ᕚᕉᑉ ᓄᓇᖓ ᑲᔾᔮᕐᓇᖅᓴᖅᑕᐅᕗᖅ

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐊᖏᖅᓯᕗᑦ $700,000-ᓂᒃ ᑮᓇᐅᔭᖃᖅᑎᑦᑎᓂᐊᖅᖢᑎᒃ ᔫᑳᓐ ᒐᕙᓚᒃᑯᖏᓐᓂᒃ, ᕚᕉᑉ ᓄᓇᖓᓂ ᑲᔾᔮᕐᓇᖅᓴᐃᔪᓐᓇᕐᓂᐊᕐᒪᑕ.  ᑕᒪᓐᓇ ᐱᓕᕆᐊᖅ ᐊᖅᑯᑕᐅᓗᓂ ᓴᖅᑭᑦᑎᓂᐊᖅᑐᑦ ᓄᓇᓖᑦ ᐃᓗᐊᓂ ᐃᖅᑲᓇᐃᔮᓂᒃ, ᓄᑖᓐᖑᕆᐊᖅᑕᐅᓗᓂ ᐅᐸᒃᑕᖅᑕᐅᓗᐊᖅᑐᖅ ᕚᕉ ᐃᓗᐊᓃᑦᑐᑦ ᐊᒻᒪᓗ ᑲᔾᔮᕐᓇᖅᓴᖅᑕᐅᓗᓂ ᕚᕉᑉ ᑕᐅᓐᖓ ᓄᓇᖅᑲᑎᒌᓄᑦ ᐊᒻᒪᓗ ᐳᓛᖅᑎᓄᑦ.

ᕚᕈᒥ ᐃᒡᓗᑐᖃᕕᓃᑦ ᐲᔭᖅᑕᐅᓂᐊᕐᓂᖏᑦ
ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓂᓐᖔᖅᑐᑦ:: $700,000

ᕚᕈᒥ ᐅᔭᕋᒃᓯᐅᕐᕕᕕᓂᖅ ᐃᒃᓯᓐᓇᖅᑕᐅᓚᐅᖅᓯᒪᑎᓪᓗᒍ, ᐊᑕᐅᓯᐅᓐᖏᑦᑐᑦ ᐃᒡᓗᑐᖃᕕᓃᑦ ᓱᓕ ᒪᑭᑕᔪᑦ, ᐊᒻᒪᓗ ᐊᕐᕌᒍᒐᓴᖕᓄᑦ ᐃᒃᓯᓐᓇᑯᒋᔭᐅᓯᒪᓕᖅᖢᑎᒃ.  ᕚᕉ ᑕᐅᓐᖓ ᑕᒪᒃᑯᓂᖓ ᓇᖕᒥᓂᓖᑦ ᓄᓇᓕᖕᓄᑦ ᑖᒃᓰᔭᐃᕝᕕᐅᓚᐅᖅᓯᒪᓐᖏᓐᓂᖏᑦ ᐱᔾᔪᑎᒋᓪᓗᒋᑦ.

ᑕᐅᓐᑯᑦ ᐊᖏᖅᓯᒪᑦᑎᐊᖅᐳᑦ ᒪᑭᑕᑦᑎᐊᕈᓐᓇᖅᑐᓂᒃ ᐆᒻᒪᕆᐊᕈᑎᓂᒃ ᐱᑕᖃᖁᔨᓪᓗᑎᒃ ᓄᓇᒥᑕ ᐃᓗᐊᓂ, ᐊᒻᒪᓗ ᐅᔾᔨᕈᓱᑦᑎᐊᖅᐳᑦ ᐋᓐᓂᐊᖃᕐᓇᓐᖏᓐᓂᖅ, ᐊᑦᑕᓇᔾᔭᐃᖅᓯᒪᓂᖅ ᐊᒻᒪᓗ ᑲᔾᔮᕐᓇᕆᐊᖃᕐᓂᐅᑉ ᐱᒻᒪᕆᐅᓂᖓ, ᐱᔾᔪᑎᒋᓪᓗᒋᑦ ᑕᒪᒃᑯᐊ ᐃᒃᓯᓐᓇᑯᑦ ᓄᑕᐅᓐᖏᑦᑐᑦ ᐃᒡᓗᕐᔪᐊᑦ.

