᐊ ᐊᔾᔨᐅᓐᖏᑦᑐᑦ ᑲᑐᔾᔨᖃᑎᒌᖕᓂᐊᖅᑎᓪᓗᒋᑦ ᐊᓯᖏᓐᓄᑦ ᐱᓕᕆᐊᓄᑦ ᑕᐃᒪᓐᓇ ᑲᑐᔾᔨᖃᑎᒌᖕᓃᑦ ᐊᑐᖅᑕᐅᖃᑦᑕᕈᓐᓇᕐᒥᔪᑦ.

ᐃᑲᔫᑏᑦ ᓂᕆᐅᒋᔭᐅᔪᑦ ᐱᐅᓯᕚᓪᓕᖅᐸᑕ ᐊᕐᕌᒎ ᐃᓗᐊᓂ ᐃᖏᕐᕋᔾᔪᑏᑦ ᐊᑐᖅᑕᐅᖃᑦᑕᕈᓐᓇᖅᓯᓂᐊᕐᓂᖏᓐᓂᒃ, ᐃᓚᖃᖅᖢᑎᒃ ᑮᓇᐅᔭᖅᑐᕈᑏᑦ ᐊᑭᓪᓕᒋᐊᕐᓂᐊᕐᓂᖏᑦ ᓯᕗᓂᒃᓴᒥ ᓄᓇᒥᐅᑕᓕᕆᓕᕈᑎᒃᓗ ᐅᓄᖅᓯᕚᓪᓕᕐᓂᐊᖅᑐᑦ ᓄᓇᒥᐅᑕᓂᒃ ᕿᓂᕐᓃᑦ; ᐅᓄᖅᓯᒃᑲᓐᓂᕐᓗᑎᒃ ᐳᓚᕋᖅᑏᑦ; ᐱᐅᓯᒃᑲᓐᓂᕐᓗᑎᒃ ᑕᕆᐅᒃᑯᑦ ᐃᖏᕐᕋᔾᔪᑎᓕᕆᓂᖅ ᐊᒻᒪᓗ ᑐᓚᒃᑕᕐᕕᓕᐅᕐᓂᖅ; ᐊᒻᒪᓗ ᑐᕌᖓᔪᒃᑯᑦ ᑐᕌᖓᓪᓚᕆᓐᖏᑦᑐᒃᑯᓪᓗ ᐃᖅᑲᓇᐃᔮᒃᓴᑦ ᓄᐃᓐᓂᖏᑦ ᐊᒻᒪᓗ ᐱᓯᓂᓯᑖᖑᔪᓐᓇᖅᑐᑦ ᒪᐅᖓᑦᑎᐊᖅ ᐊᒻᒪᓗ ᐊᕗᖓᐅᔨᓯᒪᔪᒃᑯᑦ.

ᐃᓗᓕᖃᐅᖅᑐᑦ ᒪᑲᓐᔨ ᕚᓕᒥᑦ ᖃᖓᑐᐃᓐᓇᖅ ᐊᑐᖅᑕᐅᔪᓐᓇᖅᑐᑦ ᐊᖅᑯᑦ ᖃᐅᔨᓴᖅᑕᐅᓂᖓ (ᓄᓇᖅᓯᐊᑉ ᒐᕙᒪᒃᑯᖏᑦᑕ ᐃᖏᕐᕋᔾᔪᑎᓕᕆᔨᖏᑦ, ᓯᑎᐱᕆ 16, 2009) ᓇᓂᖅᑯᑕᖅᓯᒪᕗᑦ ᖃᔅᓯᓂᒃ ᐃᖅᑲᓇᐃᔮᒃᓴᓂᒃ ᓄᐃᑦᑎᓂᐊᕐᒪᖔᖏᑦ ᓯᕗᓂᒃᓴᒥ ᐊᖅᑯᑦ ᓴᓇᔭᐅᓂᖓᒍᑦ ᐊᒻᒪᓗ ᑲᒪᒋᔭᐅᖏᓐᓇᕆᐊᖃᕐᓂᐊᕐᓂᖓᒍᑦ:

