ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᓱᐃᕗᑦ ᓄᓇᓐᖑᐊᓕᕆᓂᕐᒥᒃ ᔫᑳᓐᒥ

CanNor-09-14

ᕙᐃᑦᕼᐅᐊᔅ, ᔫᑳᓐ (ᓄᕕᐱᕆ 24, 2009) –  ᓴᒃ ᔅᑐᕌᓪᒥᒃ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐊᒻᒪᓗ ᐋᑦᓯ ᓛᖕ, ᔫᑳᓐᒥ ᒥᓂᔅᑕᕆᔭᐅᔪᖅ ᐆᒻᒪᖅᑯᑎᓕᕆᓂᕐᒧᑦ, ᐅᔭᕋᖕᓂᐊᕐᓂᓕᕆᓂᕐᒧᓪᓗ, ᐅᓪᓗᒥ ᓇᓗᓇᐃᖅᓯᖅᑲᐅᕘᒃ ᑮᓇᐅᔭᖃᖅᑎᑦᑎᓂᐊᕐᓂᕐᒥᖕᓂᒃ ᓄᓇᓐᖑᐊᓕᕆᓂᕐᒧᑦ ᖃᐅᔨᓴᐃᓂᐅᓂᐊᖅᑐᓂᒃ ᔫᑳᓐᒻ, 7-ᖑᓂᐊᖅᖢᑎᒃ ᓵᓐᖓᔭᐅᓪᓗᐊᑕᕐᓂᐊᖅᑐᑦ.  ᑕᒪᓐᓇ ᐱᒋᐊᖅᑎᑕᐅᓯᒪᔪᖅ ᐊᑐᖅᑕᐅᓪᓗᑎᒃ ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ, ᐊᒻᒪᓗ ᓯᕗᓂᒃᓴᑦᑎᓐᓂ ᑲᔪᖏᖅᓴᐅᑕᐅᒃᑲᓐᓂᕐᓂᐊᖅᖢᑎᒃ ᓄᓇᒥᐅᑕᓂᒃ ᕿᓂᕐᓂᕐᒧᑦ ᐊᒻᒪᓗ ᐱᖁᑎᕐᔪᐊᕐᓂᒃ ᓴᖅᑭᑦᑎᓂᐊᕐᓂᕐᒥᒃ ᔫᑳᓐᒥ.

“ᖃᐅᔨᒪᓂᕗᑦ ᐊᒻᒪᓗ ᐃᖅᑲᓇᐃᔭᖅᑎᖃᐅᕐᓂᖅ ᓄᓇᓐᖑᐊᓕᕆᓂᒃᑯᑦ ᑐᓴᐅᒪᔾᔪᑎᓕᐅᖅᑎᓂᒃ ᐃᑲᔪᖅᓲᑕᐅᓪᓚᕆᖕᓂᐊᖅᑐᖅ ᐊᕗᖓᐅᔨᓯᒪᔪᒥᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕈᖅᓴᐅᑕᐅᓂᐊᖅᑐᓂᒃ ᔫᑳᓐᒧᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᔅᑐᕌᓪ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ.  “ᑕᐃᒪᐃᑦᑐᑦ ᐱᓕᕆᐊᑦ ᑮᓇᐅᔭᓂᒃ ᐃᓕᓯᕝᕕᐅᕙᒃᐳᑦ ᐅᑭᐅᖅᑕᖅᑐᒥ ᓯᕗᓂᒃᓴᑦᑎᓐᓂ ᑮᓇᐅᔭᓕᐅᖅᐸᓪᓕᐊᓂᐊᕐᓂᖓ ᐃᓱᒪᒋᓪᓗᒍ, ᐊᒻᒪᓗ ᐃᑲᔫᑕᐅᓂᐊᖅᖢᑎᒃ ᐱᓕᒻᒪᒃᓴᐃᓂᐊᕐᓂᑦᑎᓐᓄᑦ ᐊᒻᒪᓗ ᐅᑭᐅᖅᑕᖅᑐᒥᐅᓄᑦ ᐃᖅᑲᓇᐃᔮᓂᒃ ᓴᖅᑭᑦᑎᕙᓪᓕᐊᓂᐊᕐᓂᑦᑎᓐᓄᑦ.”