ᑕᒪᓐᓇ ᐱᓕᕆᐊᖑᔪᖅ ᒪᓕᒃᓯᒪᑐᐃᓐᓇᖅᑐᖅ ᕚᕉᑉ ᑕᐅᓐᑯᖏᑦᑕ ᑲᑎᓐᖓᔪᓂᒃ ᓄᓇᓕᖕᓂ ᒪᑭᑉᐹᓪᓕᐅᑎᒃᓴᖏᑦᑕ ᐸᕐᓇᐅᑎᖏᓐᓂᒃ, ᐳᓚᕋᖅᑐᓕᕆᓂᖅ ᓵᓐᖓᔭᐅᓗᐊᕐᓂᐊᕐᒪᑦ ᑮᓇᐅᔭᓕᐅᕋᓱᐊᕈᑕᐅᓗᓂ.  ᐃᑲᔪᖅᓱᐃᒋᕗᖅ ᕚᕉᑉ ᒪᑭᒪᑦᑎᓂᖏᓐᓂᒃ ᐅᓄᕈᓐᓃᖅᑎᑉᐹᓪᓕᕆᐊᕐᓗᒋᑦ ᐃᒡᓗᑐᖃᐃᑦ ᐃᒃᓯᓐᓇᑯᑦ ᐊᒻᒪᓗ ᐳᓚᕋᖅᑎᓄᑦ ᐅᐸᒍᒥᓇᖅᓯᑎᒋᐊᒃᑲᓐᓂᕐᓗᒍ.  ᑕᒪᓐᓇ ᐱᓕᕆᐊᖅ ᐊᖅᑯᑕᐅᓗᓂ ᐅᔾᔨᕈᓕᖅᐹᓪᓕᕐᓂᐊᖅᑐᑦ ᒫᓐᓇ ᓴᖅᑭᔮᖅᐸᒌᖅᑐᑦ ᐊᑑᑎᖃᒃᑲᓐᓂᕈᓐᓇᕐᓂᖏᓐᓂᒃ, ᐃᓚᓕᐅᓪᓗᒍ ᑕᑯᔭᒐᖃᕐᕕᒃ, ᑎᓇᑦᓲ ᐃᒡᓗᓂᑐᖄ ᕌᔅ ᕆᕙ (Ross River) ᐊᒻᒪᓗ ᕚᕉᑉ ᐊᑯᓐᓂᐊᓃᑦᑐᖅ, ᓄᓇᓕᖕᓂ ᒑᓪᕕᕐᕕᒃ ᐊᒻᒪᓗ ᐱᓗᐊᓐᖑᐊᕐᓗᒍ, ᕚᕉᑉ ᓄᓇᖓᑕ ᑲᔾᔮᕐᓇᖅᑐᐊᓘᓂᖓ.