• 7,785 ᐊᑕᐅᓯᐊᕐᓗᑎᒃ ᓄᐃᓐᓂᐊᖅᑐᑦ ᐃᖅᑲᓇᐃᔮᑦ ᓄᓇᑦᓯᐊᕐᒥ
• 6,297 ᐊᑕᐅᓯᐊᕐᓗᑎᒃ ᓄᐃᓐᓂᐊᖅᑐᑦ ᐃᖅᑲᓇᐃᔮᑦ ᑲᓇᑕᒥ
• 78 ᐊᕗᖓᐅᔨᓯᒪᓂᐊᖅᑐᑦ ᐃᖅᑲᓇᐃᔮᑦ ᓄᓇᑦᓯᐊᕐᒥ ᐊᒻᒪᓗ 15 ᑲᓇᑕᒥ ᐊᓯᖏᓐᓂ
• 128 ᐊᕗᖓᐅᔨᓯᒪᓂᐊᖅᑐᑦ ᐃᖅᑲᓇᐃᔮᑦ ᓄᓇᑦᓯᐊᕐᒥ ᐊᒻᒪᓗ 33 ᑲᓇᑕᒥ ᐊᓯᖏᓐᓂ ᑲᒪᒋᔭᐅᖃᑦᑕᕆᐊᖃᕐᓂᐊᕐᓂᖓᓄᑦ ᐊᖅᑯᑦ

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ

ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᑦ ᑖᒃᑯᓄᖓ ᐊᑐᖅᑐᒃᓴᑦ ᑮᓇᐅᔭᖃᖅᑎᑕᐅᓂᐊᖅᑐᑦ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ.  ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ ᐊᑐᐃᓐᓇᕈᐃᓯᒪᕙᒃᐳᑦ $1 ᐱᓕᐊᖏᓐᓃᑦᑐᓂᒃ ᑲᓇᑕᓕᒫᒧᑦ ᑐᕌᖓᔪᑦ ᑮᓇᐅᔭᓕᐅᕋᓱᐊᕈᑏᑦ ᒪᑭᒃᑲᓐᓂᕈᓐᓇᕐᓂᐊᕐᒪᑕ ᐃᖅᑲᓇᐃᔮᓂᒡᓗ ᓄᐃᑦᑎᓗᑎᒃ ᓄᓇᓖᑦ ᐊᒃᑐᖅᑕᐅᓗᐊᓐᖑᐊᖅᑐᕕᓃᑦ ᑮᓇᐅᔭᑦ ᑲᑕᐅᒥᓯᒪᓚᐅᖅᑎᓪᓗᒋᑦ.  ᐊᕗᖓᐅᔨᓯᒪᔪᑦ ᑮᓇᐅᔭᓕᐅᕋᓱᐊᕈᑏᑦ ᐊᒻᒪᓗ ᐊᕙᑎᒧᑦ ᐃᑲᔫᑏᑦ ᑮᓇᐅᔭᖃᖅᑎᑕᐅᔪᓐᓇᕐᒥᔪᑦ ᑕᒪᑐᒨᓇ.  ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᒐᕙᒪᖃᕐᕖᑦ ᐱᖓᓱᑦ ᑮᓇᐅᔭᓂᒃ ᐊᑐᐃᓐᓇᕈᐃᕕᐅᕗᑦ $32.8 ᒥᓕᐊᓐᖏᓐᓃᑦᑐᑦ 2011-ᖑᕋᓱᐊᕐᓂᖓᓄᑦ.

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐃᓚᒋᔭᐅᖃᑕᐅᕗᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᓕᕆᐊᓐᖑᖅᑎᑕᐅᓯᒪᔪᓄᑦ, ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᐱᔭᒃᓴᖅᑖᕆᓯᒪᓪᓗᓂᔾᔪᒃ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐅᑯᐊ ᓇᓗᓇᐃᖅᑕᐅᓂᖏᑦᑎᒍᑦ ᓴᓐᖏᒃᑎᑉᐹᓪᓕᐅᑕᐅᑐᐃᓐᓇᖅᐳᑦ ᑲᓇᑕᐅᑉ ᒐᕙᒪᒃᑯᖏᑦᑕ ᓯᕗᒧᐊᒃᑎᓐᓇᓱᒃᑕᖏᑦ ᐅᑭᐅᖅᑕᖅᑐᖅ ᑲᓇᑕᒥᐅᑕᐅᖃᑕᐅᓂᖓᓂᒃ,  ᓴᐳᒻᒥᐅᓯᖅᑕᐅᓯᒪᓪᓗᑎᒃ ᐅᑭᐅᖅᑕᖅᑐᒥ ᐊᕙᑎᑦᑎᓐᓂ ᐃᑦᑕᕐᓂᓴᑦ, ᒪᖅᑭᔮᖅᑎᑦᑎᒃᑲᓐᓂᕐᓂᖅ ᐃᓅᓯᕐᒧᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᐱᕚᓪᓕᐅᑏᑦ ᐊᒻᒪᓗ ᐱᕈᓐᓇᐃᓗᑎᒃ ᓴᓐᖏᓂᕐᓂᒡᓗ ᑐᓂᐅᖅᑲᐃᓗᑎᒃ ᐅᑭᐅᖅᑕᖅᑑᑉ ᐊᐅᓚᑕᐅᔾᔪᓯᖏᓐᓂᒃ.