“ᒪᑭᒪᔪᓐᓇᖅᑐᓂᒃ ᓄᓇᒥᐅᑕᓂᒃ ᐱᕙᓪᓕᐊᑎᑦᑎᓂᖅ ᐊᒻᒪᓗ ᑮᓇᐅᔭᓂᒃ ᐃᓕᓯᓂᖅ ᐱᖁᑎᕐᔪᐊᓄᑦ ᐊᒃᓱᐊᓗᒃ ᐱᒻᒪᕆᐅᕗᑦ ᒪᑭᑉᐸᓪᓕᐊᔾᔪᑎᒋᔭᐅᕙᖕᒪᑕ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᓱᐊᕈᑎᑦᑎᓐᓄᑦ.  ᓄᓇᓐᖑᐊᓕᐅᕐᓂᕐᒧᑦ ᑮᓇᐅᔭᓂᒃ ᐃᓕᓯᓂᖅ ᑐᓐᖓᕕᒋᔭᐅᓂᐊᖅᐳᑦ ᑲᑉᐸᓂᐅᔪᑦ ᓯᕗᓂᑦᑎᓴᓐᓂ ᑮᓇᐅᔭᓂᒃ ᐃᓕᓯᖃᑦᑕᕐᓂᐊᕐᓂᖏᓐᓄᑦ ᔫᑳᓐᒧᑦ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᐅᑭᐅᖅᑕᖅᑐᕐᒥᐅᓄᑦ ᐊᒻᒪᓗ ᒥᓂᔅᑕᕆᔭᐅᓪᓗᓂ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ.

ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᖅᑖᖅᑎᑦᑎᓂᐊᖅᑐᑦ $250,000-ᓂᒃ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᒍᑦ ᔫᑳᓐᒥ ᐱᓕᕆᐊᖑᔪᒪᔪᓄᑦ.  ᑖᒃᑯᓂᖓ ᑮᓇᐅᔭᓂᒃ ᐃᓕᓯᓂᖅ ᐃᑲᔪᖅᓲᑕᐅᓂᐊᖅᑐᑦ ᓄᓇᓐᖑᐊᓕᕆᓂᕐᒥᒃ ᐱᓕᕆᐊᓄᑦ 7-ᖑᓪᓗᐊᖅᑐᓄᑦ ᐱᔭᕇᖅᑕᐅᓇᓱᖕᓂᐊᖅᑐᓄᑦ 2009-10 ᐊᕐᕌᒍᖓ ᐊᑐᖅᑎᓪᓗᒍ.  ᔫᑳᓐᒥ ᓄᓇᓐᖑᐊᓕᕆᔩᑦ ᐱᔭᕇᖅᓯᓂᐊᖅᑐᑦ ᐊᒻᒪᓗ ᐊᐅᓚᑦᓯᔨᐅᓂᐊᖅᖢᑎᒃ ᑕᒪᒃᑯᓂᖓ ᓄᓇᓐᖑᐊᓕᕆᓂᐅᔪᓂᒃ.  ᑐᑭᓯᒋᐊᒃᑲᓐᓂᕈᒪᒍᕕᒋᑦ ᑖᒃᑯᐊ ᐊᑐᓂ, ᖃᐅᔨᒋᐊᕈᓐᓇᖅᑕᑎᑦ ᐱᒋᐊᕐᓂᕕᓂᖏᓐᓂ ᓇᓗᓇᐃᔭᖅᓯᒪᓂᖏᑦᑎᒍᑦ.

“ᑖᒃᑯᐊ ᑮᓇᐅᔭᑦ ᐱᒻᒪᕆᐅᕗᑦ ᐊᐅᓚᔾᔭᐃᒋᐊᕈᑕᐅᓂᐊᕐᒪᑕ ᓄᑖᓐᖑᕆᐊᖅᑎᑕᐅᕙᓪᓕᐊᓂᐅᔪᓄᑦ ᔫᑳᓐᒥ ᓄᓇᓐᖑᐊᓕᕆᓂᕐᒨᖓᔪᑦ ᖃᐅᔨᔭᐅᕙᓪᓕᐊᓂᖏᓐᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᐆᒻᒪᖅᑯᑎᓕᕆᓂᕐᒧᑦ, ᐅᔭᕋᖕᓂᐊᕐᓂᓕᕆᓂᕐᒧᑦ ᓄᓇᒥᐅᑕᓕᕆᓂᕐᒧᓪᓗ ᒥᓂᔅᑕ ᐋᑦᓯ ᓛᖕ.  “ᔫᑳᓐ ᓄᓇᓐᖑᐊᓕᕆᓂᕐᒧᑦ ᑎᑎᖅᑲᖁᑎᖏᑦ ᐃᑲᔫᑕᐅᓂᐊᖅᑐᑦ ᓴᓇᕕᒡᔪᐊᓕᕆᔩᑦ ᑮᓇᐅᔭᓂᒃ ᓴᒡᕙᐃᖃᑦᑕᕐᓂᐊᕐᓂᖏᓐᓄᑦ ᐱᕙᓪᓕᐊᑎᑦᑎᓂᖏᓐᓄᓪᓗ, ᓄᓇᓂᒃ ᐊᑐᕐᓂᕐᒧᑦ ᐃᓱᒪᓕᐅᕈᑕᐅᓂᐊᖅᑐᓄᑦ ᐊᒻᒪᓗ ᑮᓇᐅᔭᖃᖅᑎᑦᑎᓂᐊᖅᖢᑎᒃ ᐱᖁᑎᕐᔪᐊᑦ ᒪᑭᒪᑎᑕᐅᓂᖏᓐᓄᑦ.”

ᑲᓇᑕᐅᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᐅᓚᔾᔭᐃᔾᔪᑏᑦ ᐸᕐᓇᐅᑎᖏᑦ (ᑮᓇᐅᔭᑦ ᐊᑐᕈᒫᕐᓂᐊᖅᑐᑦ 2009) ᓄᑖᓐᖑᕆᐊᖅᑎᑕᐅᓯᒪᕗᑦ ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ  ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᒍᑦ, ᐋᖅᑭᒃᑕᐅᓯᒪᓪᓗᑎᒃ $90 ᒥᓕᐊᓐᓄᑦ ᐊᕐᕌᒍᓄᑦ ᑕᓪᓕᒪᓄᑦ.  ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ  ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᒍᑦ ᑮᓇᐅᔭᑦ ᓇᓕᒧᒌᓕᖅᑎᑕᐅᓯᒪᓪᓗᑎᒃ ᐊᒡᒍᖅᑕᐅᖃᑦᑕᖅᐳᑦ ᐱᖓᓱᓄᑦ ᐅᑭᐅᖅᑕᖅᑐᒥ ᒐᕙᒪᖃᕐᕕᐅᔪᓄᑦ.  ᑕᒪᓐᓇ ᑐᕌᒐᓕᐊᕆᔭᐅᓯᒪᔪᖅ ᐋᖅᑭᒃᑕᐅᓯᒪᓗᐊᖅᐳᖅ ᓴᖅᑭᔮᖅᑎᑕᐅᓂᖅᓴᐅᓕᕈᓐᓇᕐᓂᐊᕐᒪᑦ ᑮᓇᐅᔭᓕᐅᕋᓱᐊᕐᓂᖅ ᐅᑭᐅᖅᑕᖅᑐᒥ, ᓴᓐᖏᒃᑎᓴᕐᓗᒋᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕋᓱᐊᕐᓂᕐᒨᖓᔪᑦ ᐊᒻᒪᓗ ᐱᒻᒪᕆᐅᔪᑦ ᑮᓇᐅᔭᓕᐅᕈᑕᐅᔪᓐᓇᖅᑐᑦ ᐅᑭᐅᖅᑕᖅᑐᒥᐅᓄᑦ.   