ᔫᑳᓐ ᒐᕙᒪᒃᑯᖏᑦᑕ ᐱᓕᕆᕝᕕᖓ ᐆᒻᒪᖅᑯᑎᓕᕆᓂᕐᒧᑦ, ᐅᔭᕋᖕᓂᐊᕐᓂᓕᕆᓂᕐᒧᑦ ᐊᒻᒪᓗ ᓄᓇᒥᐅᑕᓕᕆᓂᕐᒧᑦ ᐊᐅᓚᑦᓯᓂᐊᖅᑐᑦ ᑕᒪᑐᒥᖓ ᐱᓕᕆᐊᖑᔪᒥᒃ, ᐊᒻᒪᓗ ᑲᒪᔨᐅᓂᐊᖅᖢᑎᒃ ᖃᐅᑕᒫᖅᓯᐅᑎᓂᒡᓗ ᐊᐅᓚᑦᓯᔨᐅᓂᐊᖅᖢᑎᒃ ᑕᒪᒃᑯᐊ ᐃᒃᓯᓐᓇᑯᕕᓃᑦ ᐲᔭᖅᑕᐅᑎᓪᓗᒋᑦ.  ᐆᒻᒪᖅᑯᑎᓕᕆᓂᕐᒧᑦ, ᐅᔭᕋᖕᓂᐊᕐᓂᓕᕆᓂᕐᒧᑦ ᐊᒻᒪᓗ ᓄᓇᒥᐅᑕᓕᕆᓂᕐᒧᑦ ᐱᓕᕆᕝᕕᐊ ᐃᖅᑲᓇᐃᔭᖃᑎᖃᕐᓂᐊᖅᑐᖅ ᔫᑳᓐᒥ ᐊᕙᑎᓕᕆᔨᒃᑯᓐᓂᒃ, ᑕᒪᒃᑯᐊ ᐃᒃᓯᓐᓇᑯᕕᓃᑦ ᐊᒃᑕᖅᑕᐅᑦᑎᐊᕐᓂᐊᕐᒪᑕ ᒪᓕᒐᓂᒃ ᒪᓕᒡᓗᑎᒃ.

ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ

ᑖᒃᑯᐊ ᐱᓕᕆᐊᖑᔪᒪᔪᑦ ᑮᓇᐅᔭᖃᖅᑎᑕᐅᓂᐊᖅᑐᑦ ᐃᓚᒋᔭᐅᖃᑕᐅᑎᑕᐅᓪᓗᑎᒃ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦᑎᒍᑦ, ᒪᕐᕉᖕᓄᑦ ᐋᖅᑭᒃᑕᐅᓯᒪᔪᖅ, $1 ᐱᓕᐊᖑᓪᓗᑎᒃ ᑮᓇᐅᔭᓕᐅᕋᓱᐊᕈᑏᑦ ᒪᑭᒃᑲᓐᓂᕈᓐᓇᕐᓂᐊᕐᒪᑕ ᐃᖅᑲᓇᐃᔮᓂᒡᓗ ᓄᐃᑦᑎᓗᑎᒃ ᓄᓇᓖᑦ ᐊᒃᑐᖅᑕᐅᓗᐊᓐᖑᐊᖅᑐᕕᓃᑦ ᑮᓇᐅᔭᑦ ᑲᑕᐅᒥᓯᒪᓚᐅᖅᑎᓪᓗᒋᑦ. ᐊᒻᒪᓗ ᓴᖅᑭᔮᖅᑎᑦᑎᒃᑲᓐᓂᕐᓗᑎᒃ ᐊᔾᔨᒌᓐᖏᑦᑐᓂᒃ ᑮᓇᐅᔭᓕᐅᕈᑕᐅᔪᓐᓇᖅᑐᓂᒃ ᑕᒪᒃᑯᓄᖓ ᓄᓇᓕᖕᓄᑦ.  ᐊᕗᖓᐅᔨᓯᒪᔪᑦ ᑮᓇᐅᔭᓕᐅᕈᑎᒃᓴᓄᑦ ᐊᕙᑎᒧᓪᓗ ᐃᑲᔫᑎᒃᓴᑦ ᑮᓇᐅᔭᖃᖅᑎᑕᐅᔪᓐᓇᕐᒥᔪᑦ ᑕᕝᕘᓇ.  ᓄᓇᓕᖕᓂ ᐋᖅᑭᒋᐊᕆᓂᕐᒧᑦ ᑮᓇᐅᔭᑦ ᐃᓚᒋᔭᐅᖃᑕᐅᕗᑦ ᐊᔾᔨᒌᓐᖏᑦᑐᓄᑦ ᐱᓕᕆᐊᓐᖑᖅᑎᑕᐅᓯᒪᔪᓄᑦ ᐊᐅᓚᑕᐅᔪᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᓄᓇᑦᓯᐊᕐᒥ, ᔫᑳᓐᒥ ᐊᒻᒪᓗ ᓄᓇᕗᒻᒥ.