ᐅᐸᓗᖓᐃᔭᐅᑏᑦ ᑮᓇᐅᔭᓄᑦ ᕿᑐᕐᖏᐅᖅᑎᑦᑎᔾᔪᑏᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᖃᕋᓱᖕᓂᖅ ᐱᕙᓪᓕᐊᑎᑕᐅᓂᖓᓄᑦ ᐊᐅᓚᑕᐅᕗᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ, ᓄᑖᑦ ᓴᖅᑭᑕᐅᓵᖅᑐᑦ ᐱᔭᒃᓴᖅᑖᖅᑎᑕᐅᓯᒪᕗᖅ ᑐᑭᒧᐊᒃᑎᑦᑎᔨᐅᓂᕐᒥᒃ ᐊᒻᒪᓗ ᓴᖅᑭᔮᖅᑎᑦᑎᓂᕐᒥᒃ ᑲᓇᑕᐅᑉ ᒐᕙᒪᒃᑯᖏᑦᑕ ᑮᓇᐅᔭᓕᐅᕋᓱᐊᕈᑎᓄᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ ᒐᕙᒪᖃᕐᕕᖕᓂ, ᐊᒻᒪᓗ ᐊᑐᐊᒐᓕᕆᓂᕐᒥᒃ, ᖃᐅᔨᓴᐃᔨᐅᓂᕐᒥᒃ ᐊᒻᒪᓗ ᐊᔭᐅᖅᑐᐃᔨᐅᓂᕐᒥᒃ.  ᐅᑯᐊ ᖃᐅᔨᒃᑲᐃᔾᔪᑏᑦ ᓇᓗᓇᐃᖅᓯᕗᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒧᑦ ᑐᑭᒧᐊᕈᑎᓕᐊᕕᓂᖏᓐᓂᒃ, ᐅᑭᐅᖅᑕᖅᑐᖅ ᑲᓇᑕᒥᐅᑕᐅᖃᑕᐅᓂᖓᓂᒃ,  ᓴᐳᒻᒥᐅᓯᖅᓯᓯᒪᓗᑎᒡᓗ ᐅᑭᐅᖅᑕᖅᑐᒥ ᐊᕙᑎᑦᑎᓐᓂ ᐃᑦᑕᕐᓂᓴᕐᓂᒃ, ᓴᖅᑭᔮᖅᑎᑦᑎᒃᑲᓐᓂᕐᓗᑎᒃ ᐃᓅᓯᕐᒧᑦ ᑮᓇᐅᔭᓕᐅᕋᓱᐊᕐᓂᕐᒧᓪᓗ ᐱᕚᓪᓕᐅᑕᐅᔪᓐᓇᖅᑐᓂᒃ, ᐊᒻᒪᓗ ᐱᐅᓯᒋᐊᖅᑎᑦᑎᓗᑎᒃ ᓴᓐᖏᓂᖅᑖᖅᑎᑦᑎᓗᑎᒡᓗ ᐅᑭᐅᖅᑕᖅᑑᑉ ᐊᐅᓚᑕᐅᓂᖏᓐᓂᒃ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᐱᕙᓪᓕᐊᔪᒃᑰᖅᑎᑕᕕᓂᖏᑦ ᑕᑯᒋᐊᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:

ᑲᓇᑕᐅᑉ ᑮᓇᐅᔭᓕᐅᕋᓱᐊᕈᑎᓂᒃ ᐊᐅᓚᔾᔭᐃᒋᐊᕈᑏᑦ ᐸᕐᓇᐅᑎᖏᑦ ᑐᑭᓯᒃᑲᓐᓂᕈᒪᒍᕕᒋᑦ, ᖃᕆᓴᐅᔭᒃᑯᑦ ᑐᕌᕈᑖ ᐅᓇ ᑕᑯᒋᐊᕈᓐᓇᖅᑕᐃᑦ:
ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᑭᒧᐊᕈᑏᑦ, ᐅᓇ ᑕᑯᒋᐊᕐᓗᒍ www.northernstrategy.ca/index-eng.asp

ᑐᑭᓯᒃᑲᓐᓂᕈᒪᒍᕕᑦ ᐅᕗᖓ ᖃᐅᔨᒋᐊᕈᓐᓇᖅᑐᑎᑦ:

ᒥᓂᔅᑕ ᓴᒃ ᔅᑐᕌᓪ ᑎᑎᕋᕐᕕᖓ
ᒥᓯᐅᓪ ᔭᐅ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
(819) 997-0002

ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ (CanNor)
ᑳᑦᓖᓐ ᒪᒃᓚᐅᑦ
ᑐᓴᐅᒪᔾᔪᑎᓕᕆᓂᕐᒧᑦ ᐊᖓᔪᖅᑲᐅᑎᒋᔭᖏᑕ ᖃᐅᔨᒪᔨᑕᖓᑦ
(613) 995-7766

ᔫᑳᓐ ᒐᕙᒪᖏᑕ ᒥᓂᔅᑕᐃᑦ ᑲᑎᒪᔨᖏᓐᓄᑦ ᑐᓴᐅᒪᔾᔪᑎᓕᕆᔨᑦ
ᐄᒥᓕ ᔭᓐᑯ
(867) 633-7961

ᐆᒻᒪᖅᑯᑎᓕᕆᔨᑦ, ᐅᔭᕋᖕᓂᐊᕐᓂᓕᕆᔨᑦ ᓄᓇᒥᐅᑕᓕᕆᔨᓪᓗ, ᔫᑳᓐ ᒐᕙᒪᒃᑯᖏᓐᓄᑦ
ᒫᒃ ᕌᐳᑦᔅ
ᑐᓴᐅᒪᔾᔪᑎᓕᕆᓂᕐᒧᑦ ᐊᐅᓚᑦᓯᔨ
ᐅᖄᓚᐅᑖ: (867) 667-5307